Mga Pangutana ug mga Tubag

“May problema sa pornograpiya ang akong igsoon. Naningkamot siya kauban sa among bishop sa pagsulbad niini, mao nga gusto kong mosuporta kaniya, apan nakaapekto kini sa akong pagsalig kaniya. Unsay akong buhaton niini?”

Nindot kaayo nga gusto kang mosuporta sa imong igsoon. Iyang gikinahanglan ang imong awhag. Tungod kay ang imong igsoon mipahibalo nimo niini nga hagit sa iyang kinabuhi ug ikaw nasayud nga siya naningkamot sa pagsulbad niini, nakahimo na siya og dako sa pagpabalik sa imong pagsalig. Ang pagbuntog sa mga tinaguan ug pagpanglingla nga kanunay may kalabutan niini nga hagit mao ang ebidensya sa dakong kalamboan. Kini makatabang kanimo nga makasugod sa pagbutang og dugang nga pagsalig kaniya. Nagkinahanglan og panahon nga mobalik ang hingpit nga pagsalig. Apan kana wala magpasabut nga ikaw dili gihapon magmahal kaniya. Ikaw makaampo alang kaniya, mahimo nga usa ka maayo nga ehemplo ngadto kaniya, ug mobuhat og ubang mga butang aron sa pagtabang kaniya.

Paningkamot nga dili mohukom kaniya. Kon siya mobati nga gihukman, tingali mas ngil-ad ang iyang bation sa iyang mga panlimbasug, ug kana makapalisud kaniya nga magbag-o. Ang tanan adunay kahuyang; mao kana ang usa ka rason ang Manluluwas mihatag sa Pag-ula. Salig sa Ginoo ug sa kamatuoran nga, pinaagi sa paghinulsol, ang imong igsoon makausab ug mapasaylo.

Tungod kay ikaw nakahibalo nga imong igsoon nakigtambayayong uban sa inyong bishop niini nga isyu, mahimong makigsulti ka sa inyong bishop bahin niini nga sitwasyon. Siya ug ang inyong mga ginikanan makatabang kanimo nga mahibalo unsay buhaton. Isip usa ka pamilya mahimo kamong magtinabangay sa pagtabang sa imong igsoong lalaki. Mahimo kamong magpuasa isip pamilya sa pagtabang kaniya (tan-awa sa Mateo 17:21), diin naghatag og usa ka taming batok sa tintasyon.

Mubo nga sulat: Daghang batan-ong mga babaye usab nanlimbasug sa pagkaadik sa pornograpiya. Ang samang tambag magamit sa mga relasyon uban sa mga sister.

Pagpadayag og Kasubo apan Dili Pagsalikway

Ang pornograpiya dili gamayng butang, ug sakit kaayo nga makahibalo nga ang tawo nga inyong gimahal adunay problema niini. Sulayi ang pagpasaylo kaniya, bisan pa unsa ka dugay kini molungtad. Hinumdumi usab nga ang pagpasaylo ug pagsalig lahi. Pinaagi sa iyang mga binuhatan ang imong igsoon makaangkon og balik sa imong pagsalig. Pagpakita og kasubo apan dili pagsalikway. Kinahanglan siyang mobati nga wala siya mag-inusara, ug kinahanglan nga siya manubag sa iyang mga binuhatan. Kon kamo nahigugma kaniya bisan pa sa pagkaadik, siya makakita og paglaum ug makakaplag og kalig-on sa pagbuntog sa problema.

Bethany A., edad 18, Arizona, USA

Awhaga Siya

Nasayud ko nga lisud kon kamo misalig pag-ayo sa usa ka tawo ug dayon iya kining giabusohan. Ang unang butang nga akong buhaton mao ang pag-ampo ug mohangyo sa Langitnong Amahan alang sa kalig-on sa pagpakigsulti sa imong igsoon. Mahimo kamong makig-istorya kaniya matag semana mangumusta kon unsa nay iyang gibuhat ug mangita og kasulatan sa inyong personal nga pagtuon sa kasulatan nga moawhag kaniya sa pagpangayo og tabang. Ang pagsuporta kaniya, bisan tuod nawad-an na siya sa imong pagsalig, importante kaayo. Pahibaloa siya nga ang Ginoo nahigugma kaniya ug mopasaylo kaniya. Pahinumdumi siya sa himno 187, “God Loved Us, So He Sent His Son.” Pahibaloa siya nga si Jesukristo miula sa atong mga sala, ug kon kita maghinulsol, kita makapalambo og gamay matag adlaw.

Naomi B., edad 16, Minnesota, USA

Suportahi Siya

Ipakita kaniya nga ikaw nahigugma kaniya bisan unsa pa ang iyang mga pagpili. Suportahi siya sa tanan niyang buhaton ug pahibaloa siya kon unsa ka kamalipayon nga siya naningkamot niini. Ang pagsalig dili dayon moabut sa makausa, apan naningkamot siya nga maangkon kini og balik. Siya anaa sa saktong dalan, ug samtang siya nakakat-on unsaon nga siya mahimong mas maayo, ikaw makat-on unsaon sa pagsalig niya og usab.

