Ko ha Fāmili Taʻengata

Kellee H. Mudrow, ʻIutā, USA

ʻI hoku taʻu 19, naʻá ku ʻeva fakaʻosi ai ki heʻeku ongo kuí kimuʻa peá u toki ʻalu ʻi ha folau tokoni ʻofa fakaetangata māhina ʻe tolu ki ʻEkuatoa. Naʻe ʻosi hiki ʻeku kui tangatá ki ha senitā tokoni ki he moʻuí koeʻuhí naʻe hōloa siʻene moʻuí. Naʻe mole ʻene manatú fakataha mo ha ngaahi mahaki fakaesino kehe ʻoku fekauʻaki mo e taʻu motuʻá.

Ko e taimi naʻá ku hū atu ai mo hoku fāmilí ki he fale tokoni ki he moʻuí, naʻá ku mamahi, ʻi heʻeku ʻilo ʻoku ngalingali ko ʻeku ʻaʻahi fakaʻosi pē ʻeni ki heʻeku kui tangatá. Naʻá ku ʻilo ʻe hiki atu he lolotonga ʻo ʻeku folaú, pea naʻá ku ongoʻi halaia ʻi heʻeku ʻalú.

Kimuʻa pea mau hū ki hono lokí, ne ʻosi hiki ʻe ha taha ngāue ʻeku kui tangatá ki ha saliote teketeke. Naʻa mau teke mai leva ia ki he feituʻu feohiʻanga ʻo e falé. Naʻe talanoa ʻeku faʻeé ki ha taha ʻo e kau ngāué ka u talanoa au mo hoku tokoua taʻu 16 ki heʻema kui tangatá.

Naʻe ʻikai ke tonu ʻene fakakaukaú. Naʻe mahino e hōloa siʻono tuʻunga fakaʻatamaí pea naʻe hangē naʻe puputuʻú. Ko e taimi naʻá ma ʻeke ange ai pe ʻoku toko fiha hono makapuná, naʻe hala ʻene talí. Pea ne ma fakamataliliʻi leva ia ʻi ha founga ʻofa pē ʻi heʻema talaange ʻa e tokolahi totonu ʻokú ne maʻú.

Naʻe ongo ki hoku lotó siʻono tuʻungá. Ka, ʻi he lolotonga ʻene puputuʻú mo ʻene tali hala ʻema ngaahi fehuʻí, fakafokifā pē kuo pehē mai ʻeku kui tangatá, “Ko ha fāmili taʻengata.”

Naʻá ku ʻohovale. Naʻe ʻikai mahino ia ki he taha ngāue ofi maí ʻa e meʻa naʻá ne lea ʻakí, ka naʻá ma fesiofaki mo hoku tokouá. Naʻá ma fakatou ongoʻi lelei ia. Peá ne toe lea tuʻo ua mai ʻaki ia, “Ko ha fāmili taʻengata.” Ko e taimi ko ʻení naʻe ongoʻi mo ia ʻe heʻema faʻeé.

ʻOku ʻikai ke u toe manatuʻi ʻe au ha meʻa kehe ʻi heʻemau ʻaʻahi ʻi he ʻaho ko iá. Ko e meʻa pē ʻoku ou ʻiloʻi ʻi heʻemau hū ki tuʻa mei he senitaá, naʻá ku tangi ʻi he mamahi mo e fiefia—ʻo mamahi ʻi he tangata ne mau sītuʻa mei aí pea he ʻikai ke u toe mamata ki ai ʻi he moʻui ko ʻení pea fiefia ʻi he ʻaloʻofa ongongofua ʻo e ngaahi foʻi lea mahinongofua ko iá pea mo e nonga kuo nau tuku ʻi hoku lotó.

ʻOku ou ʻiloʻi, neongo e tuʻunga fakaʻatamai ʻo ʻeku kui tangatá, naʻá ne lava ʻo vahevahe fakaʻosi ʻa ʻene tui fakapapau mo ʻene ʻilo ko e ngaahi fāmilí ʻoku taʻengatá.

Naʻe ʻikai fuoloa kuó u mavahe ʻi heʻeku folau tokoni ʻofa fakaetangatá. Ko e taimi ne aʻu mai ai e ongoongo ʻo e hiki atu siʻeku kui tangatá ʻi he toe ha uike ʻe taha peá u fokí, naʻá ku nonga pē. Naʻá ku ʻiloʻi, pea ʻoku ou kei ʻiloʻi, te u toe feʻiloaki mo ia ha ʻaho. Fakamālō ko e ngaahi ouau fakatemipalé, ʻoku taʻengata ʻa e ngaahi fāmilí.