Lima ka mga Paagi sa Pagsunod sa Tambag sa mga Lider sa Priesthood

Ang Ginoo namulong ngadto sa Iyang mga disipulo ug mitudlo sa mga tawo sa Iyang panahon. Karon Siya nagpadayon sa pagbuhat sa ingon.

paghulagway sa litrato pinaagi ni Steve Bunderson, dili mahimong pakopyahan

Bisan tuod ang Manluluwas wala sa taliwala nato sa pisikal nga paagi, Siya mitawag sa mga miyembro sa Simbahan sa pagdumala ug paggiya kanato, ug Siya naghangyo kanato sa pagsunod sa ilang tambag samtang sila makadawat niini pinaagi sa Balaan nga Espiritu.

Kinsa makadawat og pagpadayag nga magamit alang kanako?

Ang pagpadayag personal nga moabut diha ninyo pinaagi sa Espiritu, ug kini usab moabut pinaagi sa lider sa priesthood nga gi-set apart alang sa piho nga mga calling sa pagtabang kanila nga makadawat og giya alang niadtong gisalig sa ilang pag-amuma.

Ang propeta makadawat og pagpadayag alang sa tibuok Simbahan; ang inyong Area Presidency makadawat niini alang sa inyong mga dapit; ang inyong presidente sa stake alang sa inyong stake; ug ang inyong bishop alang sa inyong ward. Ang pagpadayag moabut ngadto niini nga mga indibidwal sa ilang mga calling, apan kini moabut gikan sa samang tinubdan: ang Langitnong Amahan.

Unsay ipasabut sa pagpaluyo sa atong mga lider?

Ang pagpataas sa atong tuo nga kamot nga pinaeskwala kon kita nagpaluyo sa mga tawo mao ang usa ka pisikal nga pagpakita nga kita mosaad sa pagtamud, pagtahud ug pagsuporta kanila samtang sila maningkamot sa pagpalambo sa ilang mga calling. Ang pagsunod sa tambag sa atong mga lider mao ang usa ka paagi nga kita makahimo sa pagpaluyo kanila. Ang mga lider adunay kaalam ug panglantaw, ug ang ilang panudlo gituyo aron sa pagtabang nato sa pagsunod sa ebanghelyo. Ang pagkamasulundon sa ilang tambag makapalambo sa atong hugot nga pagtuo ug maglig-on sa atong pagpamatuod.

Aniay lima ka mga paagi nga kamo makasunod sa tambag sa inyong mga lider sa priesthood.

1. Pagtambong sa kinatibuk-an, stake, ug ward nga mga komperensya. Mahimo kamong magdala og papel ug ballpen nga isulat. Samtang maminaw kamo sa inyong mga lider sa priesthood, isulat ang bisan unsa nga mga impresyon nga inyong bation, mga butang nga inyong buhaton, o mga kausaban nga inyong himoon sa inyong kinabuhi. Siguroha nga magsulat kon sila mamulong kaninyo sa mga miting sa Simbahan o ingon man usab sa mga interbyu.

2. Pag-ampo aron makadawat og pagpamatuod mahitungod sa tambag nga ilang gihatag. Ang Espiritu Santo makapamatuod kaninyo nga ang tambag nga gihatag kabubut-on sa Langitnong Amahan.

3. Paghimo og piho nga mga plano kon sa unsang paagi ninyo ilakip ang tambag sa inyong kinabuhi. Sama pananglit, ang mga propeta mitambag sa mga miyembro sa Simbahan nga moeskwela gayud. Unsa ang inyong plano? Moeskwela ba kamo sa kolehiyo o sa bokasyonal? Unsay inyong eskwelahan? Kanus-a kamo moadto? Unsay inyong gibuhat karon sa pagpangandam aron kamo madawat sa programa nga inyong gitinguha?

