Alang sa Kalig-on sa Kabatan-onan
Matinud-anon, Mahigugmaong Pagserbisyo
Ang Kristohanong pagserbisyo nagdapit sa Espiritu Santo ug makahatag og saad sa kalinaw.
Gilitratohan ni Reeve A. Nield
Akong nasaksihan ang hingpit nga kalipay sa putli, dili hinakog nga serbisyo nga gipakita niini nga mga litrato sa usa ka batang lalaki nga ginganlan og Elijah naghatag sa iyang sinina ngadto sa usa ka bag-ong higala nga iyang nahimamat sa usa ka hilit nga balangay sa Africa.Si Elijah nakakita og dinalian nga panginahanglan, ug dayon siya mitabang. Sama sa batan-ong Elijah, kita adunay oportunidad sa pag-alagad sa uban sa daghang mga paagi. Dili kinahanglang ihatag nato ang atong sinina, apan kon kita maminaw sa mga aghat sa Espiritu Santo, kita masayud kinsa ang alagaran ug unsaon sa pagtabang kadtong nanginahanglan.
“Ang pag-alagad sama ra sa pagsunod sa mga sugo sa Dios”, ug kini nagrepresentar sa atong gugma sa Ginoo.1 Ang Manluluwas mitudlo, “Kon kamo nahigugma kanako kamo mag-alagad kanako ug maghupot sa akong tanan nga mga sugo” (D&P 42:29); “higugmaa ang Ginoo nga inyong Dios uban sa inyong tibuok nga kasingkasing, uban sa inyong tibuok nga gahum, hunahuna, ug kusog; ug sa ngalan ni Jesukristo kamo moalagad kaniya” (D&P 59:5). Sa bunyag nakigsaad kita nga kita moalagad sa Dios ug mosunod sa Iyang mga sugo (tan-awa sa Mosiah 18:10). Isip mga sumusunod ni Kristo, kita kanunay nga maningkamot sa pag-apil sa Iyang buhat, ug kana naglakip sa pag-alagad.
Pag-alagad: Ang Ebanghelyo nga Inubanan sa Lihok
Ang pag-alagad mao ang ebanghelyo ni Jesukristo inubanan sa lihok, ug kini klaro sa usa ka istorya nga akong ganahan mahitungod ni Brigham Young. Sa pagkahibalo nga gatusan sa mga pioneer nga nagkariton nga natanggong sa kapatagan sa kahimtang nga dili maantus, siya mitudlo uban sa gahum niining yanong wali niadtong Oktubre 1856 nga kinatibuk-ang komperensya: “Ako karon mohatag niini nga mga katawhan sa mga hilisgutan ug mga pulong alang sa mga Elder nga gustong mosulti, … mao kini, … daghan sa atong mga kaigsoonan anaa sa kapatagan nga may karomata, ug tingali daghan karon nga 700 ka mga milya gikan niining lugara, ug kinahanglang madala sila dinhi, kinahanglang magpadala kita og tabang ngadto kanila. Ang mga pulong mao kini, ‘sa pagdala nila dinhi.’ …
“Mao kana ang akong relihiyon; kana mao ang gidiktar sa Espiritu Santo nga ania kanako, nga mao ang pagluwas sa mga tawo. …
“Ako motawag sa mga Bishop karong adlawa, dili ako makapaabut hangtud ugma, ni hangtud sa sunod adlaw, sa 60 ka mga team sa maayo nga mga asno ug 12 o 15 ka mga karwahe. Dili ko gusto nga magpadala og mga baka, gusto ko og himsog nga mga kabayo ug mga asno. Sila anaa niini nga Teritoryo, ug kinahanglan makuha nato sila; usab sa 12 ka tonilada nga harina ug 40 ka maayong mga tigmaneho sa karwahe, gawas niadtong mga tiggiya sa mga hayop. …
“Sultihan ko kamo nga ang tanan ninyong pagtuo, tinuohan, ug propesyon sa tinuohan, dili gayud makaluwas og usa ka kalag ninyo sa celestial nga gingharian sa atong Dios, gawas kon mobuhat kamo bisag sa ingon nga mga baruganan sama sa gitudlo nako ninyo karon. Adtoa ug dad-a ngari karon kadtong mga tawo nga anaa sa kapatagan.”2
“Luwasa ang mga tawo”—mao kana ang sugo. Kon kita moalagad sa uban, kita apil sa buhat sa kaluwasan. Sama sa gitudlo ni Haring Benjamin, “Kon kamo anaa sa pag-alagad sa inyong mga isigkatawo kamo anaa lamang sa pag-alagad sa inyong Dios” (Mosiah 2:17).
Mga Oportunidad sa Palibut
Mga paghulagway sa litrato pinaagi ni Sidney Hatada, Christina Smith, ug Whitney Tutt; background pinaagi sa iStockphoto/Thinkstock
Dili kita kinahanglan nga motan-aw og layo kaayo sa pagpangita og mga oportunidad sa pag-alagad. Ang atong buhi nga propeta, si Presidente Thomas S. Monson mitudlo: “Gilibutan kita niadtong nanginahanglan sa atong pagtagad, atong pagdasig, atong suporta, atong paghupay, atong kamabination—mga sakop man sila sa pamilya, mga higala, mga kaila, o mga estranghero. Kita ang mga kamot sa Ginoo dinhi sa yuta, uban sa mando nga moserbisyo ug motabang sa Iyang mga anak. Nagdepende Siya sa matag usa kanato.”3
Ang Atong Amahan sa Langit nagsugo nato sa pagpahigayon sa paghupay sa uban sa espirituhanon ug temporal nga paagi (tan-awa sa Mosiah 4:26). “Ang atong labing importante nga serbisyo nga mahatag ngadto sa uban niining kinabuhia … mao ang paggiya nila ngadto ni Kristo pinaagi sa hugot nga pagtuo ug paghinulsol.”4 Kita nagpakita og ehemplo sa pagsunod sa mga sumbanan sa ebanghelyo. Kita nagpakigbahin sa mensahe sa ebanghelyo ni Jesukristo. Naghimo kita sa family history ug nagdala og mga family name ngadto sa templo alang sa atong mga katigulangan. Kasagaran, ang gamay ug mabinationg mga buhat sa pag-alagad sama sa usa ka yano nga pahiyom, usa ka mahigalaon nga hello, usa ka mainit nga paggakos, o usa ka mubo nga sulat sa pasalamat mao ra ang gikinahanglan sa pagbayaw sa mga kasingkasing ug pagdasig sa mga kalag. Sa ubang mga okasyon, ang dakong sakripisyo sa panahon ug kusog mahimong gikinahanglan.
Apan sa matag higayon, matinud-anon, mahigugmaong, sama kang Kristo nga pag-alagad nagdapit sa pagpakig-uban sa Espiritu Santo ug magdala ngadto sa matag usa nato sa saad sa “kalinaw niini nga kalibutan, ug sa kinabuhi nga dayon diha sa kalibutan nga umaabut (D&P 59: 23).