Sa Tibuok Simbahan

Ang Haiti Nagsaulog sa ika-30 nga Tuig sa Simbahan

Tulo ka dekada ang milabay si Presidente Thomas S. Monson—kanhi sakop sa Korum sa Napulog Duha ka mga Apostoles—mibisita sa Haiti ug mipahinungod sa yuta alang sa pagsangyaw sa gipahiuli nga ebanghelyo.

Si Elder Neil L. Andersen sa Korum sa Napulog Duha ka mga Apostoles bag-o lang mibisita sa Haiti sa pagsaulog sa anibersaryo. Si Elder Andersen nangulo sa pag-abli sa commemorative plaque nga magsilbing padayon nga pahinumdom sa pagsugod sa Simbahan sa Haiti. Ang mga miyembro nga nagpundok alang sa seremonyas sa pag-abli mitan-aw sa gi-televise nga mensahe ni Presidente Monson nga girekord sa wala pa ang kalihokan.

Ang Simbahan Mitabang sa Kapin sa 100 ka mga Katalagman sa tuig 2012

Matag tuig, Ang Simbahan ni Jesukristo sa mga Santos sa Ulahing mga Adlaw naghatag og emerhensya nga tabang sa mga tawo sa tibuok kalibutan nga naapektuhan sa mga katalagman, gubat, ug kagutom. Sa tuig 2012 ang Simbahan mihatag sa nangabiktima og gatusan ka libo ka libras nga pagkaon, tubig, mga sinina, tambal, kit nga panglimpyo sa lawas, ug ubang mga butang nga makahupay. Agi’g dugang, liboan ka mga miyembro nga bolunter midonar og kapin sa 1.3 milyones ka oras sa pagserbisyo.

Ang pinakadakong paningkamot sa Simbahan alang sa kahupayan sa mga biktima sa katalagman mao ang mga biktima sa Kusog nga Bagyong Sandy sa Sidlakan nga Baybay sa Estados Unidos. Dugang sa Sandy, ang daling tabang sa Simbahan sa pagsanong sa mga katalagman sa tuig 2012 nahimo sa Japan, sa Pilipinas, ubang dapit sa Estados Unidos, ug sa Syria.

Ang FamilyTree Magamit na sa Publiko

Ang FamilyTree, ang dugay nang gipaabut nga kalamboan sa FamilySearch.org sa Simbahan nga Internet site, gipakita sa publiko niadtong Marso 2013. Magamit kini nga walay bayad diha sa FamilySearch.org.

Ang FamilyTree mao ang sumusunod sa New FamilySearch, diin hangtud karon maakses lamang sa mga miyembro sa Simbahan gamit ang log-in ug password.

Karon ang ubang mga bisita sa FamilySearch.org “makahimo na sa pagsugod sa ilang family tree tanan pinaagi sa internet, magsugod gikan sa ilang kaugalingon ug dayon magpadayon sa nangaging henerasyon,” miingon si Paul M. Nauta, marketing manager sa FamilySearch.