Pagpakabuhi nga may Kalinaw, Kalipay, ug Katuyoan
Gikan sa pakigpulong sa gradwasyon nga gihatag didto sa Brigham Young University niadtong Abril 21, 2011. Alang sa tibuok nga pakigpulong sa Iningles, adto sa speeches.byu.edu.
Unta ang Ginoo molig-on sa inyong determinasyon, sa inyong pagbansay og hugot nga pagtuo, ug sa inyong naglambo nga kinaiya aron kamo mahimong mga instrumento sa kaayohan nga gusto Niya kamong mamahimo.
Kini nga kalibutan anaa sa grabeng kakuyaw. Ang sukaranang mga mithi sa Estados Unidos ug sa ubang mga nasud sa Kasadpan mikunhod. Nagpadayon nga nagkabungkag ang baruganan, hiyas, integridad, ug relihiyusong mga mithi—ang pundasyon sa sibilisasyon ug kinahanglanon sa kalinaw ug kalipay. Akong ipakigbahin kaninyo sa yano ug klaro nga paagi kutob sa akong mahimo ang sundanan sa kalampusan ug kalipay sa kinabuhi bisan niini nga mga kahimtang.
Ang Dios naghatag kaninyo sa kapasidad sa pagbansay og hugot nga pagtuo aron kamo makakaplag og kalinaw, hingpit nga kalipay ug katuyoan sa kinabuhi. Hinoon, aron magamit ang gahum niini, kana nga hugot nga pagtuo kinahanglang naestablisar sa usa ka lig-on nga butang. Walay mas lig-ong pundasyon kaysa pagtuo diha sa gugma sa Langitnong Amahan alang kaninyo, pagtuo sa Iyang plano sa kalipay, ug pagtuo diha sa kaandam ug gahum ni Jesukristo sa pagtuman sa tanan Niyang mga saad.
Pipila ka mga baruganan nga basihan sa hugot nga pagtuo maglakip sa:
-
Pagsalig sa Dios ug sa Iyang tinguha nga motabang kon gikinahanglan, bisan unsa pa man kamahagiton ang kahimtang.
-
Pagkamasulundon sa Iyang mga sugo ug pagkinabuhi nga nagpakita nga Siya makasalig kaninyo.
-
Pagkasensitibo sa hilom nga mga aghat sa Espiritu ug maisugon sa pagsunod niana nga mga impresyon.
-
Pagmapailubon ug pagsabut kon ang Dios motugot kaninyo nga manlimbasug aron motubo ug kon ang mga tubag dugay moabut.
Makatabang kaninyo nga mosabut ug mogamit sa gahum sa inter-aksyon sa hugot nga pagtuo ug kinaiya. Ang Dios naggamit sa inyong hugot nga pagtuo sa pag-umol sa inyong kinaiya. Ang kinaiya inanay nga namugna gikan sa mga doktrina, mga baruganan, ug pagkamasulundon. Ang kinaiya nagpakita kon unsa kamo nga mamahimo. Ang inyong kinaiya mao ang sumbanan sa Dios aron sa pagtino kon giunsa ninyo paggamit ang inyong mortal nga kinabuhi. Ang lig-ong moral nga kinaiya moresulta gikan sa makanunayong husto nga mga pagpili gikan sa mga pagsulay sa kinabuhi. Kini nga mga pagpili gihimo nga may pagsalig sa mga butang nga gituohan ug, kon sundon, mapamatud-ang tinuod.
Ang Angay nga Kinaiya
Kon kamo naglisud sa pagsabut ug nagduha-duha samtang nagbansay og hugot nga pagtuo, kamo magiyahan ngadto sa mga solusyon sa mga hagit sa kinabuhi nga dili unta ninyo maangkon. Bisan pa og kamo adunay kinalig-onan nga pagtuo, ang Dios dili kanunay moganti kaninyo diha-diha dayon sumala sa inyong mga tinguha. Hinoon, motubag Siya kaninyo hinay-hinay sumala sa Iyang mahangturong plano nga labing ikaayo kaninyo. Ang inyong padayon nga pagbansay og hugot nga pagtuo makapalig-on sa kinaiya nga maanaa kaninyo panahon sa tumang mga panginahanglan. Ang ingon nga kinaiya dili mapalambo panahon sa tumang hagit o pagtintal. Mao na kana ang panahon sa paggamit niini.
