Namulong Sila Kanato
Pagpalambo sa Inyong Personal nga mga Pag-ampo
Gikan sa usa ka pakigpulong sa debosyonal sa Unibersidad sa Brigham Young–Hawaii niadtong Mayo 17, 2011. Alang sa kompleto nga teksto sa Iningles, bisitaha ang devotional.byuh.edu.
Unsa ang mapadayag mahitungod kaninyo ug sa inyong relasyon sa Langitnong Amahan kon paminawon ang inyong personal nga mga pag-ampo?
Ang balaan nga pagdapit sa pag-ampo ngadto sa Amahan sa pangalan ni Jesukristo mao ang labing gihisgutan nga sugo diha sa tanan nga narekord nga mga kasulatan ug mao ang labing nag-unang matang sa personal nga pagsimba. Apan kadaghanan nato nanglimbasog sa atong mga paningkamot sa paghimo og personal nga pag-ampo nga makahuluganon ug makadawat og pagpadayag.
Ako nakombinser nga ang personal nga pag-ampo mao ang usa sa labing mahinungdanon nga mga hagit nga giatubang sa mga miyembro sa Simbahan, ilabi na sa mga kabatan-onan ug mga young adult. Ug tungod kay sila nanlimbasug sa pag-ampo, sila nanlimbasug sa espirituhanon nga paagi.
Ang atong personal nga mga pag-ampo mao ang sukdanan sa atong espirituhanon nga kalig-on ug usa ka timailhan sa atong espiritwal nga pagkatawo. Akong nakat-unan isip usa ka amahan, lider sa priesthood, ug presidente sa misyon nga ang pagpaminaw og maayo sa mga pag-ampo sa uban makapadayag og daghan kabahin sa iyang relasyon uban sa Dios.
Unsa ang mapadayag mahitungod kaninyo ug sa inyong relasyon sa Langitnong Amahan kon paminawon ang inyong personal nga mga pag-ampo?
Ang Baruganan sa Personal nga Pag-ampo
Ang pag-ampo mao ang pagpakigsulti sa Dios, ang Amahan sa Kahangturan sa atong mga espiritu—dili ngadto Kaniya apan uban Kaniya. Siya nahigugma sa matag usa nato sa hingpit ug puno sa kalooy ug panabut. Siya nasayud sa tanan mahitungod nato. Siya nasayud kon unsay atong gikinahanglan, bisan kon kita makakita lamang unsay atong gusto. Siya adunay walay kinutuban nga gahum ug kapasidad sa pagpatunhay ug paggiya nato. Andam siya kanunay nga mopasaylo ug motabang nato sa tanang mga butang.
Mahimong makig-istorya kita sa Langitnong Amahan pinaagi sa paglitok sa mga pulong o pinaagi sa paghunahuna ug mga ekspresyon sa atong mga hunahuna ug kasingkasing. Ang personal nga mga pag-ampo kinahanglang ligdong, sagrado nga pagpahayag sa pagdayeg ug pasalamat; kinasingkasing nga pangamuyo alang sa piho nga mga panginahanglan ug mga tinguha; mapainubsanon, mahinulsulon nga mga pagkumpisal ug hangyo sa pagpasaylo; pangamuyo alang sa kahupayan, direksyon, ug pagpadayag. Kini nga mga ekspresyon sa kasagaran makapabu-bu nato sa atong kalag ngadto sa atong mahigugmaong Langitnong Amahan.
Ang pag-ampo sa kasagaran mubo nga komunikasyon, apan kini mahimo usab nga dayag ug padayon nga panag-istorya sa tibuok adlaw ug gabii (tan-awa sa Alma 34:27).
