O Unsa Kamahinungdanon sa Laraw sa Atong Dios!
Sa higayon nga dihay kasakit ug kamingaw sa akong kasingkasing, ang akong kahibalo sa ebanghelyo naghatag kanako og pagsalig sa pagpadayon.
Mga paghulagway pinaagi ni Cynthia Clark
Ako nagtubo sa usa ka dapit diin ang Simbahan wala kaayo mailhi—usa ka lungsod nga gitawag og Berkh, sa amihanang Mongolia. Ako ang tunga-tunga nga anak sa tulo ka batang lalaki, ug nagtubo, kami mag-uban sa tanang panahon. Sa dihang ang akong magulang nga lalaki miadto sa siyudad sa pag-eskwela, ako gimingaw kaniya pag-ayo. Duha ka tuig ang milabay siya mibakasyon panahon sa ting-init. Niana nga ting-init ang among pamilya nangayam sulod sa tulo ka bulan sa batoon nga kabungturan. Kini mao ang pinakanindot nga bakasyon sa ting-init sa akong kinabuhi.
Ang akong igsoong lalaki misugod sa pagsulti nako kabahin sa usa ka simbahan nga iyang giapilan nga gitawag og Ang Simbahan ni Jesukristo sa mga Santos sa Ulahing mga Adlaw. Nianang panahona ako wala ganahi sa Kristiyano nga mga simbahan, mao nga ako wala kaayo magtagad sa unsay iyang gisulti nako.
Usa ka adlaw sa tinglarag [autumn] gikan kami nangayam dihang among nahibaloan nga dihay mga bisita gikan sa siyudad. Gikan sila sa Simbahan nga gihisgutan sa akong igsoong lalaki. Mibalik siya ngadto sa siyudad uban nila nianang gabhiona. Sa wala madugay kami nakadungog nganong mibiya siya: iyang nadawat iyang mission call. Wala gani siya mosulti namo nga siya mipadala sa iyang application! Ang akong magulang nga lalaki nagmisyon sa Tinipong Bansa sa Amerika human niana.
Nakabig ngadto sa Ebanghelyo
Pagka-sunod tuig, sa dihang nahuman ako sa high school, ako miadto sa siyudad sa pag-eskwela sa unibersidad. Ang pamilya nga akong gipuy-an mga miyembro sa Simbahan. Sa buntag sa Dominggo sila miimbitar nako sa pagsimba uban kanila. Tungod kay ako nakadungog og daghan mahitungod niini nga Simbahan, nakahukom ko nga sulayan og kausa.
Misimba na hinoon ko og daghang mga higayon. Dili nako mapugngan nga mobati og kalinaw matag higayon nga ako anaa didto. Ang mga tawo didto mga buotan, kanunay makiglamano nako. Ang Simbahan lahi sa unsay akong gihunahuna. Sa wala madugay nagsugod ko sa pagpaminaw sa mga panaghisgutan gikan sa mga misyonaryo. Nakigkita ko sa mga misyonaryo hapit duha ka tuig.
Ako nasayud nga ako gusto nga magpabunyag, apan ang akong bunyag kinahanglang iuswag tungod sa akong pakigbisog sa Pulong sa Kaalam. Lisud alang nako, apan sa katapusan ako andam na sa bunyag. Swerte akong gibunyagan sa akong magulang nga lalaki, kinsa miuli na gikan sa iyang misyon mga pila pa lang ka buwan. Kon ako mahinumdom niana nga higayon karon, makahilak ako usahay. Kini mao ang pinakamalipayon nga higayon sa akong kinabuhi.
Human sa akong pagpasakop sa Simbahan, ang akong igsoong lalaki naghisgut kabahin sa misyonaryo nga buhat hapit kada adlaw. Siya kanunay miawhag kanako nga magmisyon.Uban sa iyang tabang, gisulatan nako ang mission application. Dili gayud nako makalimtan ang kalipay sa akong magulang nga lalaki ug nako.
Usa ka Makahahadlok nga Kasinatian
Usa ka gabii ang akong igsoong lalaki mitawag nako nga makigkita kaniya human sa trabaho. Siya gusto nga makig-istorya nako kabahin sa pila ka mga butang nga may kalabutan sa akong misyon. Nag-iskedyul kami nga magkita sa central square.
