Ko Hono Fakaafeʻi Mai ki Loto ʻa e Fakamoʻuí
“Vakai, ʻoku ou tuʻu ʻi he matapaá, mo tukituki: kapau ʻe fanongo ʻe ha taha ki hoku leʻó, mo toʻo ʻa e matapaá, te u hū atu kiate ia” (Fakahā 3:20).
Naʻe fokotuʻu heʻeku fineʻeikí ha fakatātā ʻo e Fakamoʻuí ʻoku tukituki ʻi ha matapā he taimi Kilisimasí, ʻi heʻeku kei siʻí. Naʻe teʻeki ai ke mau kau ʻi he Siasí he taimi ko iá, pea naʻá ku faʻa ʻeke maʻu pē, “Ko e hā ʻoku tukituki ai ʻa Sīsū ʻi he matapaá? Ko hai ʻoku ʻi he tafaʻaki ʻe tahá?”
Naʻá ku ʻilo ʻi ha ngaahi taʻu siʻi mei ai naʻe ʻikai ke ʻi ai ha meʻa toʻo ʻo e matapaá he tafaʻaki ki tuʻa naʻe tukituki ai ʻa e Fakamoʻuí. Naʻe fie maʻu ʻa e taha ʻi lotó ke ne fakaava ʻa e matapaá. Kuó u ʻilo ʻeni ʻa e taha ʻoku ʻi he tafaʻaki ʻe taha ʻo e matapaá. Ko kitautolu! ʻOku tukituki ʻa e Fakamoʻuí, pea kuo pau ke tau fakaava kotoa ʻa e matapaá mo fakaafeʻi mai Ia ki heʻetau moʻuí.
Ko e taimi naʻá ku taʻu hongofulu tupu aí, naʻá ku pehē leva ke u fakaafeʻi ʻa e Fakamoʻuí ki heʻeku moʻuí ʻaki haʻaku papitaiso mo hoko ko ha mēmipa ʻo e Siasí. Naʻe hoko hoku ngaahi kaungāmeʻá ko ha kau faʻifaʻitakiʻanga lelei kiate au. Pehē mo ʻeku kui fefiné. Ko ha taha ngāue temipale ia ʻi he Temipale Losi ʻEnisilisi Kalefōniá. Naʻe mavahe mei homau ʻapí he taimi 4 pongipongí ke ngāue maʻá e ʻEikí ʻi he temipalé.
Hili ha taʻu ʻe ua mei heʻeku papitaisó, naʻá ku fakakaukau leva ʻoku ou fie ngāue maʻá e ʻEikí ko ha faifekau taimi kakato. Naʻá ku tokoni ki ha kakai tokolahi ʻi heʻeku ngāue fakafaifekaú ke nau ako kau ki he Fakamoʻuí ke nau lava ʻo fakaafeʻi Ia ki heʻenau moʻuí.
Naʻá ku ngāue ki mui ko ha palesiteni fakamisiona ʻi Haʻamoa. Naʻá ku ʻeke maʻu pē ki he kau faifekau foʻoú pe ko e fē taimi ne nau fakakaukau ai ke ngāue fakafaifekaú. Naʻe pehē ʻe ha tokolahi naʻa nau ʻi he Palaimelí ʻi he taimi naʻa nau fakakaukau ai ke ngāue fakafaifekaú!
ʻE tokoni atu ʻa e Palaimelí ke ke teuteu ki he ngāue fakafaifekau. Ako ʻa e lahi taha te ke lavá. Fokotuʻu ha taumuʻa ke ngāue fakafaifekau. Pea te ke lava mo koe ʻo tokoni ke fakaafeʻi ʻe he kakaí ʻa e Fakamoʻuí ki heʻenau moʻuí. ʻE liliu ʻe he hoko ko ha faifekaú hoʻo moʻuí—naʻá ne liliu haʻakú.
Tā fakatātaaʻi ʻe Jennifer tolman