ʻI he Fonongaʻangá

Ngaahi Faingataʻa ʻi Mīsulí

Fai ʻe Jennifer Maddy

Haʻu ke tau vakaiʻi ha feituʻu mahuʻinga ʻi he hisitōlia ʻo e Siasí!

Naʻe hoko ʻa e fononga mei Ketilani ʻi ʻŌhaiō, ki Tauʻatāina ʻi Mīsulí, ko ha fononga lōloa mo faingataʻa kia Siosefa Sāmita. Naʻe fononga saliote, vaka ʻi he kanalí, pea ʻi ha saliote totongi. ʻI he maile ʻe 250 (402 km) fakaʻosí, naʻe pau ai ke luelue! Ka naʻe folofola ange ʻa e ʻEikí kiate ia ke ʻalu ki Mīsuli ke fokotuʻu ʻa e kolo ko Saioné, pea naʻe talangofua ʻa Siosefa.

Naʻe kamata tūʻuta atu mo ha kau mēmipa kehe ʻo e Siasí ki Mīsuli ʻi he 1831. Naʻa nau palau ʻa e kelekelé, langa ha ngaahi fale, pea mo utu ʻa e ngoué.

ʻI he fakaʻau ke toe tokolahi ange e kāingalotu ʻo e Siasí ne hiki ki Tauʻatāina ʻi Mīsulí, ne kamata ke huʻuhuʻu mo ʻita ha niʻihi ʻo e kakai naʻe ʻosi nofo aí. Naʻe ʻohofi ʻe ha kau fakatanga ʻa e ngaahi ʻapi ʻo e Kāingalotú mo tuʻutuʻuni ke nau mavahe.

Taá naʻe fai ʻe Jennifer Maddy; tā fakatātaaʻi ʻe Paul Mann

ʻOku fakahaaʻi ʻe he fakatātā ko ʻeni ʻi he senitā takimamata ʻi Tauʻatāiná ʻa e femoʻuekina ʻa e Kāingalotú ʻi honau ngaahi fale ʻakaú.

Naʻe fokotuʻu ʻe Uiliami W. Felipisi ha fale paaki ʻi Tauʻatāina, ʻo ne pulusi ai ha nusipepa. Naʻá ne toe pulusi foki mo ha ngaahi peesi ʻo e Tohi ʻo e Ngaahi Fekaú, ʻa ia naʻe ʻi ai ha niʻihi ʻo e ngaahi fakahā naʻe fai ʻe he ʻEikí ki he Palōfita ko Siosefa Sāmitá. ʻOku maʻu he ʻahó ni ʻa e ngaahi fakahā ko ʻení ʻi he Tokāteline mo e Ngaahi Fuakavá.

Fale Fakapōpula Lipetií

Naʻe takipōpula ʻi he faʻahitaʻu momoko ʻo e 1838 ʻa Siosefa Sāmita mo ha kau taki kehe ʻe toko nima ʻo e Siasí ʻi ha tukuakiʻi loi pea ʻave ki he Fale Fakapōpula Lipetií. Ko e fale fakapōpulá naʻe fakapoʻuli, ʻuli, mo fuʻu momoko, pea naʻe ʻikai ke maʻu ʻe he kau pōpulá ha sipi kafu māfana feʻunga pe ha meʻakai lelei. Ko e Fale Fakapōpula Lipetií naʻe matolu hono holisi maká. Ko e loki ʻi ʻolungá naʻe maʻu ia ʻe he pule pōpulá mo hono fāmilí, pea ko e loki ʻi laló—ʻa e “lalo falé”—maʻá e kau pōpulá. Ko e hūʻanga pē ki loto mo tuʻa ʻi he lalo falé ko ha kiʻi matapā he falikí.

Naʻe folofola ʻa e ʻEikí lolotonga e ʻi he fale fakapōpulá ʻa e Palōfitá, “ʻOua te ke manavahē ki he meʻa ʻe lava ʻe he tangatá ke faí, koeʻuhí he ʻe ʻiate koe ʻa e ʻOtuá ʻo taʻengata pea taʻengata” (T&F 122:9).

Kuo toe langa ʻe he Siasí ʻa e fale fakapōpulá mei ha niʻihi ʻo e ngaahi maka ne toe ngaohi pea langa takai mo ha senitā takimamata ai. ʻOku ō mai ha kau ʻaʻahi tokolahi he ʻahó ni ke mamata ʻi he feituʻu naʻe maʻu ai ʻe he palōfita ʻa e ʻOtuá ha ngaahi fakahā fakanonga ʻi he lolotonga ʻene nofo pōpulá.

Taá naʻe fai ʻe Jennifer Maddy; tā fakatātaaʻi ʻe Paul Mann