Pagpalig-on sa Pamilya ug sa Simbahan pinaagi sa Priesthood

Ni Richard M. Romney

Mga Magasin sa Simbahan

Mga ginikanan, mga pamilya, ug mga indibidwal mapanalanginan samtang sila magtuon ug maghisgot niining dinasig nga mga mensahe.

Nakahinumdom ba kamo niini nga mga saad? Tingali nakadungog kamo niini sa video excerpt nga gipakita atol sa usa ka miting sa council, sa miting sa ikalimang Dominggo, o sa leksyon sa Relief Society o korum sa priesthood. O tingali inyo kining nahisgutan sa family home evening. Ang mga saad mao:

Mga bana ug mga asawa magkahiusa.
Ang mga amahan ug inahan mohatag og mas dakong espirituhanon nga pagpangulo sa ilang mga pamilya.
Ang kabatan-onan maandam sa paghimo ug pagtuman og sagradong mga pakigsaad ug sa pagserbisyo sa Ginoo isip full-time nga mga misyonaryo ug sa tibuok nilang kinabuhi.
Ang dili minyo nga mga miyembro mahimong suportahan, makadawat sa mga panalangin sa priesthood diha sa ilang mga panimalay, ug hingpit nga moapil sa pagtukod sa gingharian sa Dios.
Ang mga korum ug mga council magtinabangay sa pagpangalagad sa mga anak sa Langitnong Amahan.
Ang Simbahan malig-on.

Kadto nga mga saad gihimo niadtong Marso sa dihang gipagawas sa Unang Kapangulohan ug Korum sa Napulog Duha ka mga Apostoles ang mga mensahe diha sa DVD nga giulohan og Pagpalig-on sa Pamilya ug sa Simbahan pinaagi sa Priesthood. Nianang higayona, ang mga ward ug stake council giimbitar sa pagribyu sa mga mensahe ug dayon magtinambagay kon unsaon sa paggamit niini. Sa samang higayon, ang mga pamilya giimbitar sa pagtan-aw sa bahin sa video diha sa internet sa http://wwlt.lds.org ingon man usab sa mas mubo nga mga kinutlo kon kini anaa na. Ang mga lider ug mga magtutudlo giawhag sa paghatag og oportunidad sa mga miyembro diha sa mga miting ug mga klase sa pagtan-aw sa mga bahin ug sa pagpakigbahin sa ilang kaugalingong mga impresyon, kasinatian ug pagpamatuod ingon nga giaghat sa Espiritu. Ang mga ginikanan giimbitar sa pagbuhat sa ingon diha sa panimalay uban sa ilang mga pamilya.

“Ang Espiritu Santo motudlo sa miyembro kon sa unsang paagi sila malig-on pinaagi sa gahum sa priesthood sa ilang kaugalingong mga tahas ug mga responsibilidad,” miingon ang bahin sa “Unsaon sa Paggamit Niini nga Training.”

Walay Pagkaluya nga mga Panaghisgutan

Bisan og ang mga mensahe gipagawas tulo ka bulan na ang milabay, ang pagtuon ug mga panaghisgutan — ug ang nag-uban nga mga panalangin — nagpadayon karon, ug kini nga paagi naghatag og bag-o nga dimensyon sa matang sa pagbansay diha sa Simbahan. Dili sama sa miaging mga training, nga usa ra ka higayon nga sibya alang sa mga lider sa ward ug stake, kini nga training gituyo nga maanaa kanunay. Mao kana nganong ang mga bahin sa video gibutang diha sa internet sa wwlt.lds.org. Usa ka may kalabutan nga site, leadershiplibrary.lds.org, naghatag og link sa mga video ingon man dugang nga mga kapanguhaan sa pagtabang sa mga pamilya, mga indibidwal, mga korum, mga klase, ug mga council nga mas molawom ang ilang pagsabut ug paggamit unsay ilang nakat-unan.

Matag bahin sa video nag-focus sa usa ka lain-laing aspeto sa priesthood. Ang mga miyembro sa Unang Kapangulohan ug Korum sa Napulog Duha ka mga Apostoles, uban sa ubang mga General Authority ug kinatibuk-ang mga opisyales, mohatag og dinasig nga mga instruksyon kabahin sa:

Sa unsa nga paagi nga ang mga pamilya makakaplag og kalig-on ug kalinaw pinaagi sa gahum sa priesthood.
Unsaon sa pagtabang sa kada pamilya nga makasinati sa mga panalangin sa priesthood.
Sa unsa nga paagi nga kadtong naghupot sa mga yawe sa priesthood makapalig-on sa mga panimalay ug mga pamilya.
Unsaon sa pagpangalagad sa Kristohanong mga paagi.
Unsaon sa pagpadako sa mga anak diha sa kahayag ug kamatuoran

Daghang mga baruganan sa ebanghelyo nga anaa sa Pagpalig-on sa Pamilya ug sa Simbahan pinaagi sa Priesthood gitudlo usab sa Handbook 2: Administering the Church, mao nga ang pagribyu sa impormasyon gikan sa handbook makatabang sa pagtuon ug mga panaghisgutan.Ang pagribyu sa “Ang Pamilya: Usa ka Pamahayag ngadto sa Kalibutan” makatabang usab.