Personal nga Pag-ampo Mahinungdanon
Sa balaang plano sa atong Langitnong Amahan, pisikal ug espirituhanong pagkabulag gikan sa Iyang atubangan ang gikinahanglan. Ang pag-ampo importante ug makapasumpay sa espirituhanon tali sa Dios ug sa tawo. Kon walay pag-ampo, dili posible ang pagbalik ngadto sa Amahan. Kon walay pag-ampo, imposible ang igong hugot nga pagtuo sa pagsabut ug pagsunod sa mga sugo. Kon walay pag-ampo, ang gikinahanglan nga espirituhanong gahum sa paglikay sa tintasyon ug sa pagbuntog sa mga pagsulay ug kalisdanan wala. Kon wala ang pag-ampo, dili makab-ot ang paghinulsol, pagpasaylo ug ang makalimpyo nga gahum sa Pag-ula. Sa gahum sa pag-ampo, ang tanan nga mga butang posible.
Pinaagi sa pag-ampo ang personal nga pagpadayag ug espirituhanong mga gasa madawat pinaagi sa Espiritu Santo. Mao kini ang espirituhanong paagi nga magamit sa tanang mga anak sa Dios, naghatag nato og makanunayon nga access sa atong Amahan sa Kahangturan, sa Iyang Hinigugmang Anak, ug sa Espiritu Santo. Ang pag-ampo usa ka gamhanan ug kusganong ebidensya sa katinuod sa Dios ang Amahan sa Kahangturan. Ang personal nga pag-ampo gikinahanglan aron sa pagsabut sa Dios ug sa atong balaan nga pagkatawo.
Pagpalambo sa Inyong mga Pag-ampo
Pag-andam sa Pag-ampo
Sa kasagaran ang atong personal nga mga pag-ampo maoy unang butang nga buhaton sa buntag sa dili pa kita hingpit nga magmata o sa gabii nga kita gikapoy kaayo aron mag-ampo sa epektibo nga paagi. Ang atong pisikal, mental ug emosyonal nga kakapoy makapugong nato sa paghimo og makahuluganong pag-ampo.
Ang pag-ampo mao ang espirituhanon nga buhat nga paga-unhan sa mental ug espirituhanong pagpangandam. Kon kita dili mogahin og panahon sa pagpaubos sa atong kaugalingon ug pagkonsiderar nga kita motawag na sa Dios nga Amahan sa Kahangturan pinaagi sa ngalan ni Jesukristo, dili nato masabtan ang tinuod nga kahulugan sa balaang sumbanan nga gihimo aron sa pagpanalangin nato.
Pag-iskedyul og igong panahon nga mapainubsanong mapadayag ang labing dakong tinguha sa inyong kasingkasing ngadto sa Langitnong Amahan. Dapita ang Espiritu Santo sa pagtabang ninyo nga masayud kon unsa ang iampo. Ang pag-ampo pinaagi sa paglitok sa mga pulong makatabang nako sa pag-focus sa akong mga pag-ampo ug pagpaminaw sa akong kaugalingon nga dili maglatagaw ang hunahuna.
Mosugyot ko sa pagpangita og panahon ug dapit diin inyong mahinuktukan ang inyong kinabuhi ug ang inyong mga panginahanglan. Pamalandongi ang inyong balaanong pagkatawo ug relasyon ngadto sa Dios. Paningkamot sa paghunahuna sa Langitnong Amahan samtang kamo nangandam sa pakig-istorya Kaniya. Hunahunaa ang Manluluwas kansang ngalan kamo mag-ampo. Ang pagbuhat sa ingon makatabang ninyo sa pag-focus ug pag-andam sa pag-ampo uban sa mapainubsanon ug mapasalamaton nga kasingkasing.
Pagpuyo sa Takus nga Paagi
Dili kita komportable diha sa presensya sa atong Langitnong Amahan kon kita dili limpyo. Pornograpiya, sekswal nga kalapasan ug mga kalingawan sa bisan unsa nga matang nga nagbiay-biay sa hiyas o nagpasiugda sa imoralidad mahimong makaguba sa atong pagsalig sa pag-ampo ug makapugong nato sa pagdawat og espirituhanong pag-aghat. Hinumdumi, bisan pa niana, si Satanas lamang ang mosulti kaninyo nga kamo dili o kinahanglang dili mag-ampo. Ang Espiritu Santo miawhag kanunay nato sa pag-ampo, bisan kon kita nanlimbasug nga magmasulundon ug sa personal nga katakus.