Ang pundasyon sa kinaiya mao ang integridad. Ang angay nga kinaiya makapalig-on sa inyong kapasidad nga makaila sa direksyon sa Espiritu ug magmasulundon niini. Ang lig-ong kinaiya mas importante kaysa unsay inyong naangkon, nakat-unan, o mga tumong nga inyong natuman. Ang inyong makanunayong pagbansay sa hugot nga pagtuo makamugna og lig-ong kinaiya. Ang lig-ong kinaiya makapalambo sa inyong abilidad sa pagbansay sa hugot nga pagtuo, sa ingon mopadako sa inyong kapasidad ug pagsalig sa pagbuntog sa mga pagsulay sa kinabuhi. Kini nga makapalig-on nga mga hitabo magpadayon, kay kon inyong mas napalig-on ang inyong kinaiya, mas makabansay kamo sa gahum sa hugot nga pagtuo.
Bisan asa kamo nagpuyo, bisan unsay inyong trabaho o tumong sa kinabuhi, kamo maapil sa paningkamot sa pagluwas sa mga kalag sa tawo. Magmalig-on niana nga paningkamot. Kini nag-agad sa kalig-on sa inyong kinaiya. Ang kinaiya ni Satanas ug sa iyang pundok mao gyud ang pagsupak sa kabubut-on sa atong Amahan ug kanunayng paglapas sa Iyang mga sugo. Malig-on ang inyong kinaiya pinaagi sa kanunayng pagpili sa eksakto. Sa tibuok ninyong kinabuhi kamo pagagantihan gumikan sa inyong paningkamot sa pagpili sa eksakto.
Dili si Satanas o ni bisan unsang gahum ang makapaluya o makapabungkag sa inyong naglambo nga kinaiya. Kamo lang gyud ang makabuhat niini pinaagi sa pagka dili masulundon. Mao na nga si Satanas naka-focus gyud sa pagtintal kaninyo sa paghimo og mga desisyon nga makapahuyang sa inyong kinaiya. Si Satanas eksperto kaayo sa paghimo sa makapadaut nga mga pagpili ingon nga madanihon, gani resonable. Busa pagmatngon. Niining kritikal nga panahon sa kinabuhi, kamo mag-atubang og daghang mga pagpili. Ang mga desisyon nga inyong pagahimoon makaapekto gyud sa kinabuhi karon ug sa kahangturan. Pagdesisyon nga maalamon ug mainampoon.
Pagdesisyon Base sa Mahangturong mga Kamatuoran
Adunay duha ka sumbanan sa paghimo og mga desisyon sa kinabuhi: (1) mga desisyon nga gibase sa kahimtang ug (2) mga desisyon nga gibase sa mahangturong kamatuoran. Si Satanas nag-awhag sa mga pagpili sumala sa kahimtang: Unsay gibuhat sa uban? Unsay madawat sa kadaghanan o sa politika? Unsay kinadalian, labing makatagbaw nga tubag? Kana nga sumbanan naghatag ni Lucifer og dakong oportunidad sa pagtintal sa indibidwal aron sa pagdesisyon nga makadaut ug makagun-ob bisan kon kini ingon og labing nindot atol sa pagdesisyon.
Niini nga paagi walay mga mithi o sumbanan nga kanunayng maggiya sa pagdesisyon. Ang matag desisyon gihimo sa unsay makita nga labing makapadani nianang higayona. Ang tawo nga mopili niini nga dalan dili magdahum nga tabangan sa Ginoo apan magsalig sa iyang kaugalingong kalig-on ug sa uban nga gustong motabang. Subo lang, kadaghanan sa mga anak sa Dios modesisyon niini nga paagi. Mao nga ang kalibutan gubot gayud.
