ʻOku ʻIkai ha Mahuʻinga ia Ki he Fiefiá

Abelino Grandez Castro, Pelū

Naʻá ku ʻalu kimuí ni ki he pangikeé ke toho ha paʻanga ke totongi ʻaki ʻeku kau ngāué. Naʻá ku kole ange ki muʻa pea ʻomai ʻe he taha ngāué e paʻanga naʻá ku tohó ke ne liliu ha paʻanga pepa solo ʻe 200 ke taki solo ʻe 50. Naʻe liliu ʻe he taha ngāué ʻeku paʻangá, ka naʻe hangē kiate au naʻá ku fakatokangaʻi naʻe fehalaaki ʻi he taimi naʻá ne lau ai e paʻanga pepá.

Naʻá ne ʻomi kiate au ha paʻanga pepa taki solo ʻe 50, pea naʻá ku kiʻi holomui ʻo talitali ke maʻu e paʻanga naʻá ku tohó. ʻI heʻeku talitalí, naʻá ku lau ʻa e paʻangá. Naʻá ku ʻoange ki he taha ngāué ha solo ʻe 1,200 ka naʻá ne fakafoki mai kiate au ha solo ʻe 2,200—ʻo lahi ʻaki ia ha solo ʻe tahaafe. Naʻe fakataueleʻi au ʻi he momeniti ko iá. Naʻá ku fakakaukau ʻiate au ʻoku maʻu ʻe he pangikeé ha paʻanga lahi. Ka naʻe ʻilo ʻe hoku lotó ʻoku ʻikai ko ha paʻanga ʻeni ʻaʻaku; kuo pau ke u fakafoki.

ʻOsi ha ngaahi momeniti siʻi kuo ui mai au ʻe he taha ngāué ke fakaʻosi ʻeku toho paʻangá. Naʻá ne lau e paʻanga naʻá ku tohó, pea ʻi heʻene mono mai kiate au e paʻangá, naʻá ne ʻeke mai, “ʻOku ʻi ai mo ha toe meʻa?”

Naʻá ku talaange, “ʻIo.” “Naʻá ku ʻoatu ʻa e solo ʻe 1,200 ke liliu ki ha ngaahi lauʻi paʻanga iiki ange, ka naʻá ke fakafoki mai ha solo ʻe 2,200.”

Naʻá ku fakafoki ange leva ki ai ʻa e solo ʻe 2,200. Naʻe tetetete hono nimá ʻo ne lau tuʻo ua ʻa e paʻangá. Naʻe ʻikai ke faʻa-faʻa-tui ki he meʻa naʻe sio ki aí. Naʻe sio mai kiate au mo feinga ke lea, ka ko e meʻa pē naʻá ne lavá ko haʻane pehē tuʻo ua mai, “Mālō ʻaupito.”

Naʻá ku mavahe fiefia mei he pangikeé. Naʻá ku teuteu ʻi he uike ko iá ha lēsoni ki he kau talavou ʻi hoku uōtí fekauʻaki mo hono ikunaʻi ʻo e fakatauelé. Ko ha meʻa fakaʻofoʻofa ke te lava ʻo vahevahe mo kinautolu e meʻa ne u aʻusia ʻi he pangikeé.

Naʻe fakakata ha niʻihi, “Mahalo ʻokú ke vale.” “Ko e solo ia ʻe taha afe naʻá ke fakafokí!”

Naʻá ku tali katakata pē, “ʻOku ʻikai ha mahuʻinga ia ki he fiefiá.”

ʻOku ou fakamālō ʻi he aʻusiá ni, he kuó ne fakamālohia fakatouʻosi ʻeku fakamoʻoní mo e fakamoʻoni ʻa e kau talavoú fekauʻaki mo hono mahuʻinga ʻo e ikunaʻi e fakatauelé.