Kirstin M., edad 17, North Carolina, USA

Pagmapasayloon

Ang gahum sa Pag-ula, kon ikaw mogamit niini, makatabang sa imong igsoon nga makabaton og kalig-on sa paghinulsol. Ang Pag-ula makahatag og kaayohan alang niadtong nasakitan, ingon man usab niadtong kinsa mihimo sa makadaut nga mga pagpili. Pagmapasayloon kanunay ug pagmahigugmaon imbis nga masuko.

Seth B., edad 18, Missouri, USA

Pag-ampo alang sa Giya.

Luhod ug pangayo og giya gikan sa atong Langitnong Amahan ug pakigsulti sa imong igsoong lalaki ug pag-ampo uban kaniya. Samtang kita magmapainubsanon atubangan sa atong Langitnong Amahan, “dili niya itugot kamo nga pagapanulayon sa labaw sa inyong kaarangan, apan uban sa pagpanulay siya magatagana usab og lutsanan sa paglikay, aron kamo makahimo sa pag-antus niini” (1 Mga Taga-Corinto 10:13). Motabang siya sa imong igsoong lalaki nga mahimong lig-on batok sa tintasyon ug kanunay nga mopili sa matarung.

Alejandra B., edad 22, California, USA

Ayaw Pagpakawala og Paglaum

Ayaw pagpakawala og paglaum sa imong igsoon, tungod kay mao kini ang panahon nga nagkinahanglan siya sa iyang pamilya. Ang pagbuntog sa problema sa pornograpiya lisud na alang kaniya nga walay kabalaka nga mawala ang pagsalig sa iyang pamilya kaniya. Ako adunay susama nga problema, ug ako naningkamot sa paghinulsol aron mahimong takus nga mosulod sa templo aron mabugkos ngadto sa akong pamilya. Nahadlok ko kanunay kon unsay ikasulti sa akong mga ginikanan o unsaon nila ako sa pagtratar. Nasurprisa ako sa dihang akong nahibaloan nga sila mosuporta ug andam nga mohatag og solusyon sa pagtabang kanako nga mahimong mas maayo. Kon ang imong igsoon nakigkonsulta sa iyang bishop ug naghimo og matinuorong paningkamot, siya nakahimo og kalamboan.

Batan-ong lalaki gikan sa Alaska, USA

Salig sa Ginoo

Ang Pag-ula dili lamang alang sa atong mga sala apan alang usab sa atong mga kalisud ug mga paningkamot. Si Kristo nasayud gayud unsa ang inyong gibati—Siya mibati niini kaniadto. Duol ngadto Kaniya, ug kamo makakaplag sa Iyang kamot nga naghulat sa pagbayaw kaninyo. Pag-ampo alang sa Iyang tabang ug sa makaayo nga gahum sa Pag-ula. Sultihi ang Langitnong Amahan sa tanan ninyong mga problema, kabalaka, ug paglaum alang sa sitwasyon. Labing importante, ayaw lang paghulat og milagro nga mahitabo —lihok. Pagtuon sa kasulatan, pangitaa ang kaalam nga motabang kaninyo, ug padayon sa hugot nga pagtuo nga ang tanan mamaayo ra.

Megan A., edad 19, Arizona, USA

Ang mga tubag gituyo alang sa pagtabang ug panglantaw, dili isip usa ka opisyal nga mga pamahayag sa doktrina sa Simbahan.

Usa Ka Paagi sa Paghimo og mga Koreksyon

“Ang atong Langitnong Amahan nasayud sa wala pa kita mianhi sa yuta niining mortal nga pagpakabuhi nga ang negatibo nga mga pwersa motintal nato aron mahisalaag kita, ‘sanglit nakasala man ang tanan ug nakabsan sa himaya sa Dios’ (Mga Taga-Roma 3:23). Mao nga Siya nag-andam og paagi alang nato nga mohimo og mga pagkorihir. Pinaagi sa maloloy-ong proseso sa tinuod nga paghinulsol ug sa Pag-ula ni Jesukristo, ang atong mga sala mapasaylo ug kita ‘dili malaglag kondili may kinabuhing dayon’ (Juan 3:16). “

Presidente Dieter F. Uchtdorf, Ikaduhang Magtatambag sa Unang Kapangulohan, “Ang Kalainan sa Gamay nga mga Sayop,” Liahona, Mayo 2008, 57.

Umaabut nga Pangutana

“Unsay Angay Nakong Hunahunaon Panahon sa Sakrament?”

Isumiter ang inyong tubag inig Hulyo 15 sa liahona.lds.org, pinaagi sa e-mail ngadto sa [e-mail], o ipadala ngadto sa:

Liahona, Questions & Answers 7/13

50 E. North Temple St., Rm. 2420

Salt Lake City, UT 84150-0024, USA

Ang mga tubag tingali i-edit alang sa gitas-on o sa pagklaro.

Ang mosunod nga impormasyon ug pagtugot kinahanglan gayud nga ilakip sa inyong e-mail o sulat: (1) kompleto nga pangalan, (2) petsa sa pagkatawo, (3) ward o branch, (4) stake o district, (5) ang inyong sulat sa pagtugot, ug, kon kamo ubos sa 18 anyos, ang sulat sa pagtugot sa inyong ginikanan (ang e-mail dawaton) aron sa pagmantala sa inyong tubag ug litrato.