Ang sumbanan sa Ginoo mao nga ang Iyang mga anak modesisyon base sa mahangturong kamatuoran. Kini nagpasabut nga ang inyong kinabuhi padayon nga nakasentro diha sa mga sugo sa Dios. Sa ingon, ang mga desisyon gihimo sumala sa makanunayong kamatuoran inubanan sa pag-ampo ug giya sa Espiritu Santo. Agig dugang sa inyong kalig-on ug kapasidad, kamo makatagamtam og balaanong inspirasyon ug gahum kon gikinahanglan. Ang inyong mga lihok masaligan ug makapanalangin sa kinabuhi sa inyong palibut. Kamo makabaton og makahuluganon nga kinabuhi nga may katuyoan, kalinaw ug kalipay.
Walay garantiya nga ang kinabuhi mahimong sayon. Kita mas daling motubo ug makat-on pinaagi sa pag-atubang ug pagbuntog sa mga hagit. Ania kamo dinhi aron pamatud-an ang inyong kaugalingon, makalambo, ug makabuntog. Kanunay may mga hagit nga makahimo ninyo sa paghunahuna, paghimo og hustong mga paghukom, ug pagbuhat sa matarung. Kamo molambo gumikan niini. Hinoon, may mga hagit nga dili na kinahanglan ninyong masinati. Kini may kalabutan sa grabe nga kalapasan. Samtang kamo nagpadayon sa paglikay sa ingon nga trahedya, ang inyong kinabuhi mas sayon ug malipayon. Kamo makamatikod niadtong wala mosunod niini, kinsa mohimo sa sayop ug dautan nga mga butang ug makapasubo kini nila. Pasalamati ang inyong Amahan sa Langit nga ang inyong sumbanan sa kinabuhi lahi ug nga kamo natabangan sa paghimo og mga pagpili nga gigiyahan sa Espiritu Santo. Kana nga aghat makapabilin kaninyo sa saktong dalan.
Ang ebanghelyo nagtudlo kanato sa paghimo og mga desisyon base sa mahangturong kamatuoran. Palihug ayaw himoang eksepsyon ang inyong kaugalingon nianang sumbanan sa kinabuhi aron makaangkon lang og temporaryo, nindot nga bintaha o makaapil sa kasinatian nga dili angay. Nakakita ko og daghang batan-ong magtiayon ug indibidwal nga nakahimo og dagkong sayop tungod kay sila misunod sa sayop nga mga tinubdan sa pagpakabuhi. Sila nalinga sa tinuod nga mga baruganan kay natintal sa pagkompromiso og gamay lang aron makaangkon og impluwensya, posisyon, o dawaton sa kadaghanan. Sila mangrason sa ilang mga sayop, mangatarungan nga sa dili madugay mas maayo ang mahitabo. Sa kadugayan kana nga sumbanan sa kinabuhi siguradong mosangput sa dili ninyo gusto nga kahimtang.
Pagpadayon sa Inyong Determinasyon
Unsaon ninyo sa pagpadayon sa inyong determinasyon sa pagpuyo nga takus? Unsaon ninyo pagsiguro nga ang determinasyon sa inyong kasingkasing dili madala sa pagpamugos nga naglibut kaninyo? Kon kamo napanalanginan nga naminyo, paglipay sa pakig-uban sa inyong kapikas ug sa mga anak. Kinahanglan nga walay bisan unsa nga sekreto sa usag usa. Kana maghatag og dakong kasiguroan sa padayon nga pagkamatarung ug kalipay. Kamong duha ang modesisyon sa mga isyu.
Padayona nga ang kahayag sa ebanghelyo magdan-ag sa inyong panimalay pinaagi sa pagtuon sa kasulatan, pag-ampo, ug pagbuhat sa mga butang nga inyong angayng buhaton. Tahura ug sunda ang mga pakigsaad sa templo kon inyo kining nadawat. Inom og maayo gikan sa tuburan sa gipadayag nga pulong sa Dios. Hupti gayud ang Iyang pulong. Pagbalaan sa Adlaw nga Igpapahulay. Sa laktud, padayon sa pagbuhat unsay inyong nasayran nga angayng buhaton. Bisan asa ka moadto, paduol sa Simbahan ug kanunay nga moalagad niini. Samtang wala pa maminyo, sunda usab kini nga mga tumong.
