Te U Vahevahe ʻa e Ongoongoleleí mo e Fānau Kotoa ʻa e ʻOtuá

Kuó ke kai nai ha meʻa ʻoku mātuʻaki ifo peá ke loto ke vahevahe ia? Naʻe misi ʻa e palōfita ko Līhaí ʻi ha meʻa ʻe taha naʻe kai ʻi ha konga ʻo ha fuaʻi ʻakau ifo. Naʻe fuʻu ifo ʻo ne “fakafonu [hono] laumālié ʻaki ha fuʻu fiefia lahi” (1 Nīfai 8:12). Naʻe fie maʻu foki ʻe Līhai ke kai hono fāmilí ʻi he fuaʻi ʻakau ifó.

ʻOku tatau ʻa e fuaʻi ʻakau ʻi he misi ʻa Līhaí mo e ʻofa ʻa e Tamai Hēvaní. Naʻe loto ʻa Līhai ke ongoʻi ʻe hono fāmilí e ʻofa ʻa e Tamai Hēvaní. Naʻá ne fie vahevahe ʻa e ongoongoleleí mo kinautolu koeʻuhí he te ne ngaohi kinautolu ke nau fiefia.

ʻOku faʻa lelei maʻu pē ʻa e fānaú ʻi he vahevahe ʻo e ongoongoleleí mo e kakai kehé.

Naʻe fakatokangaʻi ʻe he tokotaha taʻu valu ko Maliá ʻa e ongo faifekaú ʻi he ngaahi hala ʻo ʻEkuatoá. Naʻá ne kole ange pe te na fie akoʻi ange ki ai ʻa e ongoongoleleí. Naʻe ō mai ʻa e ongo faifekaú ki he ʻapi ʻo Maliá ke akoʻi hono fāmilí. Ko Malia ʻa e fuofua tokotaha ʻi hono fāmilí ke papitaisó. Naʻe mātuʻaki fiefia ʻi he taimi naʻe faifai pea kau kotoa ai hono fāmilí ki he Siasí.

Naʻe fuʻu vēkeveke ʻa e taha taʻu hiva ko ʻĒlikí ki he polokalama ʻa e Palaimelí ʻi he houalotu sākalamēnití peá ne fakaafeʻi ai hono ngaahi kaungāʻapí ke nau ō mai. Naʻa nau omi.

Naʻe fakatou vahevahe ʻe he ongo tamaikí ni ha faʻahinga meʻa mahuʻinga mo e kakai ʻokú na ʻofa aí. ʻE tupulaki hoʻo fakamoʻoní ʻi hoʻo vahevahe ʻa e ongoongoleleí. Te ke ongoʻi ha “fuʻu fiefia lahi” ʻo hangē ko Līhaí.

Toʻohemá: tā fakatātaaʻi ʻe Mark Jarman; toʻomataʻú, mei toʻohema ʻi he tuliki toʻohema ʻi ʻolungá: ngaahi tā fakatātā ʻa Jim Madsen, Jared Beckstrand, Eric Barclay, mo Celeste Smith