Kiʻi Tohi Fakamatala ʻo e Konifelenisi ʻo ʻOkatopá
Ngaahi Fakakaukau ʻo e Konifelenisi Lahí
ʻOku nofo ʻa e taha naʻá ne faʻú ʻi Uāsingatoni, USA.
“Mateʻi Mai pe Ko Hai ʻOku Haʻu ki he Maʻumeʻatokoni Efiafí?”
ʻI he toe maʻu pē ha ʻaho ʻe hongofulu mā nima ki he konifelenisi lahí, ʻoku hanga homau fāmilí ʻo tautau ʻemau fakaʻilonga ʻo fakahā ai e kamataʻanga ʻo e “Mateʻi mai pe ko hai ʻoku haʻu ki he maʻumeʻatokoni efiafí?” Hili ia pea mau tānaki atu mo e ngaahi tā ʻo hotau kau palōfitá, kau tangata kikité, mo e kau tangata maʻu fakahā mei he makasini ʻo e konifelenisi kimuʻa ʻa e Siasí.
ʻOku ou teuteu ʻaki haʻaku fekumi fekauʻaki mo e palōfita te mau talitali ʻi he pō ko iá. ʻOku ou kumi he taimi ʻe niʻihi ha ngaahi meʻa ʻi he falé ke ne fakafofongaʻi ha fanga kiʻi meʻa siʻi ne u ʻilo, peá u hili ia ʻi ha peleti. ʻI heʻeku fai e ngaahi talanoá he lolotonga ʻo e maʻu meʻatokoni efiafí fekauʻaki mo e meʻa takitaha, ʻoku feinga e taha kotoa ke mateʻi pe ko hai ia. ʻOku ou fai ha talanoa ʻe taha pe ua he taimi ʻe niʻihi naʻe fai ʻe he palōfitá ʻi he konifelenisi lahi kimuʻá.
ʻOku ou fakatumutumu ʻi he ngaahi meʻa ʻoku manatuʻi heʻeku fānaú kau ki hotau kau palōfita mo e kau ʻaposetolo ʻofeiná, pea ʻoku ou ʻilo kuo toe fakatupulaki foki ʻe he kiʻi vaʻinga faingofuá ni ʻeku ʻofa mo ʻeku ʻilo ki he kau tangata maʻongoʻongá ni.
Ko ʻEku Tatau ʻAʻaku ʻo e Konifelenisí
Ko e taimi naʻe ʻaʻahi mai ai ʻa ʻEletā Niila L. ʻEnitasoni ʻo e Kōlomu ʻo e Kau ʻAposetolo ʻe Toko Hongofulu Mā Uá mo hono uaifi ko Kefí, he lolotonga ʻemau konifelenisi fakasiteikí, naʻe fai ai ʻe Sisitā ʻEnitasoni ha talanoa kiate kimautolu. Naʻá ne pehē lolotonga ʻena nofo ʻi Falaniseé, naʻá ne ʻai ha tatau ʻo e ngaahi malanga konifelenisí maʻa ʻena fānaú takitaha—ʻo aʻu ki he fānau iiki tahá. Naʻe ʻohovale ʻi he taimi naʻá ne ʻilo ai e totongi ʻo e ngaahi tataú, he naʻe fuʻu mamafa ʻaupito. Fāifai pea haʻu ha fakakaukau ki hono ʻatamaí: “Ko e hā hano mahuʻinga kiate koe ke maʻu ho fāmilí e ngaahi lea ʻa e kau palōfitá?”
Naʻe ongo moʻoni kiate au e talanoá ni, peá u fakapapauʻi ai ʻoku maʻu ʻe he taha kotoa ʻi homau fāmilí haʻane tatau ʻo e ngaahi malanga konifelenisí. Naʻe mātuʻaki fiefia ʻema fānau fefiné. Naʻa mau fakaʻaongaʻi kinautolu ki he efiafi fakafāmili ʻi ʻapí mo e lolotonga ʻo e ako folofolá. Naʻá ku saiʻia ke mamata ki hono lau ʻe ha taha ʻo e fānau fefiné ʻiate ia pē ʻa e ngaahi malangá mo fakaʻilongaʻi ʻaki ʻene peni fakaʻilongá. Ko ha taʻahine ʻe taha, ne toki papí ni pē, naʻe kole ia ke u lau mo ia tokotaha pē ʻa e ngaahi malangá.
Tukupā ʻo e Konifelenisí
Naʻá ku fakatukupaaʻi ʻa e fefine kotoa pē, ʻo hoko ko e konga ʻeku lēsoni ʻi he Fineʻofá, ke nau takitaha toe vakaiʻi ʻa e ngaahi malanga mei he konifelenisi ki muʻá; naʻe toe lau ʻe he kakai fefine ʻe niʻihi ʻa e ngaahi malangá, pea ko ha niʻihi naʻa nau mamata ai ʻi he ʻinitanetí. Naʻe fakahaaʻi ʻe ha kau fefine ʻe niʻihi ʻa ʻenau ongoʻi mateuteu ange ki he konifelenisi ka hoko maí.
Tā fakatātaaʻi ʻo e ʻatá ʻe Carlos Israel Gutiérrez Robles