Isip talagsaong anak sa Dios, kamo gikinahanglan gayud. Adunay dinaliang panginahanglan sa dugang nga mga lalaki ug babaye sama ninyo nga mobarug alang sa mga baruganan batok sa nagkagrabe nga mga pagpamugos aron makompromiso kadtong mga baruganan. Gikinahanglan ang mga tawo kinsa mahalaron ug maisugong mobuhat sa unsay giklaro sa Ginoo nga husto—dili kadtong eksakto sa politika o gidawat sa katilingban. Kita nagkinahanglan og mga indibidwal nga adunay espiritwal, matarung nga impluwensya aron modasig sa uban nga mahalarong mopuyo. Kita nagkinahanglan og mga politiko nga may integridad, negosyante nga matinuoron ug limpyo og moral, mga abogado nga manalipod sa kaangayan ug sistema sa legal, ug mga opisyales sa gobyerno nga mopreserbar sa baruganan kay kini husto. Labaw sa tanan, kita nagkinahanglan og mga inahan ug amahan kinsa mopreserbar sa pagkabalaan ug kasiguroan sa panimalay ug integridad sa pamilya diin ang hugot nga pagtuo sa Dios ug pagkamasulundon sa Iyang mga sugo gitudlo isip pundasyon sa mabungahon nga kinabuhi.
Kamo mahimong mahinungdanon nga bahin nianang kahayag, kanang matarung nga impluwensya sa pagpalambo sa moral nga kinaiya sa inyong nasud ug sa mga panimalay niini. Daghan sa inyong mga higala nagpuyo para sa temporaryong kalipay. Wala sila makasabut sa panginahanglan sa mga baruganan, mahangturong mga balaod, ug kamatuoran. Sila gipadako sa palibut diin ang mga desisyon nakabase sa sirkumstansya karon o sa umaabot nga mga oportunidad aron makabintaha. Ipakita kanila ang mas maayo nga kinabuhi—mas maayo nga paagi. May mga butang nga sayop tungod kay ang Dios miingon nga kini sayop. Ang kamatuoran dili itino pinaagi sa hunahuna sa tawo, bisan kon unsa pa sila ka impluwensyal. Ang kamatuoran gitino sa Makagagahum nga Dios sa wala pa Malalang kining kalibutan. Ang kamatuoran anaa nga dili mausab hangtud sa kahangturan.
May temporaryong kalipay gikan sa gahum, impluwensya, o mga materyal nga bahandi, apan ang tinuod, mahangturon nga kalipay, sama sa inyong mabati sa sayo sa buntag kon kamo matinuoron sa inyong kaugalingon, maangkon lang pinaagi sa pagsunod sa mga pagtulun-an sa Dios. Kamo kinahanglan nga matinuoron, may integridad, maputli, mahiyason, ug andam sa pagsakripisyo sa usa ka butang nga madanihon—bisan klaro nga madanihon sa makadiyot—alang sa mas dako nga kaayohan sa umaabut. Ako naghisgut sa atong kaandam kon gikinahanglan sa pagsakripisyo sa tanang butang aron sa pagsunod sa tinuod nga mga baruganan.
Kalampusan sa Pagsunod sa Plano
Gusto kong mosugyot og 10 ka mga butang nga makatabang kaninyo nga magmalampuson diha sa plano nga gusto sa Ginoo nga inyong sundon sa inyong kinabuhi.
Una, pag-establisar og han-ay nga mga baruganan nga makagiya sa matag aspeto sa inyong kinabuhi—sa inyong panimalay, sa inyong pagserbisyo sa Simbahan, sa inyong propesyon, sa inyong komunidad. Daghang mga tawo mosulay sa pagbahin-bahin sa ilang kinabuhi ug maghimo og sumbanan para lang sa Simbahan ug laing sumbanan para sa negosyo ug sa uban pang mga aspeto sa ilang kinabuhi. Motambag gyud ko ninyo nga ayaw kana buhata. Aduna ray usa ka sumbanan nga mahinungdanon. Kini mao ang mga pagtulun-an ni Jesukristo, nga naghatag kanato og timaan sa kaimportante sa hugot nga pagtuo, pagserbisyo, pagkamasulundon ug integridad.