Pag-ampo nga may Katuyoan
Ang pag-ampo mahinungdanong proseso sa pagpadayag. Ang dinasig nga mga pangutana maghatag og mas dakong tumong, katuyoan ug kahulugan sa atong mga pag-ampo. Kon kamo gusto nga makadawat og personal nga pagpadayag pinaagi sa inyong mga pag-ampo, mahimo ninyong hunahunaon ang mga pangutana nga inyong ipangutana. Ang pagpadayag sa kasagaran moabut isip tubag sa pangutana. Ang proseso sa pagpadayag nagsugo nato sa pagsiksik sa mga kasulatan, mamalandong niini, ug mogamit niini sa atong mga kinabuhi. Kon buhaton nato kini, ang Espiritu Santo motabang nato sa paghimo og dinasig nga mga pangutana.
Ipahiangay ang Inyong Hunahuna sa Hunahuna sa Amahan
Gibalikbalik sa pagsugo sa Manluluwas nga kita “kinahanglan gayud nga mag-ampo kanunay ngadto sa Amahan sa ngalan sa [ Ginoo]” (3 Nephi 18:19). Kon kita mag-ampo pinaagi sa ngalan ni Jesukristo, kini nagpasabut nga “ang atong mga hunahuna mao ang hunahuna ni Kristo, ug ang atong pangandoy mao ang pangandoy ni Kristo. … Kita mangayo dayon og mga butang posible nga ihatag sa Dios. Daghang mga pag-ampo wala matubag tungod kay kini dili pinaagi sa ngalan ni Kristo; kini dili gayud mao ang iyang hunahuna, apan tungod sa kahakog sa kasingkasing sa tawo” (Bible Dictionary, “Prayer”). Ang pag-ampo nga nasubay niini nga sumbanan nagrepresentar sa kawang nga paglaum, dili hugot nga pagtuo.
Ang pag-ampo dili proseso sa negosasyon. Kini mao ang proseso sa pagpahiangay. Dili nato palihukon ang Dios sa atong gusto. Ang pag-ampo dili mahitungod sa pag-usab sa atong kahimtang kon dili mao ang pag-usab sa atong kaugalingon. Mahitungod kini sa pagtinguha sa Iyang kabubut-on ug mangamuyo sa Iyang tabang sa pagbuhat kon unsay gikinahanglan natong buhaton. Kon mapahiangay nato ang atong kabubut-on uban sa Langitnong amahan, ang mga tubag ug ang espirituhanong gahum modagayday sa gawasnong paagi. Ang pagsunod niini nga sumbanan nagtugot nato sa pag-ampo uban sa hugot nga pagtuo.
Gidungog ba sa Langitnong Amahan ang Akong mga Pag-ampo?
Dul-an sa 20 ka tuig ang milabay, among ikalima nga anak nga lalaki, si Benjamin, natawo. Ang akong asawa mibati nga adunay dili maayo sa mga mata ni Benjamin. Gikonsulta namo ang suod nga higala ug retinal specialist sa among ward, nga mikumpirmar sa among mga kabalaka ug nadayagnos ang kondisyon ni Benjamin nga retinal blastoma, usa ka talagsaon nga matang sa kanser sa mata. Grabe ang maong balita.
Pipila ka semana ang milabay, si Benjamin tambalan na sa pinakauna sa daghang mga pagtambal. Sa wala pa ang operasyon kami nakigkita sa surgeon ug misulti kaniya nga nagtuo kami nga iyang makita nga ang mga mata ni Benjamin naayo na ug dili na kinahanglan nga kuhaon pa. Ang among tibuok pamilya ug ang daghang mga miyembro sa ward nagpuasa ug nag-ampo alang sa among anak nga lalaki, ug kami adunay dakong pagtuo nga mamaayo si Benjamin.
