Kau Moʻungaʻi Kakai Fakalaumālié

Vikitā W., USA

Naʻe ō mai e kau moʻungaʻi kakai ʻo e taʻu ní ke ʻaʻahi ki homau ʻapí ʻi he ngaahi pō Mōnité! Naʻe meimei fōtunga tatau ʻa e kau moʻungaʻi kakaí takitaha, mo ha mēmipa ʻo e fāmilí, ʻi ai hano mālohi makehe, mo ne akoʻi ha lēsoni fakamoʻoni mahuʻinga naʻá ne fakalotolahiʻi kimautolu ke fakaleleiʻi homau vā fetuʻutakí.

Hangē ko ʻení, naʻe akoʻi kimautolu ʻe he Tangata Ongoongó ʻi ha uike ʻe taha he founga ke taʻofi ai homau matá mei he ngaahi heleʻuhila, TV, mo e ngaahi makasini taʻe-tāú. Ko ha uike kehe ʻe taha naʻe fakamatalaʻi ai ʻe he Fefine Fakamālohisinó e founga te mau lava ai ʻo fakatupulaki ha ivi lahi ʻaki haʻamau fakamālohisino maʻu pē. Ko Pei Sitilā, ko ha moʻungaʻi tangata naʻe teuteu hangē ha honé, naʻá ne akoʻi kimautolu he founga ke tuku ai ʻemau longoaʻa takaí ka mau ʻapasia ʻi he lotú pea ʻi ʻapi. Naʻe fakamatalaʻi ʻe he Taʻahine ʻo e Folofolá e founga te mau lava ai ʻo fefakahīkihikiʻakí. Naʻe kau foki mo e Taʻahine Fakamāloó, Tama Fakahoko pe Ia ʻe Koé, Mataotao ʻo e Folofolá, Fefine ʻo e ʻIkai Sio-laló, Tangata Faifekaú, pea mo ha kau moʻungaʻi tangata kehe ʻi heʻemau ngaahi lēsoni efiafi fakafāmili ʻi ʻapí.

ʻOku ou fakamālō ʻi hono fakakaukauʻi mo fakalelei lahi ʻe he kau mēmipa hoku fāmilí ʻa e faʻahinga palopalema ʻi he fāmilí te nau lava ʻo fakamatalaʻi ʻi heʻenau hoko ko e kau moʻungaʻi kakaí. Naʻa mau nofo-ʻamanaki kotoa ki he efiafi fakafāmili ʻi ʻapí, pea naʻa mau maʻu ha taimi fiefia ʻi he lolotonga ʻo e ʻaʻahi mai ʻa e kau moʻungaʻi kakaí takitaha. ʻOku ou fakamālō he ko e taimi kotoa pē naʻa mau fakakaukauʻi ai ha palopalema ʻi homau fāmilí, naʻe ueʻi kimautolu ʻe he Tamai Hēvaní ʻaki ha foʻi fakakaukau ke mau feakoʻiʻaki lelei ange. Ko e ngaahi manatu ʻeni ʻo e kau moʻungaʻi kakaí te mau fakamahuʻingaʻi ʻo taʻe ngata.