Pagserbisyo diha sa Simbahan
Pagserbisyo Niadtong adunay mga Kakulangan
Dihang gitawag si Lynn Parsons isip disability specialist sa Hurst Texas Stake, gusto niya nga matuman iyang calling nga makapanalangin sa kinabuhi sa mga miyembro sa iyang stake, ilabi na sa mga miyembro nga may kakulangan ug sa ilang mga pamilya.
Usa sa unang gibuhat ni Lynn mao ang pagribyu sa impormasyon kabahin sa iyang calling diha sa LDS.org (lds.org/callings/disability-specialist), ug iyang gigamit ang Handbook 2: Administering the Church aron makasabut sa opisyal nga mga polisiya sa Simbahan kabahin niadtong may kakulangan. Ang Disability Resources website (lds.org/disability) nagsilbi usab nga kapanguhaan. Kini nakatabang kaniya nga makasabut sa nagkalain-laing mga kakulangan ug nahimong kapanguhaan nga mapakigbahin sa mga sakop sa iyang stake.
Mabasa sa Handbook 2, “Ang bishopric o ang kapangulohan sa stake mahimong motawag og usa ka ward o stake disability specialist aron sa pagtabang sa mga indibidwal ug mga pamilya.”1 Ang LDS.org naghatag og dugang nga impormasyon kabahin niini nga calling, nagpasabut nga “ang tahas sa disability specialist mao ang pagtabang sa pagpahigayon nga madugangan ang partisipasyon ug pagpaapil sa mga miyembro sa Simbahan nga may mga kakulangan.”2
Uban niini nga panabut, si Lynn miingon nga gusto niyang “motabang sa mga lider sa pagtuman sa ilang mga calling sa pagpangita og mga himan nga ilang gikinahanglan sa pagserbisyo adtong may kakulangan.”
Si Lynn nakakuha usab og impormasyon sa komunidad ug sa nasyonal nga mga kapanguhaan, sa Internet, ug sa mga miyembro sa ward ug stake nga may kasinatian sa mga tawo nga may kakulangan. Si Lynn naggamit niini nga mga kapanguhaan samtang siya nangita og mga solusyon sa mga hagit nga giatubang sa mga lider ug sa mga pamilya sa iyang stake. Siya wala kanunay masayud asa modangop og impormasyon o tabang, “apan kon magtinguha mo og tubag pinaagi sa pag-ampo,” siya miingon, “madasig mo asa mangita og tubag.”
Pagsabut sa Panginahanglan
Si Lynn nagtrabaho usab aron masabtan ang mga panginahanglan sa mga lider sa iyang dapit nga may kalabutan sa kakulangan. Sa pagbuhat ini, siya mihangyo sa mga lider sa stake sa pagpadala og sulat sa mga bishop nga nagpahibalo kanila sa iyang calling ug nga andam siya nga motabang. Siya usab nakigkita sa kapangulohan sa Primary sa stake aron masabtan ang mga hagit, ug nagplano siya sa pakigkita sa ubang mga lider. “Gusto nakong masayran kini,” siya miingon. “Gusto nakong mahibaloan sa mga tawo asa sila makakita og tabang.”
Pinaagi sa pagpahibalo sa mga miyembro sa stake nga andam siya sa pagserbisyo, sa wala madugay si Lynn nakakita og mga oportunidad sa pagtabang sa mga lider. Sa unang mga bulan isip disability specialist, gidapit siya sa pagpakigkita sa usa ka ward council sa paghisgut kabahin sa mga kinaiya sa usa ka piho nga kakulangan. Siya miserbisyo sa daghang mga paagi, sama sa pagtabang sa usa ka magtutudlo nga makasabut kon unsaon sa pagtudlo sa usa ka bata nga may autism ug nagsugyot nga usa ka assistant nga magtutudlo sa Primary itawag aron ang bata nga may kakulangan makatambong sa klase.
Sa pagpadayon, si Lynn nagplano sa pagtabang sa mga lider sa pagtuman sa ilang mga calling. Samtang nagbuhat siya niini, siya nagtabang sa mga miyembro sa iyang stake sa pagsunod sa ehemplo sa Manluluwas sa paghigugma ug sa pagtabang sa uban, lakip niadtong may kakulangan.
Paghulagway pinaagi ni Beth M. Whittaker