Peni Vaitohi Taumaʻú
ʻOku nofo ʻa e taha naʻá ne faʻú ʻi ʻIutā, USA.
ʻOku ʻikai totonu ke tuʻuloa ʻa e ngaahi fakaʻilonga ʻo ʻetau ngaahi fehalākí. ʻOku mahuʻinga ʻa e nima maʻá, ʻo tatau ai pē kapau ʻoku fakamamahi.
Naʻá ku hiki ʻi ha ʻosi ha uike ʻe taha mei heʻeku ʻosi mei he ako māʻolungá, ki he tafaʻaki ʻe taha ʻo e fonuá ke nofo mo e fāmili hoku tuofefiné ʻi he faʻahitaʻu māfaná kau toki kamata ako he kolisí ʻi he faʻahitaʻu fakatōlaú.
Ne maʻu haku ngaahi kaungāmeʻa tokosiʻi, pea ko hanau tokolahi naʻe ʻi he kolisí mo motuʻa ange. ʻI ha pō Tokonaki ʻe taha ne haʻu ai ha toko ua ʻo hoku kaungāmeʻa foʻoú ke mau ō ʻo fanongo ʻi ha tāmeʻa lelei naʻe tā ʻi ha fale hulohula he feituʻú.
Naʻe kamata ke u kiʻi ongoʻi tailiili ʻi heʻemau tau e meʻalelé, ka naʻe ʻikai ke u fie fakafepakiʻi mo uesia ʻa e efiafí. Ne mau hū ki he fale hulohulá, pea sio ʻa e tangata ʻi he tuʻa kānitá ki heʻeku tohi laiseni fakaʻulí. Naʻe ʻikai ha toe fakatokanga ka ne kohiʻi ha peni vaitohi taumaʻu ʻuliʻuli ʻi hoku funga tuké fakatouʻosi.
Naʻá ku ʻohovale pē mo sio ki ai. Naʻá ku ʻiloʻi naʻá ne fakaʻilongaʻi hoku ongo nimá ke fakamahino naʻá ku fuʻu kei siʻi ke fakatau ha ʻolokaholo ʻi he paá.
Naʻá ku ongoʻi taʻe-manonga ʻi he taimi pē ko iá. Naʻe konā ʻa e kakaí mo ifi.
ʻOku ou fakameʻapangoʻia ke talaatu naʻe ʻikai ke u maʻu ha lototoʻa ke mavahe he taimi pē ko iá. ʻOsi ha miniti nai ʻe 30, kuo ʻeke mai ʻe ha taha hoku ongo kaungāmeʻá pe ʻoku ou sai pē. Naʻá ku talaange ʻoku ngangau hoku ʻulú ʻi he fasí mo e kohú. Naʻá ne loto ke ne ʻave au ki ʻapi, pea naʻá ku tali loto fiefia ia.
Naʻá ku fakavavevave ki he falekaukau he ʻapi hoku tuofefiné ʻo olo e ngaahi fakaʻilonga ʻuliʻulí ʻo aʻu ʻo mamahi. Te u tufa e sākalamēnití ʻaki e ongo nima ko ʻení ʻi he ʻaho hono hokó, pea naʻá ku mātuʻaki fuʻu fie maʻu ia ke maʻa. Neongo ia, naʻe ʻi ai ha ongo laine tamatemate ʻuliʻuli naʻe kei ʻasi pē ʻi hoku kili totototo, lanu pingikií.
Kimuʻa peá u ʻalu ʻo mohé, naʻá ku kole fakamolemole ʻi ha lotu ʻi he ʻikai ke u maʻu ha loto toʻa ke mavahé—pea toe mahino angé, ko e ʻikai ke u maʻu ha loto toʻa ke ʻoua te u teitei hū ki loto ʻi he kamataʻangá. Naʻá ku palōmesi ki he Tamai Hēvaní he ʻikai ke u toe teitei fakangofua au ke u aʻu ki ha faʻahinga tuʻunga pehē.
Naʻá ku lava ʻi he pongipongi hono hokó ke toʻo kotoa ʻa e toenga ʻo e fakaʻilongá, pea naʻe meimei maʻa kakato hoku ongo nimá ʻi he taimi naʻá ku tufa ai ʻa e sākalamēnití. Naʻá ku fakakaukau ki he tatau ʻa e angahalá mo e ongo fakaʻilonga ʻuliʻulí. ʻOku fie maʻu ha ngāue pea ʻe lava pē ke fakamamahi, ka te tau lava ʻo fakatomala mo toʻo ʻetau ngaahi angahalá ʻo fou he mālohi ʻo e Fakaleleí pea mo maʻa mei he ngaahi fakaʻilonga ʻuliʻuli ʻi heʻetau moʻuí.