Muimui ʻi he Palōfitá
Fakahaofi e Taʻahiné!
Ko e faʻahitaʻu māfana kotoa pē, ʻoku nofo ai e fāmili Monisoní ʻi ha māhina ʻe ua ʻi honau fale fakafāmili he Vaitafe Polovó. Naʻe ako ʻa Tomi Monisoni ke kakau ʻi he mataʻau tafe mālohi ʻo e vaitafé. ʻI ha hoʻatā māfana ʻe taha ʻi he kei taʻu 13 nai ʻa Tomí, naʻá ne toʻo ai ha fuʻu foʻi leta-loto lahi kuo ʻosi fakafonu ʻea pea tētē atu ʻi he vaitafé.
Naʻe fakatahataha ha kakai ʻi he ʻaho ko iá ki he feituʻu faiʻanga kaimeʻakai he veʻe vaitafé ke kai mo vaʻinga. Naʻe ʻamanaki ke tētē atu ʻa Tomi ʻi he feituʻu tafe mālohi taha ʻo e vaitafé, feʻunga mo haʻane fanongo ki ha kaikaila, “Fakahaofi e taʻahiné! Fakahaofi e taʻahiné!” Ne tō ha kiʻi taʻahine ki he loto pupuʻa mālohi tahá. Ne hala ha taha ʻi he kakai he kauvaí ʻe lava ke kakau ʻo fakahaofi e taʻahiné.
Ko e taimi ia naʻe ʻasi mai ai ʻa Tomi ʻi he feituʻú ʻo fakatokangaʻi e pulia hifo e ʻulu ʻo e taʻahiné ki he loto vaí. Ne kakapa atu e nima ʻo Tomí, puke e taʻahiné ʻi hono louʻulú, pea fusi hake ia ʻi he tafaʻaki ʻo e foʻi leta-lotó. Hili ia pea toki kakau mai ʻa Tomi ki he kauvai ʻo e vaitafé. ʻUluaki, naʻe fāʻofua ʻa e fāmilí ki he taʻahiné, ʻuma pea mo tangi. Pea nau toki kamata ke fāʻofua mo ʻuma kia Tomi. Naʻá ne ongoʻi mā ʻi he tokanga kotoa kuo fai angé, pea foki vave leva ia ki heʻene foʻi leta-lotó.
ʻI he hoko atu ʻo e tētē ʻa Tomi ki he tuliki ʻo e vaitafé, naʻe fakafonu ʻaki ia ha ongoʻi māfana. Naʻá ne fakatokangaʻi kuó ne tokoni ʻo fakahaofi ha moʻui. Naʻe ongona ʻe he Tamai Hēvaní ʻa e kaila, “Fakahaofi e taʻahiné! Fakahaofi e taʻahiné!” Naʻá Ne fakafaingofuaʻi ke tētē ofi atu ʻa Tomi ʻi he taimi totonu naʻe fie maʻu aí. Naʻe ʻilo ʻe Tomi ʻi he ʻaho ko iá ko e ongo fakafiefia tahá ke ʻiloʻi, ʻoku ʻafioʻi ʻe he ʻOtua ko ʻetau Tamai Hēvaní kitautolu fakatāutaha mo tuku ke tau tokoni ʻo fakahaofi ha niʻihi.
Tā fakatātaaʻi ʻe Jennifer Tolman; tā fakatātā siʻisiʻí ne fai ʻe Hollie Hibbert