Ikaduha, ayaw paghimo og eksepsyon sa inyong mga sumbanan. Ayaw gayud ikompromiso kini. Usa sa paagi nga ang Ginoo moprotekta kanato mao ang paghatag kanato og giya sa kinabuhi. Usa sa paagi nga si Satanas mosulay sa paglaglag kanato mao ang paglingla nato nga malayo sa unsay importante sa atong kinabuhi. Ako nagpuyo sa Washington, D.C., halos sa tibuok nakong kinabuhi, ug nakahinumdom ko og higayon diin ang mga tawo miadto niining siyudad kinsa napili nga mga representante sa gobyerno ug mga miyembro sa Simbahan. Pipila kanila misunod sa mga pagtulun-an sa Manluluwas sa tibuok nilang pagpanarbaho ug nahimong talagsaong mga sulugoon. Uban kanila sa sayong bahin sa ilang panarbaho nang-rason, “Kon kita mas maayo nga mga higala sa uban ug mas daling ikasabut, kita makadawat og posisyon nga makahatag kanato og oportunidad diin kita mas makaserbisyo og maayo.” Sila misugod sa paghimo og ginagmayng mga eksepsyon sa mga sumbanan diin sila nasayud nga makagiya sa ilang kinabuhi. Gamay ra gani mahinumdom niini. Sila nawala tungod kay mihimo sila og eksepsyon sa mga sumbanan. Ayaw sunda kana nga sayop.
Magmaunungon sa mga pagtulun-an nga inyong nakat-unan gikan sa inyong ginikanan ug mga lider sa Simbahan. Kini bililhon kaayo. Kon inyong hiusahon ang inyong pormal nga edukasyon sa inyong nahibaloan mahitungod sa mga pagtulun-an sa Ginoo ug sa mga ehemplo sa mga tawo nga inyong modelo, kamo may lig-ong pundasyon. Kamo magmabungahon ug mobuhat sa mga butang nga maayo alang sa uban.
Ikatulo, magmaunungon. Magmaunungon sa inyong ginikanan ug sa mga minahal. Labaw sa tanan, magmaunungon kang Jesukristo, ang Manluluwas. Ang kalampusan moabut kon ang inyong mga buhat nahiuyon sa mga pagtulun-an sa Ginoo. Kon kamo mangita og trabaho, pangitaa kanang makahagit kaninyo, nga makapalambo kaninyo. Kini mahimong lisud, apan kamo motubo, molambo pag-ayo, ug motampo og mas daghan nga kaayohan. Kamo wala pa kaayoy ideya kon kinsa kamo ug unsay inyong makab-ut sa kinabuhi. Kamo adunay dakong potensyal sobra pa sa inyong mahunahuna karon.
Ikaupat, pagpakabuhi nga ang Ginoo makagiya ninyo asa Niya gusto kamo mabutang ug makaserbisyo. Mahimo Niya kini kon kamo takus nga nagsunod sa Iyang mga sugo ug maningkamot sa tanang paagi nga magmasulundon sa Iyang mga pagtulun-an.
Ikalima, pagserbisyo sa uban. Ang pagpakigbahin sa inyong nahibaloan ngadto sa uban makapalipay ninyo ug makapanalangin sa ilang kinabuhi.