Si Presidente Henry B. Eyring, Unang Magtatambag sa Unang Kapangulohan, mipasabut nga ang mga mensahe sa Pagpalig-on sa Pamilya ug sa Simbahan pinaagi sa Priesthood “gidesinyo sa pagtabang kanato nga makat-on, pinaagi sa gahum sa Espiritu Santo, sa unsang paagi nga ang Langitnong Amahan mangalagad kanato, ilabi na diha sa pamilya.” Kana mao ang labing gamhanan nga bahin sa training — dili kaayo kon unsay gisulti sa usa ka bahin sa video apan unsa ang gitudlo sa Espiritu Santo samtang kita mamalandong ug maghisgot sa mga baruganan nga gitudlo.

Asa Ipakigbahin

Ang tanang mga lider, mga miyembro ug mga pamilya kinahanglan hatagan og oportunidad sa pagpaminaw ug paghisgot sa mga mensahe sa Pagpalig-on sa Pamilya ug sa Simbahan pinaagi sa Priesthood, sa DVD o sa internet.

Ang mga mensahe mopanalangin sa mga pamilya samtang sila mogamit niini sa home evening ug uban pang mga kalihokan sa pamilya. Ang mga bana ug mga asawa, human sa tanan, katambayayong sa paggiya sa ilang mga anak. “Tingali adunay mga higayon diin ang usa ka amahan o inahan kinahanglan motudlo sa usa ka baruganan, ug sila makagamit niining kapanguhaan samtang sila maningkamot sa pagtabang og usa ka anak nga lalaki o anak nga babaye,” mipasabut si Elder M. Russell Ballard sa Korum sa Napulog Duha ka mga Apostoles sa bahin nga giulohan og “Kini Mao ang Iyang Buhat.” Ug si Elder Dallin H. Oaks sa Korum sa Napulog Duha ka mga Apostoles mihatag og gibug-aton nga “bisan unsa pa ka importante ang pagtudlo sa usa ka tigtambag sa priesthood o sa usa ka tigtambag sa Young Women sa Simbahan — ug manghinaut kami nga kini epektibo kaayo — nga dili gayud sama ka epektibo sa ehemplo sa usa ka inahan o ang ehemplo sa usa ka amahan.”

Sa mga kalihokan sa Simbahan, ang mga mensahe magamit sa mga miting sa kapangulohan sa stake ug sa bishopric; mga stake ug ward council; sa priesthood executive committee; stake auxiliary training; kapangulohan, lakip ang mga kapangulohan sa korum sa Aaronic Priesthood ug mga kapangulohan sa klase sa Young Women; ikalimang Dominggo nga hiniusang mga miting sa priesthood ug sa Relief Society; sa mga klase sa korum ug auxiliary sa Dominggo; sa komperensya sa stake ug district (dili sa kinatibuk-ang sesyon sa Dominggo); ug mga komperensya sa ward o branch (dili sa sakrament miting).

Ang mga panaghisgutan mahimong maglakip unsaon sa pagpalig-on sa kabatan-onan ug mga young single adult.Ang mga lider mahimong mohimo og mga assignment base sa mga panaghisgutan ug mosusi sa mga assignment sa regular nga mga miting sa council.

Ang katuyoan sa pagtuon ug sa paghisgot niini nga mga mensahe mao ang pagtabang sa mga indibidwal ug mga pamilya nga malig-on ang ilang pagtuo, magtukod sa ilang mga pagpamatuod, ug magpalawom sa ilang pagkakabig sa ebanghelyo ni Jesukristo.

“Ang atong kasiguroan ug kalampusan nagkinahanglan lamang nga atong ipahiangay ang atong katuyoan ug mga kasingkasing sa pangandoy sa Dios ug sa Iyang gahum,” miingon si Presidente Eyring. Kini nga mga mensahe mao ang “usa ka giya ug awhag sa paghimo nianang pagsunod ug sa atong pagdala sa uban.”