Panahon kini sa parliamentaryong eleksyon sa Mongolia. Sa dihang nagkita kami sa central square, dunay demonstrasyon ang mga tawo tungod sa eleksyon. Dihay mga pulis, apan ang demonstrasyon nagkabayolente ug makahadlok, nahimong kagubot. Nasunog ang dako nga building ug pipila ka mga sakyanan, ug ang mga tawo nanagsinggit. Makahahadlok kini.
Ang akong igsoon ug ako nagkita layo gikan sa demonstrasyon, apan siya nabalaka. Gihatagan niya ako og kwarta para sa taxi ug giingnan ko nga mouli dayon. Giingnan ko niya nga magkita kami sa sunod adlaw. Nagplano siyang mopauli sa iyang gipuy-an, nga duol sa iyang trabahoan. Ang taxi miabut, ug nanamilit mi sa wala pa ko molarga.
Sa wala madugay akong nahibaloan nga gisirhan sa gobyerno ang tanang dalan tungod sa kagubot. Kay dili ko makauli sa amoa, nga naa sa gawas sa siyudad, didto ako matulog sa trabahoan. Armored nga mga sakyanan ug armado nga mga sundalo anaa bisan asa. Ang away mas migrabe, ug nianang gabhiona gideklarar ang dapit sa state of emergency. Milungtad kini og upat ka adlaw.
Sa dihang nahuman na ang state of emergency, ang akong bayaw mikuha nako. Miadto kami sa ilang balay nga ang tanan namong mga kabanay naghulat didto. Silang tanan naghilak. Akong nahibaloan nga ang akong magulang nga lalaki gipusil samtang siya naglakaw pauli.
Ingon og mobuto ang akong kasingkasing. Ang akong igsoong lalaki namatay sa dihang nag-edad siya og 24 tungod niana nga demonstrasyon. Ang mga adlaw human sa kamatayon sa akong igsoon mao ang labing grabe nga panahon sa akong kinabuhi.
Atol niining malisud nga panahon akong nadawat ang akong call sa misyon. Human sa akong pagkakabig, bunyag, ug pagpangandam sa misyon nga uban ang akong igsoong lalaki, ako na lang ang miabli sa akong tawag sa misyon. Sa akong katingala, ako gitawag sa pagserbisyo sa kaugalingon nakong nasud.
Tungod kay ako nag-inusara, ako miluhod diha dayon ug nagpasalamat sa akong Langitnong Amahan diha sa pag-ampo. Ug ako nag-ampo alang sa akong igsoong lalaki. Mihilak ko pag-ayo samtang ako nag-ampo. Niining panahona, sa dihang adunay dakong kasakit ug kamingaw sa akong kasingkasing, ako mibati og maayo sa pagsaksi sa Espiritu sa plano sa kaluwasan, ug ang akong hugot nga pagtuo nalig-on.
Wala ngadto sa tuo: Amarsanaa ug ang iyang mga igsoon, Dorjsuren ug Amarsaikhan
Usa ka Pagpamatuod sa Iyang Plano
Bisan tuod ang akong igsoong lalaki wala na sa akong pag-abli sa akong mission call, ako kanunay nga mapasalamaton kaniya. Ako usab mapasalamaton kaayo nga ang Dios naghatag kanato sa plano sa kaluwasan pinaagi sa Pag-ula ni Jesukristo. Kini mao ang labing maanindot nga plano. Kon kita mosunod niini nga plano, kita mobati og kalinaw sa atong mga kasingkasing.
Ang kasulatan nagsulti kanato: “O unsa ka mahinungdanon sa laraw sa atong Dios! Kay … ang paraiso sa Dios kinahanglan gayud motugyan sa espiritu sa mga matarung, ug ang lubnganan motugyan sa lawas sa matarung; ug ang espiritu ug ang lawas mapahiuli pag-usab, ug ang tanan nga mga tawo mahimo nga dili madunot, ug imortal, ug sila mao ang buhi nga mga kalag” (2 Nephi 9:13).
Ako nasayud nga ang akong igsoong lalaki buhi sa kalibutan sa espiritu. Kini nga kahibalo naghatag nako og pagsalig nga akong gikinahanglan aron mamaayo ang akong misyon. Ako nasayud nga siya mag-uban nako sa lisud nga mga panahon—ug mao usab ang Ginoo.