Unsaon sa Pagsulat sa Inyong Basahon sa Kinabuhi
Gikan sa usa ka fireside sa Church Educational System nga gihatag niadtong Nobyembre 1, 1992.
Paghulagway sa litrato pinaagi ni John Luke
Ania ako aron sa pagpangutana ninyo mahitungod sa mahangturong mga panumduman nga inyong gitipigan sa inyong mga kinabuhi. Gisundan ba kini og komentaryo nga “Maayo unta og nakahimo ko,” o makasulti ba mo nga, “Nalipay ko nga akong nahimo”?
Sa paghinumdom sa kasaysayan, kon kita makapili og usa lamang ka baruganan nga makatampo sa “Nalipay ko nga akong nahimo” nga mga handuman, unsa kaha kini? Kini ang baruganan sa pagkamasulundon.1
Kitang tanan nagsulat kada adlaw sa atong basahon sa kinabuhi. Usahay atong susihon ang mga sinulat nga atong gihimo. Unsa nga matang sa mga handumanan ang mosulod sa inyong hunahuna samtang kamo mosusi sa mga pahina sa inyong personal nga mga sinulat? Pila ka pahina ang molangkob sa “Maayo unta og nakahimo ko? Aduna bay mga sinulat sa paglangay-langay ug pagkapakyas sa pagpahimulos sa espesyal nga mga oportunidad? Makaplagan ba ninyo ang dili mahunahunaon nga pagtagad sa pamilya, mga higala, o gani estranghero? Aduna bay mga pagbasol resulta sa mga buhat nga dili matarung ug pagkamasinupakon?
Maayo gani, ang matag adlaw naghatag og limpyo, puti nga pahina nga makausab sa mga sinulat gikan sa “maayo unta og nakahimo ko” ngadto sa “nalipay ko nga akong nahimo” pinaagi sa proseso sa pag-ila, pagbasol, paghinulsol, ug pag-uli. Ang pagbati sa depresyon sa nangagi nga mga binuhatan o sa nawalang mga oportunidad mapulihan sa handumanan nga puno sa tumang kalipay, kadasig, ug sa hingpit nga kalipay sa pagpuyo.
Samtang inyong susihon ang handumanan nga inyong gibutang sa inyong basahon sa kinabuhi, makita ba ninyo kadtong gisulti sa Ginoo sa pagkamasulundon sa Iyang mga balaod? Aduna bay mga sertipiko sa bunyag, mga ordinasyon sa priesthood sa Aaronic ug Melchizedek Priesthood alang sa batan-ong mga lalaki ug mga sertipiko sa Pahalipay sa Batan-ong Pagkababaye alang sa batan-ong mga babaye, ug, siyempre, sulat sa madungganong pagka-release gikan sa usa ka full-time nga misyon? Aduna bay bag-ong rekomend sa templo, mga resibo sa ikapulo, kaminyoon nga gipahigayon diha sa balaan nga templo, ug pagdawat sa priesthood ug auxiliary nga mga tawag?
Ang akong tambag kaninyo mao ang pagpuno sa inyong handumanan ug sa inyong basahon sa kinabuhi og daghang mga kalihokan sa “nalipay ko nga akong nahimo” kutob sa mahimo (tan-awa sa Mosiah 2:41).
Pagbaton sa pasalig ug disiplina sa pagpangita niadtong positibong mga kasinatian nga mosangpot sa kalingkawasan ug kinabuhing dayon. Kini mao ang akong saksi nganha kaninyo nga ang Dios buhi. Pinaagi sa pagpahiangay sa atong mga kinabuhi sa Iyang balaod nga kita makakaplag sa tinuod nga kalipay dinhi ug mahangturon nga mga oportunidad sa kinabuhi nga moabut.