Ang bahin sa “Pagpangalagad” naghatag og gamhanang ehemplo sa mga lider sa priesthood nga nagbisita sa mga indibidwal ug pamilya, sa pagpakita kon sa unsang paagi ang ingon nga mga pagbisita makatabang sa pagluwas sa dili kaayo aktibo nga miyembro.

“Samtang kita maghunahuna kabahin sa katungdanan nga atong madawat sa pagtabang sa maluyahon, sa pagpataas sa mga kamot nga nawad-an og paglaum, ug sa pagpalig-on sa mga tuhod nga mahuyang, dili gayud nato kana mahimo sa mas maayong paagi kay sa tinagsa [one-on-one] nga pagbisita sa ilang balay, paghatag niini nga pagpangalagad ug sa sumbanan nga gigamit ni Jesukristo,” miingon si Presiding Bishop Gary E. Stevenson sa mga bahin “Kini Mao ang Iyang Buhat.” “Nagtuo ako nga ang tinuod nga kaayohan moabut samtang kita maghisgot ug magkat-on, ug dayon mogawas ug mobuhat,” siya miingon.

Kalig-on ug Kalinaw

Samtang kini nga training magpadayon sa tibuok Simbahan, ang mga miyembro makadawat og mga panalangin samtang ilang gamiton kining mga baruganan sa ebanghelyo nga gitudlo. “Tanang mga anak sa Dios mapanalanginan kon sila mosunod sa mga pagtulun-an ug ehemplo niini nga pasundayag,” miingon si Elder Ballard.

Pinaagi sa priesthood, ang mga bana ug asawa, mga amahan ug inahan, kabatan-onan, dili minyo nga miyembro, mga korum, ug mga council mangalagad sa uban ug sa pagpangita og inspirasyon samtang sila mosunod sa ehemplo ni Jesukristo. Samtang sila magpadayon sa pagbuhat niini, ang mga saad nga gihimo sa Pagpalig-on sa Pamilya ug sa Simbahan pinaagi sa Priesthood matinuod.Ang mga miyembro makakita sa katumanan sa saad ni Presidente Eyring gikan sa katapusan nga bahin sa video: nga bisan sa tumang kalisud, “ang atong mga pamilya mahimong lig-on ug malinawon.”

Propetikanhon nga mga Baruganan gikan sa Training

Ang mga bahin sa video nga anaa sa Pagpalig-on sa Pamilya ug sa Simbahan pinaagi sa Priesthood puno sa halandumon nga mga pagtulun-an. Ania ang pipila niini gikan sa mga miyembro sa Korum sa Napulog Duha ka mga Apostoles:

Si Elder L. Tom Perry, nangulo sa usa ka panaghisgut mahitungod sa mga yawe sa priesthood, nagsaksi nga “kini mao ang Simbahan sa Manluluwas nga kita nahisakop. Siya mao ang naggiya ug nagdumala sa Iyang propeta dinhi sa kalibutan. Ako walay pagduha-duha nga Siya mao ang pangulo sa Ang Simbahan ni Jesukristo sa mga Santos sa Ulahing mga Adlaw.”

Si Elder Russell M. Nelson nagtudlo nga “walay mas importante alang sa umaabut nga mga misyonaryo kay sa pagbati sa matarung nga impluwensya sa priesthood sa ilang mga panimalay ug sa pagsinati niini nga mga panalangin sa ilang kinabuhi.”

Si Elder Dallin H. Oaks mitambag nga “ang gahum sa priesthood nagdepende sa personal nga pagkamatarung” ug nga ang mga panalangin sa gahum sa priesthood “anaa sa mga lalaki ug babaye.” Siya miingon nga ang mga pamilya mao ang “panagway ug tig-una sa kahimayaan sa celestial nga gingharian.”

Ug si Elder M. Russell Ballard mipamatuod nga “ang awtoridad sa priesthood nga nagbugkos sa mga pamilya pinaagi sa mga ordinansa sa pagbugkos diha sa balay sa Ginoo.” Siya usab nagtambag nga “ang mga kaigsoonan kinsa mangulo sa mga ward ug sa mga stake kinahanglan nga mogamit sa gahum nga ikahatag sa kababayen-an sa Simbahan aron sa pagtukod sa gingharian sa Dios.”

PAGHULAGWAY SA LITRATO PINAAGI NILA Cody Bell UG Craig Dimond

Paghulagway sa litrato pinaagi ni Welden C. Andersen

Ang mga mensahe nga gitudlo diha sa Pagpalig-on sa Pamilya ug sa Simbahan pinaagi sa Priesthood mahimong ipakigbahin sa lain-laing sitwasyon, sama sa mga stake ug ward council.