Moʻui Lelei Fakaesino mo Fakaelotó

ʻOku hoko e taʻe fakaʻaongaʻi e ngaahi tefitoʻi moʻoni ʻo e moʻui lelei fakaesinó ki ha toʻu tupu ʻe niʻihi ko ha palopalema lahi ʻi he fakakaungāmeʻá mo e feingaʻi ke lotolahí. ʻIkai ngata ai, ʻoku mātuʻaki mahuʻinga ʻa e moʻui lelei fakaesinó mo fakaelotó ka ʻoku faʻa hoko ko ha tafaʻaki ʻoku ʻikai ngāueʻi ʻi he teuteu ki he ngāue fakafaifekaú. ʻOku fakamatalaʻi ʻe ʻEletā ʻAtiliane ʻŌkoa [Adrián Ochoa] ʻo e Kau Fitungofulú ʻi he peesi 52–53 ʻo e makasiní ni, ʻa e lava ke maluʻi ʻetau moʻui fakaesinó mo fakaelotó ʻe he tauhi fakalelei hotau sinó. ʻOku fakamanatu mai ke tau fakamālohisino mo talangofua ki he Lea ʻo e Potó (vakai, T&F 89) koeʻuhí ke tau moʻui lelei ange mo fiefia ange. ʻI hoʻo tokoni ko ia ke ako mo fakaʻaongaʻi ʻe hoʻo fānaú ʻa e ngaahi tefitoʻi moʻoni ʻo e moʻui lelei fakaesino mo fakaelotó, te nau lava leva ke fakatupulaki ange ʻenau loto lahí mo teuteu ke ngāue ʻi he kahaʻú.

Hangē ko e fakamatala ʻa ʻEletā ʻŌkoá: “ʻOku toe tāpuakiʻi foki ʻe he tokangaʻi ho sinó ʻa ho ʻatamaí mo tokoni ke ke manatuʻi ko e fānau koe ʻa e ʻOtuá pea te ke lava ʻo loto lahi mo fiefia. ʻOku fehokotaki kotoa ʻetau ngaahi tafaʻaki fakaelotó, fakatuʻasinó, mo fakalaumālié.”

Ngaahi Fokotuʻu ki hono Akoʻi ʻo e Toʻu Tupú

Lau fakataha e fakamatala ʻa ʻEletā ʻŌkoáa pea fokotuʻu ha palani fakamālohisino fakafāmili mo ha ngaahi taumuʻa fakamālohisino pau mo moʻoni.
Lau mo hoʻomou fānau taʻu hongofulu tupú ʻa e konga ki he moʻui lelei fakaesino mo fakaelotó ʻi he Ki Hono Fakamālohia ʻo e Toʻu Tupú (peesi 25–27). Aleaʻi hono ʻuhinga ʻo e moʻui lelei fakaelotó.
Hivaʻi fakataha e “Ka Faingataʻa Ho Halá” (Ngaahi Himi, Fika 60) pea aleaʻi e meʻa ʻoku akoʻi mai ʻe he toetuʻú ki hono mahuʻinga ʻo hotau sino fakamāmaní.
Ako e ngaahi potufolofola ʻoku lisi ʻi he fakamatala ko ʻení pea aleaʻi e meʻa ʻoku nau akoʻi fekauʻaki mo e moʻui lelei fakaesinó mo fakaelotó.

Ngaahi Fokotuʻu ki hono Akoʻi ʻo e Fānaú

Fakaʻaliʻali ki hoʻo fānaú ha fakatātā ʻo e temipalé. Aleaʻi hono ʻuhinga hono akoʻi ʻe he ʻAposetolo ko Paulá ko hotau sinó ko e “temipale ʻo e Laumālie Māʻoniʻoní” (1 Kolinitō 6:19) mo e founga ʻe lava ai ʻe he ʻilo ko ʻení ʻo tokoniʻi kitautolu ke tau tokangaʻi hotau sinó mo ʻetau fakakaukaú.
ʻAi ha lisi ʻo ha ngaahi ʻekitivitī fakatupulaki ʻe saiʻia hoʻo fānaú ke fakahoko fakafāmili. Hili ia pea faʻu ha palani ki he founga ʻe ngaohi ai ʻa e ngaahi ʻekitivitī ko ʻení ko ha konga ʻo e moʻui fakafāmilí.
Aleaʻi ha ngaahi founga ke mahino mo mapuleʻi ai e lotó, kau ai ʻa e ʻitá pe loto mamahí. Hivaʻi ʻa e “ʻI Heʻetau Tokoní” (Tohi Hiva ʻa e Fānaú, 108), “ʻOku Ou Feinga ke Hangē ko Sīsuú” (Tohi Hiva ʻa e Fānaú, 40), pe ko ha toe hiva fekauʻaki mo e lotó mo hono fai ʻo e ngaahi fili leleí.

Tā fakatātaaʻi ʻe Taia Morley