Paglabay sa usa ka oras, mibalik ang surgeon ug mikumpirmar nga ang mata ni Benjamin naadaut tungod sa mga selula sa tumor ug nga ang iyang laing mata usab adunay daghang tumor nga kinahanglang tambalan dayon. Wala ko makatingog. Naguol pag-ayo ug dili makatuo, migawas ko sa ospital sa bugnaw nga kabuntagon sa San Francisco ug naglakaw, naghilak sa hilabihang kasakit.
Gibuhat nako ang tanang gitudlo nako nga akong buhaton. Kami nag-ampo ug nakadawat og kusog nga impresyon sa pagpili niini nga doktor. Nagpuasa ug nag-ampo kami ug mibati nga ang among gamayng anak mamaayo pinaagi sa hugot nga pagtuo ug pinaagi sa gahum sa priesthood. Bisan pa niana, ang Ginoo wala manginlabut. Ang among hugot nga pagtuo nahimo lang kawang nga paglaum. Nagsugod ko sa pagduha-duha sa tanan nga akong gituohan. Samtang naglakaw ko, akong gibati nga giluiban ug nasuko. Gisakitan ako pag-ayo.
Dili ako mapasirgabuhon sa akong pagpakig-istorya uban sa Langitnong Amahan samtang naglakaw ko ug naghilak nianang buntaga. Pagkataud-taod, nakontrolar na nako ang akong emosyon. Nakahinumdom ko sa mga pulong sa usa ka kanta sa mga bata sa Primary nga misulod sa akong hunahuna. “Amahan sa Langit, naa ba gayud ka? Modungog ka ba sa pag-ampo sa bata?” Tungod kay klaro nga wala ka maminaw nako o tingali wala lang gyud magpakabana nako ug sa akong anak. (“A Child’s Prayer,” Children’s Songbook, 12.)
Nianang higayuna, ang malumo nga kalooy miabut. Sa akong hunahuna ug kasingkasing, akong gibati kini nga mga pulong: “Kevin, siya anak usab nako.” Ang kaklaro sa pag-aghat dili gayud masaypan. Naamgohan nako nianang higayuna nga ako wala makasabut sa katuyoan sa pag-ampo. Nagdahum ko nga, tungod kay ako adunay usa ka matarung nga katuyoan, ako makagamit sa priesthood ug sa pagpuasa ug pag-ampo aron sa pag-usab sa kabubut-on sa Dios.
Sa unang higayon sa akong kinabuhi, ako hingpit nga nakaamgo nga dili ako ang nagdumala. Nasayud ako nga kinahanglan kong mosunod sa kabubut-on sa Langitnong Amahan. Dili nako maangkon kon kanus-a ug sa unsang paagi ang akong gusto tungod lang kay nagsunod ko sa mga sugo. Ang katuyoan sa pag-ampo dili ang pagsulti sa Langitnong Amahan kon unsay buhaton, hinoon sa pagsuta kon unsay Iyang gusto nga akong buhaton ug makat-unan. Kinahanglan nga akong ipahiangay ang akong kabubut-on sa Iyang kabubut-on.
Among atubangon ang laing unom ka tuig sa seryoso nga mga hagit samtang kami nakigbisog sa kondisyon sa among gamay nga anak sa pagluwas sa iyang laing mata ug sa iyang kinabuhi. Apan karon nasayud ako nga ang Langitnong Amahan nakahibalo ug mao ang nagdumala. Ug bisan unsa pay mahitabo, Siya nakadungog ug mitubag sa akong pag-ampo. Karon ang among anak sa milagro nagserbisyo og full-time nga misyon sa Spain.
Ako adunay hingpit nga ebidensya sa akong kaugalingong kinabuhi nga ang Dios mao ang atong mahigugmaong Langitnong Amahan ug sa pagkatinuod maminaw ug motubag sa atong mga pag-ampo. Samtang kamo mopadayon sa pagkat-on ug pagsabut sa balaang mga baruganan sa personal nga pag-ampo sama sa pagtudlo sa Manluluwas niini, ang pag-ampo mahimong tinubdan sa talagsaong espirituhanong gahum ug pagpadayag sa inyong kinabuhi.
Paghulagway sa litrato pinaagi ni Les Nilsson