Mga Timailhan

Ni Jerry Peak

Naghunahuna ko kon kapila nako gibaliwala ang akong espirituhanon nga kasiguroan tungod kay naka-focus ko sa kalibutanong mga butang.

Kasagaran moagi ko sa usa sa lokal nga mga freeway padulong sa trabaho. Kini mao ang pinakadali ug pinakasayon nga agianan aron makaabut didto. Naningkamot ko nga mobiya og sayo-sayo sa buntag aron makalikay sa huot sa trapiko, sa dihang mohinay na ang dagan ug mahitabo ang mga aksidente.

Usa ka buntag, bisan pa niana, nakagawas ako sa balay ulahi na kay sa naandan ug natanggong sa kahuot sa trapiko. Samtang nagpaingon ko sa freeway, naghunahuna ko sa akong pagtuon sa kasulatan nianang buntaga. Aduna akoy impresyon nga nag-focus ra kaayo ko sa kalibutanong mga butang ug wala kaayo sa espirituhanong mga butang. Samtang nagdrayb ko paingon sa trabaho, naghunahuna ko kon unsaon nako nga mas maminaw sa espirituhanong mga butang sa tibuok adlaw.

Dayon akong nakita ang mensahe sa usa ka dako nga electronic nga karatula ibabaw sa freeway nga nagpasidaan sa mga drayber sa mga aksidente o mga kahimtang sa dalan. Samtang nagkaduol ko, akong nabasa, “Bangga sa unahan sa Mesa Drive—ang tunga nga dalan naalihan.” Dili ko gustong mahasol pinaagi sa pagbiya sa freeway, busa naghunahuna ko kon unsa ka dugay ako magpabilin diha sa freeway sa dili pa ko kinahanglang mogawas.

Dayon aduna say laing misantop sa akong hunahuna: kon akong ibaliwala ang karatula, gibutang ba nako ang akong kaugalingon sa sitwasyon nga makuyaw? Gibaliwala ba nako ang pasidaan tungod kay dili ko gusto nga mabalda ang akong iskedyul? Klaro, nga mas hilig kong mobaliwala sa mga pasidaan sa akong pisikal nga kasiguroan; makapila na nako wala panumbalinga ang mga aghat alang sa akong espirituhanong kasiguroan?

Samtang ako namalandong kon unsaon nga mas maminaw sa Espiritu, nakaamgo ko nga ang Langitnong Amahan tingali nagpadala nako og daghang mga mensahe sa tibuok adlaw. Naghunahuna ko kon kapila nako gibaliwala ang Iyang mga mensahe tungod kay ako wala maminaw sa espirituhanong mga aghat. Mipasalig ko nga mas maningkamot.

Gisusi nako ang trapik, mibalhin og lane, ug migawas sa sunod nga exit. Pinaagi sa paggamit sa mga karsada sa siyudad padulong sa trabahoan, nakalikay ko sa tanang peligro ug mga kakuyaw sa pagpabilin sa freeway samtang giasikaso ang aksidente.

Nasayud ko nga ang Ginoo nahigugma nako pag-ayo aron mopadala nako sa Iyang mga mensahe. Kinahanglan lamang nga mahiangay ko sa espiritwal nga mga aghat nga Iyang gipadala nako.

Ang tagsulat nagpuyo sa Arizona, USA.