Lava e Kāingalotú ʻo Kole ha Fakahokohoko ʻo e Laine Maʻu Mafai ʻo e Lakanga Fakataulaʻeikí
ʻOku lava ʻe he Siasí he taimí ni ʻo tuku mai ha fakamatala ʻo e fakahokohoko ʻo e laine maʻu mafai ʻo e lakanga fakataulaʻeikí ko ha tokoni ki he kāingalotú, ʻo kapau te nau kole ia. Ko e fakahokohoko ʻo e laine maʻu mafai ʻo e lakanga fakataulaʻeikí ko ha fakahokohoko ia ʻo e ngaahi fakanofo ʻoku lava ke fakatotoloʻi kimui ki he kamataʻanga ʻo e Siasí pea ki hono tumutumú ko e Fakamoʻuí.
Neongo ʻe lava ke kau ha taha maʻu lakanga fakataulaʻeiki ʻi he tuʻunga ko e Fitungofulú ʻi he hohoko maʻu mafai ʻo e mēmipá, ka ʻoku ʻikai ha laine hohoko maʻu mafai kehe ia ʻe tauhi maʻá e tuʻunga ko e Fitungofulú. ʻIkai ngata aí, ko e hohoko ʻo e laine maʻu mafai fakataulaʻeiki ki hono fakanofo ʻo e kau pīsopé mo e pēteliaké, ʻe lava ke fakatotoloʻi ia ʻo fakafou ʻi hono fakanofo taulaʻeiki lahi kinautolú.
Ko e fakamatala pē kau ki he hohoko ʻo e laine maʻu mafai ʻo e Lakanga Taulaʻeiki Faka-Melekisētekí ʻoku lava ke kole mei he Siasí; ʻoku ʻikai lava ke maʻu atu ʻa e hohoko ia ʻo e Lakanga Taulaʻeiki Faka-ʻĒloné. ʻE ala kole ʻe he kāingalotú ʻa e fakamatala hohoko ʻo e laine maʻu mafai ʻo e Lakanga Taulaʻeiki Faka-Melekisētekí maʻanautolu pē, ha kiʻi tamasiʻi ʻoku nofo ʻi ʻapi, pe ki ha faifekau kei talavou ʻoku lolotonga ngāue fakafaifekau. ʻOku ʻikai hoko e ngaahi tohi ko ʻení ko ha lekooti fakaʻofisiale ia ʻa e Siasí.
Kapau ʻokú ke fie kole hoʻo hohoko ʻo e laine maʻu mafai ʻo e lakanga fakataulaʻeikí, fakakau atu ho hingoa fakalao kakató, ʻaho fāʻeleʻí, fika lekooti memipasipí (maʻu ia ʻi ha lekomeni temipale pe mei hoʻo kalake fakauōtí), hingoa ʻo e tokotaha naʻá ne fakanofo koe ki he tuʻunga ko e kaumātuʻá pe taulaʻeiki lahí (kapau ʻoku ʻilo), pea mo ho tuʻasila ke ʻoatu ki ai e talí mo e fika telefoní pe tuʻasila ʻīmeilí.
ʻAve hoʻo kolé ki he:
Priesthood Line of Authority
Global Service Center
120 North 200 West
Salt Lake City, Utah 84103-1514, USA
Fax: 1-801-240-6816
Telefoni: 1-800-453-3860, extension 2-3500
ʻĪmeili: ʻAve ha ʻīmeili ki he lineofauthority@ldschurch.org mo e PLA ʻi he subject line. ʻI hono fakafoki atú te ke maʻu ha foomu ke fakafonu pea fakafoki (ʻoku ʻi ai ha tali ʻoku ʻoatu he taimi pē ko iá ki ha faʻahinga pōpoaki pē ʻoku ʻasi ai ʻa e “PLA” ʻi he laine ko e subject).
ʻOku lava ʻo fakatotoloʻi kimui ʻo aʻu ki he Fakamoʻuí ʻa e fakahokohoko ʻo e laine maʻu mafai ʻo e lakanga fakataulaʻeikí maʻanautolu ʻoku nau fakahoko e ngaahi ouaú.
Ko Hono Fakanofo ʻe Kalaisi e Kau ʻAposetolo ʻe Toko Hongofulu Mā Uá, tā ʻe Harry Anderson © IRI