4. Pagpakisayud kanunay. Pagkat-on sa bag-ong tambag sa mga lider sa Simbahan pinaagi sa pagbasa sa mga materyal sa Simbahan. Alang sa Kalig-on sa Kabatan-onan usa ka talagsaon nga kapanguhaan. Ang Liahona naglangkob sa mga pulong sa mga propeta ug apostoles. Kon ang inyong ward o branch adunay newsletter, basaha ang mga mensahe nga gihatag sa inyong lokal nga mga lider sa priesthood. Ang labing importante, ribyuha unsay gisulti sa mga lider sa bag-ong kinatibuk-ang komperensya.

5. Pagsugod diha-diha dayon. Usahay kita matintal sa paglangay-langay sa pagsunod sa tambag sa atong mga lider. Human kamo makahimo og piho nga mga plano sa paglakip niana nga tambag, lihok dayon.

Kamo Makapaluyo sa Lokal nga mga Lider Pinaagi sa:

• Pagdawat sa tawag sa pagserbisyo.

• Pagtabang kon hangyoon.

• Pagpangandam alang sa mga leksyon pinaagi sa pagbasa niini daan.

• Pag-ampo alang sa inyong mga lider.

• Pag-apil sa klase.

Akong Gidawat ang Hagit sa Bishopric

Samtang hapit na ko mahuman sa ikapitong ang-ang, misugod ko sa pagbati nga ingon og dunay kulang. Nag-ampo ko matag gabii ug aktibo sa simbahan, apan dili pa kini igo. Naghunahuna ko mahitungod sa pagbasa sa Basahon ni Mormon ug sa pagsusi kon tinuod ba gayud ang Simbahan, apan nahadlok kong mobuhat aron sa pagsiguro.

Ang akong bishopric mihagit sa among grupo sa kabatan-onan sa pagbasa kanunay sa kasulatan sa among kaugalingon. Gusto ko, apan akong gibati nga wala koy panahon.

Dayon kusog ang akong gibati nga ako kinahanglang mobasa sa Basahon ni Mormon ug mosusi kon tinuod ba kini. Akong gibati nga dili gayud ako makatagamtam og kalinaw kon dili nako buhaton.

Misugod ako sa pagbasa ug hapit na matunga sa unang kapitulo sa dihang akong gibati ang Espiritu nga kusog kaayo, nga wala nako mabati kaniadto. Malinawon kaayo kini; gusto kong magpabilin kini nako sa kahangturan.

Mapasalamaton ako nga ang akong mga lider nadasig sa paghagit namo sa pagbasa sa Basahon ni Mormon. Andam sila kanunay sa pagtabang kon ako adunay espirituhanong problema. Ako nasayud nga ang ebanghelyo tinuod, kay kini mipanalangin kanako pag-ayo.

Camryn G., Utah, USA

Mga Leksyon sa Dominggo

Hilisgutan Niining Bulana: Priesthood ug ang mga Yawe sa Priesthood

Pag-apil sa Pag-istoryahanay

Sa tibuok Hunyo kamo magtuon mahitungod sa priesthood diha sa inyong mga klase sa Young Women ug sa Sunday School ug sa mga korum sa priesthood. Hunahunaa unsay inyong mga pangutana mahitungod sa priesthood, sa unsang paagi kini makaapekto sa inyong kinabuhi, ug sa unsang paagi kamo makasuporta sa mga lider sa priesthood. Ipakigbahin ang inyong mga pangutana sa inyong mga ginikanan o lider sa kabatan-onan aron sila makatabang kaninyo nga mas makasabut sa mga doktrina sa priesthood sa inyong leksyon karong bulana. Mahimo usab kamong maghunahuna mahitungod sa mga kasinatian nga inyong nasinati diin ang priesthood nakapanalangin sa inyong kinabuhi. Isulat ang inyong mga pagbati, ug hunahunaa ang pagpakigbahin niini ngadto sa uban diha sa panimalay, diha sa simbahan, o sa social media.

paghulagway sa litrato pinaagi ni Eldon Linschoten