Fakamāmaʻi ʻi he Fakapoʻulí

Helisa S., Palāsila

He ʻikai teitei ngalo ʻiate au ʻa e lēsoni efiafi fakafāmili ʻi ʻapi ne mau fai he lolotonga e mate ʻa e ʻuhilá. Naʻe ʻikai ke mau lava ʻo lau ha meʻa ʻi he ʻikai ke ʻi ai e ʻuhilá, pea naʻá ku fakakaukau ʻe fehalaaki e meʻa kotoa ʻi he efiafi fakafāmili ʻi ʻapi ko iá.

“ʻE anga fēfē haʻamau fai ha efiafi fakafāmili ʻi ʻapi kae ʻikai ke mau lava ʻo lau ha pōpoaki mei he Liahoná, pe ʻe anga fēfē haʻamau hiva mei he ngaahi tohi himí taʻe ʻi ai ha maama?” Naʻá ku fakakaukau pē kiate au.

Meʻa-mālie he naʻe tokoniʻi kimautolu ʻe hoku tuofefiné. Naʻá ne maʻu e fakakaukau lelei ke mau hivaʻi ha ngaahi himi ʻoku mau maʻu-loto pea mau vahevahe ʻa e meʻa ne mau ako ʻi he Sāpate kimuʻá. Naʻa mau fakamatala kotoa ha tefitoʻi moʻoni pea mo feakoʻaki. Ko ʻeku fakakaukaú, ko e ako fakatahá ko e taumuʻa ia ʻo e efiafi fakafāmili ʻi ʻapí. ʻOku ou tui pau naʻe hōifua ʻa e ʻEikí ʻi heʻemau tauhi ʻa e fekau ke fakahoko ha efiafi fakafāmili ʻi ʻapí, neongo e ʻikai ha māmá.

ʻOku ou ʻilo ʻoku ʻikai finangalo e ʻEikí ia ke tau foki toko taha atu ki Hono ʻaó. ʻOkú Ne fie maʻu ke tau foki atu mo hotau ngaahi fāmilí, pea ʻokú Ne fie maʻu ke tau fai e meʻa kotoa pē ʻoku tau lavá koeʻuhí ke hoko ʻeni, kau ai hono fakahoko fakauike ʻo e efiafi fakafāmili ʻi ʻapí.