Hangtud Kita Magkita Pag-usab
Maglakaw sa Dalan sa Paglaum [Trail of Hope] nga—Mag-uban
Niadtong Pebrero 1846 ang mga pioneer nga Santos sa Ulahing mga Adlaw giabug gikan sa Nauvoo. Puno sa paglaum nga makakaplag sila og kalinaw didto sa Zion, milakaw sila sa Parley Street—karon gitawag na og Trail of Hope—ug mitabok sa Suba sa Mississippi.
Sayong bahin kadto sa tingpamulak sa Nauvoo sa dihang unang higayon ako nga nakalakaw sa Trail of Hope. Bulawanon ang kahayag ug mainit ang landong samtang naglakaw ako sa dalan nga gilinyahan og mga kahoy. Isip usa ka litratista, nag-focus ra ko sa gikusgon sa shutter [shutter speed], gidak-on sa abli sa shutter [aperture], ug sa talagsaong kahayag nga mipuno sa akong mga lente.
Dayon hinay-hinay ang panumduman sa akong mga katigulangan nga nakalakaw niini nga dalan nagsugod sa pagsulod sa akong kasingkasing. Una si Jared ug Cornelia uban sa ilang dos anyos nga anak nga lalaki. Akong gibati ang kabugnaw sa hangin, apan kana nga kabugnaw dili ikatandi sa tugnaw nga kahimtang nga nasinati ni Jared ug sa iyang gamay nga pamilya panahon sa exodo. Si Cornelia namatay taliwala sa Nauvoo ug Salt Lake. Akong nahanduraw nga naghilak si Jared samtang iyang gikugos ang iyang anak ug mipadayon.
Nahadlok nga mobiya ang pagbati sa ilang presensya, wala ko mohunong sa paglitrato samtang ang mga luha mipahanap sa akong panan-aw. Dayon nahinumdom ko sa bata nga si Sarah, kinsa mibiya uban sa iyang mahigugmaong ina-ina sa katapusang grupo sa mga Santos nga mibiya sa Nauvoo. Sa usa ka higayon, ang mahigugmaong Langitnong Amahan mipuno sa ilang kampo og mga buntog aron sila makakaon. Dayon nanlimbasog sila sa pagpadayon uban sa mapasalamaton nga kasingkasing.
Ang akong kasingkasing nagsugod sa pagkasubo, gibati nako nga ingon og si Sarah miuban nako. Sila si Jared ug Cornelia uban sa ilang gamay nga anak nga lalaki nakig-uban usab nako. Nanglakaw kami taliwala sa kahayag ug landong, kaniadto ug karon nagkauban niini nga dalan—niining dalan sa paglaum [trail of hope], niining dalan sa mga luha. Sa paagi nga dili nako mapasabut, sila nakig-uban nako ug gibati nako ang among giambitan nga gugma sa ebanghelyo ni Jesukristo. Nakaamgo ko nga ang akong pagpamatuod miinit ngari nako tungod kay kini miinit diha nila—gihatag gikan sa henerasyon ngadto sa laing henerasyon—matag usa nagpahimutang sa pundasyon alang sa sunod. Nakahilak ko uban sa pasalamat.
Sa wala madugay ang akong bana, nga nagkuha og litrato sa laing dapit, miapas nako. Nagbarug ko duol niya samtang akong giistorya niya ang akong kasinatian. Siya, sama niadtong mga Santos sa Nauvoo, mao ang una sa iyang pamilya nga mituo sa ebanghelyo. Ug siya, sama niadtong nakalakaw niini nga dalan labaw sa 150 ka tuig na kaniadto, dili ang katapusan nga motuo. Ang iyang pagpamatuod ug ang akoa miamuma sa mga pagpamatuod nga karon miinit diha sa mga kasingkasing sa among mga anak, sama nga ang mga pagpamatuod ni Jared ug Cornelia ug Sarah miamuma sa mga pagpamatuod sa liboan nilang mga kaliwatan.
Gikalimtan ang among paglitrato, ang akong bana ug ako hinay nga naglakaw sa Trail of Hope, hilom nga naghinumdom niadtong nag-una na kaniadto.