Ang Pag-ani
Ang Espiritu Santo … mopakita nganha kaninyo sa tanan nga mga butang nga kinahanglan inyong buhaton” (2 Nephi 32:5).
Isip usa ka batang lalaki didto sa Japan, gusto kong makakat-on og Iningles. Apan ang mga leksyon sa Iningles mahal kaayo, ug ako walay igong kwarta aron ibayad niini.
Usa ka adlaw akong nakita ang duha ka batan-ong mga lalaki nga nanghatag og mga flyers alang sa leksyon sa Iningles nga walay bayad. Mga misyonaryo sila sa Ang Simbahan ni Jesukristo sa mga Santos sa Ulahing mga Adlaw. Diha-diha dayon nagpalista ko alang sa ilang mga klase sa Iningles.
Akong gibati ang usa ka butang nga espesyal mahitungod sa mga misyonaryo. Sila mga madasigon ug positibo. Nangutana ko nila mahitungod sa ilang simbahan, ug ang akong kasingkasing natandog. Ako wala makasabut niini nianang panahona, apan akong gibati ang Espiritu. Sa wala madugay gusto ko nga magpabunyag.
Ang akong mga ginikanan dili gusto nga ako magpabunyag sa usa ka simbahan nga lahi sa ilaha. Apan ang mga misyonaryo miadto sa akong panimalay ug mahigugmaong nakig-istorya sa akong mga ginikanan. Ang Espiritu mitandog sa mga kasingkasing sa akong mga ginikanan, ug sila mitugot kanako nga magpabunyag.
Usa ka Dominggo sa Oktubre, gi-assign ako sa paghatag og importante nga bahin sa usa ka programa sa simbahan. Apan sa Oktubre ang tanan sa akong pamilya kinahanglang motrabaho og maayo sa pag-ani sa humay sa kahumayan sa akong amahan. Kana naglakip sa pagtrabaho sa adlaw nga Igpapahulay.
Ako nag-ampo sa Langitnong Amahan, ug ang Espiritu mitanom og ideya sa akong hunahuna. Maningkamot ko nga mahuman ang pag-ani sa dili pa ang Dominggo. Mobangon ko og sayo ug motrabaho sa kada buntag sa dili pa moeskwela. Dayon kada hapon motrabaho ko human sa klase hangtud mongitngit.
Apan pagka-Sabado sa gabii katunga ra ang nahuman sa pag-ani. Mihigda ko nga naguol nga wala nako makab-ot ang akong mga tumong. Dominggo sa buntag mimata ko og sayo aron moadto sa umahan. Ang akong amahan misulod sa akong kwarto ug, uban sa malumo nga pahiyum, nangutana nganong wala ko mosimba. Ang akong kasingkasing napuno sa kalipay. Makaadto ko sa simbahan ug magbalaan sa adlaw nga Igpapahulay!
Mapasalamaton ko nga nakahibalo nga kon kita maminaw sa tingog sa Ginoo ug mosunod Kaniya, Siya kanunay mopanalangin ug mogiya nato.