Faitotonú mo e Angatonú

ʻOku pehē ʻe ʻEletā Kulisitofeli Kouliteni ko e Siʻí ko e faitotonú mo e angatonú ʻokú na “fie maʻu ha taha ke ne fakahoko mo lea maʻu ʻaki pē ʻa e meʻa ʻoku totonú ʻo tatau ai pē pe ko e hā ʻa e ngaahi tūkungá pe fakakaukau ʻa e niʻihi kehé.” ʻo e Kau Fitungofulúʻ i he fakamatala he peesi 48–49 ʻo e makasini e māhina ní.

ʻOku fakamatala ʻa e kongá ni fekauʻaki mo ha meʻa naʻe hoko ʻi he moʻui ʻa ʻEletā Siosefa B. Uefilini (1917–2008) ʻo e Kōlomu ʻo e Kau ʻAposetolo ʻe Toko Hongofulu Mā Uá. Naʻe vaʻinga ʻa ʻEletā Uefilini ʻi ha tau hau ʻi he ʻakapulu faka-ʻAmeliká ʻi he taimi naʻe hoko ai ko e taha ako ʻi he kolisí. Naʻe foaki atu ki ai ʻa e foʻi pulú, pea ʻoho atu, ka naʻá ne nounou ʻaki ha ʻinisi ʻe 2 (senitimita ʻe 5) mei he laine tataʻó. Naʻá ne manatuʻi e lea ʻa ʻene faʻeé ʻoku totonu ke ne fai maʻu pē e meʻa ʻoku totonú ʻi heʻene tokalalo ʻi he kau vaʻingá, pea ʻikai leva ke ne tekeʻi atu e foʻi pulú ki muʻa. Naʻá ne tuku pē e foʻi pulú he feituʻu naʻe ʻi aí.

ʻE lava ke tokoni ʻa e ngaahi fokotuʻu ko ʻení, fakataha mo hoʻo tā-sīpingá, ke ke akoʻi hoʻo fānaú kau ki he ngaahi tefitoʻi moʻoni ʻo e ongoongoleleí.

Ngaahi Fokotuʻu ki hono Akoʻi ʻo e Toʻu Tupú

Lau mo hoʻo kau taʻu hongofulu tupú ʻa e konga fekauʻaki mo e faitotonú mo e angatonú ʻi he Ki Hono Fakamālohia ʻo e Toʻu Tupú. Aleaʻi ʻa e ngaahi tāpuaki ʻo e faitotonú mo e angatonú.
Fakakaukau ke ke kole ki he kau taʻu hongofulu tupú ke nau tokoni ʻi hono teuteu ha kiʻi sivi “Ko e Hā Te u Faí?” kiʻi sivi maʻá e efiafi fakafāmili ʻi ʻapí. Fakaʻaongaʻi ʻa e Ki Hono Fakamālohia ʻo e Toʻu Tupú ke hoko ko ha fakahinohino pea lisi ʻa e ngaahi tūkunga te ne ʻoange ki ha taha ha faingamālie ke ne fakafōtunga ai ʻa e faitotonú mo e angatonú. Fakahoko fakafāmili ʻa e kiʻi siví pea aleaʻi hono olá.
Kuo tā-tuʻolahi e faʻa meʻa ʻa Palesiteni Tōmasi S. Monisoni fekauʻaki mo e faitotonú. Kumi ha taha ʻo ʻene ngaahi pōpoakí pea vahevahe ia mo ho fāmilí. Ko ha ngaahi pōpoaki ʻeni ʻe malava ke fakaʻaongaʻi:

“[Ko e] Palōfita ko Siosefa Sāmitá: Ko ha Faiako ʻi he Faʻifaʻitakiʻanga,” Liahona, Nōvema 2005, 67.

“Happiness—the Universal Quest,” Liahona, Māʻasi 1996, 2.

“[Ko e Fekumi ki he Moʻui Tuʻumālié,” Tūhulu, ʻAokosi 1988, 2.

Ngaahi Fokotuʻu ki hono Akoʻi ʻo e Fānaú

ʻOku kau ʻi he angatonú ʻa e faitotonu ʻiate koe peé. Koeʻuhí ke fakamahinoʻi ʻeni, fakakaukau ke fai ha lēsoni efiafi fakafāmili ʻi ʻapi ʻoku tuku ai ha meʻa lelei ʻi muʻa ʻi he fānaú. Talaange he ʻikai ke nau lava ʻo kai ia kae ʻoua kuó ke talaange. Hili ia peá ke kuikui pe haʻi ho matá mo ke fehuʻi ange, “ʻOku sai pē nai ke ke kai ʻa e meʻa leleí he taimí ni, koeʻuhí he ʻoku ʻikai ke u lava ʻo sio?” Talanoa ki ha ngaahi meʻa māʻoniʻoni te nau lava ʻo fai ʻi he taimi ʻoku ʻikai ke sio ai ha tahá, ʻo hangē ko e lotu fakafoʻituituí. Fakamanatu ange kiate kinautolu ʻe lava maʻu pē ʻa e Tamai Hēvaní ʻo ʻafioʻi kinautolu.
Fakakaukau ke ke fakaʻaongaʻi e kiʻi sivi naʻe faʻu mo hoʻo kau taʻu hongofulu tupú (vakai ki ʻolunga), pe ko hano faʻu ha kiʻi sivi ʻo fakatatau mo e fānau kei īkí ʻa ia ʻe tokoni ke nau ʻilo ai pe ko e hā ʻa e faitotonú pe taʻe-faitotonú. Tuku ke nau aleaʻi ʻenau ngaahi talí. Kapau ʻokú ke fakatou maʻu ha kau taʻu hongofulu tupu mo ha fānau kei iiki ange, fakakaukau ke ʻai ʻa e kau taʻu hongofulu tupú ke nau tokoniʻi ʻa e fānau iiki angé ʻi he kiʻi siví.

Tā fakatātaaʻi ʻe Taia Morley