Foki mo e Lāngilangi
ʻOku nofo ʻa Ve taha naʻá ne faʻú ʻi Niu ʻIoke, USA.
Naʻe ʻikai ke u loto ke u hoko ko ha taha kaihaʻa, pea naʻa mo haʻane hoko taʻe-ʻamanekina.
Tā fakatātaaʻi ʻe Greg Newbold
ʻI he ʻosi ʻo ʻeku ngaahi kalasí ʻi he fakaʻau ke efiafí, naʻá ku afe atu ʻi ha kiʻi falekoloa motuʻa kimuʻa peá u toki foki ki ʻapí—ko ha puʻi naʻe fie maʻu ke u fakahoko, neongo ʻa e lōvai ʻa e ʻuhá. Ko au toko taha pē ʻi he loto falekoloá, pea naʻe tokoni mai e fefine naʻe ngāue aí ʻi he maama naʻá ku saiʻia aí.
Ko e taimi naʻá ne fakaava ai ʻa e kato fakataú, naʻá ku fakatokangaʻi ha ngaahi vesa lanu kehekehe ʻi he kānitá. Naʻá ku kakapa ki ha taha ʻo e ngaahi vesá feʻunga mo e taimi naʻá ne faʻo ai e māmá ki he kató. Naʻá ne paeʻi ki he tafaʻakí ʻa e fakaʻaliʻalí, pea ngangana ai ha meimei vaeua ʻo e ngaahi vesá ki he falikí. Naʻe kiʻi hohaʻa ka naʻá ne fakaʻosi hono tā ʻeku fakataú. Naʻá ku mavahe mei he falekoloá, mo e fakamalú ʻi he nima ʻe tahá, kató mo e māmá ʻi he nima ʻe tahá.
Naʻá ku lue atu ki ʻapi, vete hoku puti vivikú, pea tā ha ngaahi fasi. ʻI heʻeku toʻo ki tuʻa ʻa e māmá, naʻá ku fakatokangaʻi ha meʻa ʻi he takele ʻo e kató. Ko ha vesa kulokula. Mahalo naʻe tō mei he feituʻu fakaʻaliʻaliʻangá ki heʻeku kató. Naʻá ku malimali, ʻo u fakakaukau ki he kamata fakafōtunga ʻe he momeniti ko ʻení ha talanoa mei he tohi lēsoni motuʻa ʻa e Kau Finemuí: “Pea fakakaukau ʻa Vālelī ki he lēsoni ne nau toki fai ʻi he kalasi Loumailé.”
Naʻá ku lī ʻa e vesá ki he funga mohengá kae tau ʻa ʻeku māmá. Naʻá ne ʻomi ha ulo māfana ʻi he efiafi taʻe-paú ni. Naʻá ku sio ki tuʻa ʻi he matapā sioʻatá. Naʻe fākalalahi ange ʻuhá, pea liliu mo e sinou he kelekelé ko ha pelepela ʻuli.
Naʻá ku sio ki he vesá Naʻe kulokula maama. Naʻá ku tui ia ʻi hoku nimá. Naʻe mafuli hake hono mahuʻingá—ko e $20. Kuo pau te u fakafoki ia. Naʻe ʻikai ke teitei haʻu ki heʻeku fakakaukaú ke taʻe-fakahoko ia. Naʻá ku toʻo leva ʻo hili ia ʻi ʻolunga he ʻū tohi naʻá ku fakakaukau ke fokotuʻutuʻú. Naʻá ku hū leva ki he loki ʻe tahá ʻo ʻai ha ipu sokoleti mafana.
Hili ia peá u toe foki mai.
Ko e hā hano fuoloa ʻeku fakatoloi hono fokotuʻutuʻu ʻo e ngaahi tohi ko ʻení? Kiʻi fuoloa. Ko e hā hano fuoloa ha kei ʻi ai ʻa e vesá kapau te u toloi hono fakafokí?
Ko ʻeku taumuʻá ke fakafoki. Ka ʻe afēʻia nai? Te u tatali fuoloa ke u ongoʻi faingataʻaʻia ʻi heʻeku fakafoki iá? Te u tuku noaʻi nai pē ia?
Naʻá ku kiʻi toe ʻāmio. Naʻá ku toe sio ki tuʻa he matapā sioʻatá. Naʻá ku fakakaukau ki he toki kamata māfana hoku vaʻé. Naʻá ku fakakaukau ki heʻeku sokoleti mafana ifó.
Ne u toʻo mai leva ʻa e vesá, toe tui hoku putí, peá u hū atu ki tuʻa.
Ko e taimi naʻá ku aʻu atu ai ki he falekoloá, naʻe lolotonga tokoni e fefiné ki ha taha kehe. Naʻá ku tuʻu pē ʻo talitali. Ko e taimi naʻe ʻosi aí, naʻá ku toʻo hake leva ʻa e vesá mei he kato hoku koté, mo fakamatalaʻi e founga naʻe ʻi he feituʻu ai ko ʻení. Naʻe hangē ne kiʻi ʻohovalé, kiʻi puputuʻu, fakamālō mai, ko ʻene ʻosí ia. Naʻe ʻikai ke ne ʻomai ha pale ʻi heʻeku faitotonú. Naʻe ʻikai lahi fēfē ʻene fakamāloó. Pea naʻe ʻikai ha toe taha ia ke sio ai.
Naʻá ku fakakaukau ʻi heʻeku luelue ki ʻapí ki heʻeku fakakaukau maʻu pē ko e taha faitotonu aú. Ko ha ʻulungaanga lelei ia ʻoku ou fakamahuʻingaʻi mo kumi ʻi he kakai kehé. Ka ko e faitotonu moʻoní, ʻo hangē ko e ʻofa mo e manavaʻofa moʻoní, ko ha ʻulungaanga ʻoku moʻui. Tatau ai pē pe ko e hā hono fakaʻeiʻeiki mo moʻoni ʻeku taumuʻá, naʻá ku hoko pē ko ha taha faitotonu ʻi he taimi naʻá ku toe tui ai e ongo puti ʻuhá pea fakahoko ʻeku taumuʻá.
Naʻá ku ongoʻi hoku kauʻi nima halaʻataá ʻi hoku koté mo kiʻi malimali.