Ikaunom, pahiyom. Wala ko magpasabut nga kinahanglang magpasiaw ka matag adlaw, apan ang panagsang maayo nga komedya makapawala sa stress. Ang kinabuhi dili ingon ana ka bati. Sa dili madugay inyong mahibaloan nga ang tanan may mga problema ug walay gustong makadungog sa imong problema. Ipadaplin kana nga mga butang ug pahiyom. Pagpasiaw, sama sa mga propeta. Unta makasulti ko kaninyo sa pipila sa among mga pasiaw. Dili butang nga makapaubos, ni mga butang nga dili angay—maayo lang nga pasiaw. Sultihan ko kamo sa sekreto kon unsaon pagbangon inigka buntag nga may pahiyom sa inyong nawong bisan unsa pa ang inyong gibati: katulog nga may hanger sa inyong ba-ba. Hinumdumi, ang maayo nga pasiaw makatabang gyud ninyo.
Ikapito, ayaw pagreklamo. Ang kinabuhi dili kanunay patas. Kamatuoran kana. Apan kini may talagsaong mga oportunidad kon kamo kahibalong mangita niini. Nakahinumdom ko kausa nga nagkugi ko kutob sa akong mahimo. Nagtrabaho ko sa usa ka tawo nga gikopya ang tanan nakong mga ideya ug sugyot ug buhat nga akong nahimo ug gipasa kini ngadto sa iyang agalon nga morag iyaha na nga kaugalingong mga sugyot. Naglagot ko kadiyot kabahin niana. Samtang namalandong ko niini, nakahunahuna ko, ug mihukom ko nga sugod adto mo-report ko niya sa tanan nakong gihimo o gipaningkamutang himoon, ug mipadala og kopya sa iyang agalon. Wala siya ganahi niini, apan epektibo kini.
Ikawalo, kanunay nga may buluhaton sa Simbahan. Wala ko magpasabut nga kinahanglang mangayo mo og piho nga calling, apan bisan asa mo nga dapit sa kalibutan, bisan asa ang Ginoo nagkinahanglan kaninyo, kanunay itanyag ang inyong serbisyo sa nagdumala nga awtoridad. Isalig kini sa may awtoridad sa pagdesisyon kon asa ug unsaon. Paduol kanunay sa Dios ug sa mga paagi sa pagserbisyo Kaniya.
Ang katapusang duha mao ang labing importante.
Ikasiyam, adto sa templo. Pagkupot og magamit nga rekomend sa templo. Mahimong may pipila nga gustong unya na moadto sa templo alang sa ilang endowment kon sila ibugkos na sa ilang kapikas. Apan ang tanan mahimong makaangkon ug magkupot og rekomend sa templo. Kini makatabang ninyo nga mahiangay kanunay sa espiritu, makapahinumdom kaninyo sa labing importanting mga butang sa kinabuhi, ug makadasig kaninyo sa pagserbisyo sa uban.
Ikanapulo, himoa nga ang Manluluwas nga si Jesukristo maoy inyong ehemplo sa kinabuhi. Gamita ang Iyang mga pagtulun-an isip inyong handbook sa kinabuhi. Ayaw paghimo og eksepsyon niini.
Mainampoon ba ninyong ikonsiderar ang mga butang nga atong nahisgutan? May daghan nga andam nga magiyahan sa inyong matarung nga ehemplo. Tungod kay kamo nalamdagan, kinahanglang ipakita ninyo ang inyong pinakamaayo nga ehemplo niadtong nagsunod kaninyo. Dili lang sila mapanalanginan, ang inyong kinabuhi mahimong mabungahon usab. Sayri ang talagsaong impluwensya alang sa maayo nga miresulta gikan sa indibidwal nga mga buhat tungod sa konsensya ug baruganan base sa kamatuoran. Paningkamuti nga ang matag higayon sa inyong kinabuhi mopakita sa inyong determinasyon nga mapainubsanong mahimong ehemplo sa pagkamatarung, integridad, ug konbiksyon. Sa ingon niana nga kinabuhi kamo siguradong molampus sa inyong mga katuyoan dinhi sa kalibutan.
Buhata Ang Matarung
Gisugdan ko kini nga mensahe nga nagpasabut nga ako mismo makapamatuod sa mga baruganan nga gipakigbahin. May mga higayon nga ang akong gipili nga baruganan batok sa kusog nga pwersa nagpasabut nga may dakong personal nga kawala sa pagsunod niini. Apan kana wala makapugong kanako. Ako determinado sa pagbuhat unsay matarung. Ang gituohan nga pagkawala, hinoon, wala mahitabo. Sa laing bahin, ang pagbuhat sa husto nakahatag og mas dako ug mas makahuluganong mga oportunidad. Ako mopamatuod nga kamo dili gyud masayop kon kamo mosalig sa Ginoo ug sa Iyang mga saad, dili igsapayan kon unsa ka grabe ang hagit.
