Maʻá e Fānau Īkí
ʻOku Ui ʻe Sīsū ʻEne Kau Ākongá
Mei he Luke 5:1–11.
Ko Saimone mo ʻAniteluú ko ha ongo tautehina toutai. ʻI ha pō ʻe taha, ne toutai ai ʻa Saimone mo ʻAnitelū he poó kakato ka naʻe ʻikai maʻu ha mataʻi ika.
Naʻe ʻi he vaka ʻo Saimoné ʻa Sīsū. Naʻá ne folofola ange ki he ongo tautehiná ke toe ʻaʻau hona kupengá ki tahi. Ko e taimi naʻá na fusi hake ai hona kupengá, naʻe fonu ia ʻi he iká!
Ne ui leva ʻe Saimone mo ʻAnitelū hona ongo kaungāmeʻa ko Sēmisi mo Sioné ke na tokoni ʻi hono huʻi e kupengá ki hona vaká. Naʻe lahi fau ʻa e iká ʻo fakafonu ai ha vaka ʻe ua! Naʻe fakahā ʻe Sīsū ki he kau tangatá kapau te nau muimui ʻiate Ia, te nau toutaiʻi ha faʻahinga meʻa ʻoku lelei ange ʻi he iká. Te nau hoko ko e kau toutai tangata.
Naʻe liʻaki ai ʻe Saimone, ʻAnitelū, Sēmisi mo Sione ʻa e meʻa kotoa, kau ai honau ngaahi vaká. Ne nau hoko ko e kau ākonga ʻa Sīsū. Naʻa nau muimui ʻia Sīsū mo tokoni kiate Ia ʻi hono malangaʻi ʻo e ongoongoleleí ki he taha kotoa pē.
Pea hangē tofu pē ko ha taha toutai ʻokú ne taki mai e iká ki he kupengá, te tau lava ʻo tokoni ke ʻomi ʻa e kakaí ki he ongoongoleleí ʻaki haʻatau hoko ko ha kau faʻifaʻitakiʻanga lelei mo akoʻi kinautolu kau kia Sīsū. Te tau lava mo kitautolu ʻo hoko ko ha kau toutai tangata!
Tā fakatātaaʻi ʻe Apryl Stott