Lea ʻa ʻEletā Kuki ki he Kāingalotu mo e Kau Fiefanongo ʻi ʻAivolī Kousí

Fai ʻe R. Scott Lloyd

Ongoongo ʻo e Siasí

Naʻe folau ʻa ʻEletā Kuenini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ki ʻApitasani, Kouti ti ʻAivolī (ʻAivolī Kousi), ʻi Fēpueli 2013. Lolotonga e ʻaʻahí naʻá ne puleʻi ha konifelenisi fakatakimuʻa ʻo e lakanga fakataulaʻeikí, fai ha fakataha makehe mo e kāingalotú mo e kau fiefanongó, pea ʻaʻahi ki he kau ʻōfisa māʻolunga ʻo e puleʻangá.

Naʻe folau fakataha ʻa ʻEletā Kuki mo ʻEletā L. Uitenī Keleitoni ʻo e Kau Palesitenisī ʻo e Kau Fitungofulú; ʻEletā Sione B. Tikisoni ʻo e Kau Fitungofulú, pea ko e Palesiteni ʻo e ʻĒlia ʻAfilika Hihifó; pea mo ʻEletā Siosefa W. Sitati ʻo e Kau Fitungofulú, pea ko e Tokoni ʻUluaki ʻo e Kau Palesitenisī ʻi he ʻĒlia ʻAfilika Hihifó.

Ko hono fakakātoa ʻo e kau maʻu fakataha ʻi he konifelenisi fakatakimuʻa ʻo e lakanga fakataulaʻeikí mo e kau maʻu fakataha he fakataha ʻa e kāingalotú mo e kau fiefanongó naʻe toko 9,693, ʻa ia naʻe kau ki ai e kau fiefanongo ʻe toko 619. Naʻe feilaulau lahi e kāingalotu tokolahi ke nau kau ki ai. Naʻe pehē ʻe Veisinia ʻOulai Tongo ʻo e Kolo Meanguí, Misiona Kouti ti ʻAivolī ʻApitasaní, naʻe tātānaki ʻe hono fāmilí ʻenau paʻangá ke nau omi ʻo mamata ʻi ha ʻAposetolo. Naʻá ne pehē, “Naʻa mau fononga mai he houa ʻe 12, ka ʻoku ou fiefia.”

Naʻe lipooti ʻe he tokolahi naʻa nau kau atu ki he konifelenisí ʻa e fakakoloa fakaofo ʻo e Laumālié naʻa nau fiefia aí. Naʻe pehē ʻe Pīsope Leone Kouatio ʻo e Uooti Tokui, Siteiki Kokotií, “ʻOku ou ʻilo naʻe ʻi heni mo kitautolu ʻi hotau lotolotongá ha tamaioʻeiki maʻongoʻonga ʻa hotau Fakamoʻuí.”

Kuo tupulaki e memipasipi ʻo e Siasí ʻi Kouti ti ʻAivolī mei he fāmili ʻe taha ʻi he 1984 ki he ngaahi siteiki ʻe nima mo e vahefonua ʻe taha he ʻahó ni.

ʻI he ngaahi taʻu kuo toki ʻosí naʻe tautautefito hono fakahaaʻi e faivelenga ʻa e Kāingalotu ʻAivolií ʻi heʻenau ngāue ʻi he hisitōlia fakafāmilí mo e ngāue fakatemipalé. ʻOku kau e ngaahi siteiki Kouti ti ʻAivolī ʻe tolu mei he ngaahi siteiki ʻe nimá he ngaahi siteiki ʻe 25 ʻo e Siasí ʻoku māʻolunga taha ai e peseti ʻo e kakai lalahi ʻoku nau fakahū ha ngaahi hingoa fakafāmili ki he ngaahi ouau fakatemipalé lolotonga e 2012. ʻI he kotoa ʻo e ngaahi siteiki ʻo e Siasí, ʻoku maʻu ʻe he Siteiki Kokotií ʻa e peseti māʻolunga taha ʻo e kakai lalahi kuo nau fakahū ha ngaahi hingoa ki he ngāue fakatemipalé ʻi ha taimi ʻe taha pe taimi kehekehe.

ʻOku kau foki ki ai mo e toʻu tupú. Ko e peseti ʻo e kakai kei talavou ʻo ʻAivolī ʻoku nau fai ʻa e fakahokohoko fakamotuʻaleá ʻoku liunga ua hono tokolahí ʻi he ʻavalisi ʻo e Siasí, neongo ʻa e foʻi moʻoni ko ia ʻoku ʻikai ha taha ʻiate kinautolu ʻe ʻi ai haʻane komipiuta fakatāutaha mo ʻInitaneti ka kuo pau ke ʻalu ki he senitā hisitōlia fakafāmili fakasiteikí ke fai ai ʻa e ngāué.

Kuo akoʻi e kāingalotú ko e ngāue hisitōlia fakafāmilí ko ha konga mahuʻinga ia ʻo hono moʻui ʻaki e ongoongoleleí. ʻOku nau ngāue mālohi ke teuteuʻi ha ngaahi hingoa fakafāmili kimuʻa pea nau toki heka he pasí ʻi ha fononga lōloa ki he Temipale Kana ʻAkalaá—pea ko e angamahení ʻoku ʻikai ko ha ngaahi hingoa siʻisiʻi pē ʻoku ʻavé, ka ko e ngaahi hingoa lahi.

Naʻe poupouʻi ʻe ʻEletā Kuki mo ʻEletā Keleitoni ʻa e Kāingalotú ke nau laka ki muʻa ʻi he ngaahi tafaʻaki lalahi ʻe fā: ko hono fakatupulaki ʻenau tui ki he ʻEiki ko Sīsū Kalaisí, fakamālohia honau fāmilí, faivelenga ʻi hono vahevahe ʻo e ongoongoleleí mo e niʻihi kehé, pea hokohoko atu ʻenau ngāue ʻi he hisitōlia fakafāmili fakaofó mo e ngaahi ngāue fakatemipalé.

Ko e lea ʻa ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá ki he lauiafe naʻe fakatahataha ʻi ʻApitasani, Kouti ti ʻAivolī, ʻi Fēpueli.