Mahimo bang mopakigbahin ko og usa ka kasinatian kaninyo? Nagserbisyo ko sa US Navy uban ni Admiral Hyman G. Rickover, usa ka mapugsanon nga tawo. Sa dihang gitawag ko nga mahimong presidente sa misyon, siya misulay sa pagdani nako nga dili moadto. Sa dihang misulti ko nga usa ka propeta sa Dios ang mitawag nako, siya miingon, “Kon mao kana ang paagi sa Mormons, dili ko sila dawaton nga magtrabaho sa akong programa.” Nasayud ko nga may daghang mga pamilya sa Idaho, USA, nga nag-agad niadtong programaha, ug ako nabalaka niini.
Samtang nag-ampo ko, usa ka kanta akong nahunahuna: “Buhata gyud kon unsa ang matarung” (“Buhata Unsa Ang Matarung,” Mga Himno ug mga Awit sa mga Bata, nu. 34). Ako ning gisunod. Dili nako makita kon unsang paagi ang mga hagit nga among giatubang masulbad sama sa akong gilauman sa indibidwal nga mopuli nako, apan “buhata gyud kon unsa ang matarung.” Mamaayo ra ang tanan.
Sa dihang si Admiral Rickover nasayud nga molarga nako sa misyon, siya miingon nga dili na siya gustong makakita nako pag-usab ug dili na gustong makig-istorya nako. Sa katapusang adlaw sa akong pagtrabaho uban kaniya, ako mihangyo og appointment. Ang sekretarya nakalitan, naghunahuna nga may awayng mahitabo.
Misulod ko, ug miingon siya, “Scott, lingkod. Unsay imong tuyo? Gibuhat nako ang tanan sa pag-usab sa imong desisyon. Unsa pa ang imong tuyo?”
Gihatagan ko siya og kopya sa Basahon ni Mormon ug miingon, “Admiral, nagtuo ko sa Dios. Ug nagtuo ko nga kon buhaton nato kutob sa atong mahimo, Siya motabang nato.”
Dayon misulti si Admiral Rickover nga wala gyud nako damhang madungog. Siya miingon, “Kon mahuman na ka sa imong misyon, gusto kong mobalik ka ug motrabaho uban kanako.”
“Buhata gyud kon unsa ang matarung; bisan unsa pay mahitabo.”
Unta ang Ginoo molig-on sa inyong determinasyon, sa inyong pagbansay og hugot nga pagtuo, ug sa inyong nagkalig-on nga kinaiya nga kamo mahimong instrumento sa kaayohan nga Iyang gusto nga kamo mamahimo. Nagpamatuod ko nga Siya buhi. Samtang kamo takus nga magtinguha sa Iyang tabang, Siya mogiya kaninyo sa inyong kinabuhi. Ako nagpamatuod niini kutob sa akong mahimo. Si Jesukristo buhi. Siya naggiya sa Iyang buhat dinhi sa yuta.
Isip mga Apostol ni Ginoong Jesukristo, kami may mga kasinatian nga hilabihan ka sagrado nga makapahimo namo sa pagpamatuod sa Iyang ngalan ug sa Iyang gahum. Ako ning gibuhat uban sa lawom nga konbiksyon. Si Jesukristo nahigugma kaninyo. Siya mogiya kaninyo sa inyong kinabuhi. Sa panahon sa dakong hagit, kon kamo maglibog unsay inyong buhaton, luhod ug paghangyo sa inyong Amahan sa Langit sa pagpanalangin kaninyo ug himoa nga ang inyong hugot nga pagtuo sa Manluluwas ug sa Iyang Pag-ula maoy pundasyon sa inyong malampusong kinabuhi.