Fetongi Talanoa Fakafāmilí

Ne tokoni e holoholoʻanga lanu fakaʻofoʻofa ʻa Nená ke ne vahevahe ʻa e ngaahi talanoá mo Keiti (vakai, peesi 66–67). Ko ha vaʻinga ʻeni ʻe lava ʻo tokoni ki he kau mēmipa ho fāmilí ke nau fefakamatalaʻaki ha ngaahi talanoa!

Te ke fie maʻu:

• Ha ngaahi meʻa lanu taha. Feinga ke maʻu ha lanu kehekehe ʻe ono pe lahi ange. Te ke lava ʻo fakaʻaongaʻi ha ngaahi foʻi fakamaʻu, patapata ne vali, pe lole fakalanu.

• Ha kato ke faʻo ai e ngaahi meʻá.

Meʻa ke faí:

1. Fakafonu e saati ʻi he konga ki lalo ʻo e peesi ko ʻení ʻaki haʻo hiki ʻe lanu ʻo e meʻa takitaha he tafaʻaki ʻo e fehuʻi takitaha.

2. ʻAi e kau mēmipa ʻo e fāmilí ke nau tangutu fuopotopoto. Faʻo e fanga kiʻi meʻá ki he loto kató.

3. Paasi takai ʻa e kató ʻi he siakalé. ʻAi ke nau fetongitongi ʻi hono toʻo ha meʻa mei loto mo tali e fehuʻi ʻoku hoa mo e lanu ʻo e meʻa ne nau filí. Hokohoko atu pē kae ʻoua kuo ʻikai ha toe meʻa ke fili.

Saati Fetongi ʻo e Talanoa Fakafāmilí

Te ke lava ʻo manatuʻi e ngaahi talanoa kehekehe naʻe fai ʻe he kakaí ki he lanú takitaha?

	Fakamatala mai kau ki ho kaungāmeʻa lelei tahá.
	Ko e fē ha taimi naʻá ke toʻa ai?
	Fakamatala mai kau ki ha meʻa ngalivale pe fakamā naʻe hoko kiate koe.
	Ko e hā ʻa e talanoa folofola ʻokú ke saiʻia taha aí? Ko e hā hono ʻuhingá?
	Fakamatala mai kau ki ha ngāue fakaako naʻe fakaoli ke ngāue ki ai.
	Kapau te ke lava ʻo liliu ki ha faʻahinga monumanu, ko e hā e manu ko iá pea mo hono ʻuhinga ʻokú ke fili aí?

Tā fakatātaaʻi ʻe Brad Teare