Teke ʻe he Tuí
ʻOku nofo ʻa e taha naʻá ne faʻú ʻi Kalolaine Tokelau, USA.
He ʻikai toe ngalo ʻiate au ʻeku ʻaʻeva ʻi he kelekele ʻo e Nofoʻanga Fakafaʻahitaʻu Momokó ʻi Nepulasikā ʻi he USA, ʻa ē ne nofo ai e kau paioniá he ngaahi taʻu ki muʻá. Naʻe ongo mamalu ʻa e kelekelé, ʻo meimei hangē haʻaku ʻaʻahi ki ha temipale ʻi tuʻá.
Naʻá ku tangi, ʻo nenefu ai ʻeku sió. Naʻá ku mamata ki ha maka fakamanatu ka naʻe ʻikai ke u fakapapauʻi pe ko hai. Ko e taimi ne u holoholoʻi ai hoku loʻimatá, naʻá ku fakatokangaʻi ha tangata mo ha fefine naʻá na fofonga loto mamahi ʻaupito. Pea ʻi heʻeku vakaiʻi fakaleleí, naʻá ku fakatokangaʻi ha fōtunga ʻo ha valevale ʻoku tokoto he loto faʻitoka ʻi hona veʻe vaʻé.
Naʻe ʻomi ʻe he ʻatá ni kiate au ha ngaahi ongo kehekehe: mamahi, ʻita, houngaʻia, mo e fiefia. Naʻá ku fie toʻo ʻa e mamahi ne ongoʻi ʻe he Kāingalotu ko iá, ka naʻá ku houngaʻia ʻi he taimi tatau ʻi he meʻa ne nau feilaulauʻi maʻá e ongoongoleleí.
Ne tokoni e meʻa ne u aʻusia ʻi he Nofoʻanga Fakafaʻahitaʻu Momokó ke u ʻiloʻi ʻoku foaki ʻe he Tamai Hēvaní ʻa e ongoongoleleí ki Heʻene fānaú pea tukuange ʻa e tauʻatāiná ke nau fili ʻa e meʻa te nau fai ʻaki iá ʻo fakatatau mo honau lotó. Naʻe mei lava pē ke fili ʻe he mātuʻa ʻa e kiʻi pēpē ko iá ha hala ʻoku faingofua angé. Naʻe fie maʻu ʻi he muimui ki he palōfitá mo hono moʻui ʻaki ʻo e ongoongoleleí ke tuiaki atu ʻa e kau paionia ko ʻení, ʻo aʻu ai pē ki hono tanu ʻena kiʻi tamasiʻí. Ka naʻá na fili ʻa e ongoongoleleí ki heʻena moʻuí mo tali ʻa hona ngaahi faingataʻaʻiá. Naʻá ku ʻilo ko e līʻoa ʻa e Kāingalotú ki he ongoongoleleí pea mo ʻenau loto fakapapau ke tuiaki atú naʻe teke ia ʻe he tuí mo e ʻamanaki leleí—ko ha ʻamanaki lelei ki ha kahaʻu lelei pea mo ha tui ʻoku ʻafioʻi ʻe he ʻEikí kinautolu mo malava ke fakamaʻamaʻa ʻenau mamahí.
Fakatamaki ʻi he Nofoʻanga Fakafaʻahitaʻu Momokó, tā ʻe Avard Fairbanks © IRI; ngaahi tā fakatātāʻí ʻe Bryan Beach