Mga Panalangin sa Templo
Gikan sa usa ka debosyonal nga pakigpulong, “Temple Blessings,” nga gihatag didto sa Brigham Young University niadtong Nobyembre 15, 2005. Alang sa kompleto nga teksto sa Iningles, bisitaha ang speeches.byu edu.
Ang makaluwas nga mga ordinansa sa templo mga kinahanglanon—ug gani mao ang pinaka-focus sa—mahangturong plano sa kalipay.
Paghulagway sa litrato pinaagi ni Craig Dimond
Ang mga panalangin sa temple endowment ingon ka importante sa matag usa kanato sama sa atong bunyag. Sa ingon niini nga rason kinahanglan nga atong andamon ang atong mga kaugalingon nga kita limpyo aron makasulod sa templo sa Dios. Ang buhat sa templo usa ka oportunidad sa pagpahigayon sa atong personal nga mga endowment ug mga pakigsaad alang sa mga buhi ug usab sa pagpahigayon niining sama nga mga ordinansa alang sa mga patay. Tungod niini nga rason kita gisugo sa mga kasulatan sa pagtukod og mga templo ug sa pag-andam sa atong mga kinabuhi nga takus sa pag-ambit sa sagradong mga ordinansa ug mga pakigsaad sa templo.
Gitudloan kita sa mga kasulatan nga ang personal nga katakus nga gikinahanglan sa Ginoo kanato sa pagsulod sa templo ug sa pagdala sa sagradong mga pakigsaad mao ang usa sa labing mahinungdanon nga mga panalangin nga atong maangkon sa pagkamortal. Dayon, human sa atong pagpakigsaad didto sa templo, ang atong pagkamasulundon sa pagtuman sa mga pakigsaad sa matag adlaw mao ang usa ka pagpakita sa atong hugot nga pagtuo, gugma, debosyon, ug espirituhanon nga pasalig sa pagtahud sa atong Langitnong Amahan ug sa Iyang Anak, si Jesukristo, ug nag-andam nato sa pagpuyo uban Kanila sa kahangturan. Ang makaluwas nga mga ordinansa sa templo mga kinahanglanon—ug gani mao ang pinaka-focus sa—mahangturong plano sa kalipay.
Ang Balaang Templo
Kinahanglang makabaton kita og pagpamatuod ug pagbati nga may balaan nga pagtahud kon anaa sa balay sa Ginoo. Ang templo sa tinuoray usa ka lugar diin kamo “anaa sa kalibutan apan dili kalibutanon.” Kon kamo anaa sa kasamok ug adunay importante kaayo nga mga desisyon nga naghasol sa inyong hunahuna ug kalag, mahimo ninyong dad-on kining mga kabalaka ngadto sa templo ug makadawat og espirituhanong giya.
Aron sa pagpreserbar sa pagkabalaan sa templo aron ang templo magpabiling putli ug sa pagdapit sa Espiritu sa pagpanalangin niadtong kinsa mosulod sa balaan nga templo alang sa ilang mga ordinansa ug mga pakigsaad, kita gitudloan nga walay mahugaw nga butang ang mahimong makasulod sa templo. Ang balaan nga pagtahud diha sa templo importante nga butang sa pagdapit sa Espiritu nga magpabilin sulod niini matag oras sa matag adlaw.
Sa bata pa ako, ang akong amahan midala nako gikan sa Long Island, New York, USA, sa paglakaw sa mga nataran sa Salt Lake Temple, sa siyudad sa Salt Lake, sa paghikap sa templo, ug sa paghisgot sa kaimportante sa templo sa akong kinabuhi. Mao kanang higayona nga ako mihukom nga sa umaabut nga adlaw ako mobalik aron sa pagsulod sa templo ug dawaton ang mga ordinansa.
Ang templo usa ka sagrado nga balay, usa ka balaan nga lugar diin ang importante nga makaluwas nga mga seremonya ug mga ordinansa pagahimoon aron sa pag-andam nato alang sa kahimayaan. Importante nga kita makaangkon og sigurado nga kahibalo nga ang atong pagpangandam sa pagsulod sa balaan nga balay ug ang atong pag-apil niining mga seremonya ug mga pakigsaad mao ang pipila sa labing importanting mga panghitabo nga atong masinati sa atong mortal nga kinabuhi.
Ang mga Panalangin sa Templo sa tibuok Kasaysayan
Sa tibuok kasaysayan, sa matag dispensasyon, ang Ginoo misugo sa iyang mga propeta nga ang mga templo kinahanglang pagatukuron aron ang Iyang mga katawhan makadawat sa mga ordinansa sa templo.
Ang Kirtland Temple mao ang unang templo niining ulahing mga adlaw, ug kini adunay importante nga bahin sa pagpahiuli sa mga yawe sa priesthood. Ang Manluluwas mipakita nga may himaya ug midawat sa Kirtland Temple isip Iyang balay. Niana nga okasyon si Moises, Elias ug Elijah nagpakita aron sa paghatag ngadto kang Joseph Smith sa mga yawe nga gihuptan sa ilang mga dispensasyon. Si Elijah mipahiuli sa mga yawe sa iyang dispensasyon ingon sa gisaad ni Malaquias aron kita makatagamtam sa mga panalangin sa templo sa atong mga kinabuhi. (Tan-awa sa D&P 110.)
Ang Ginoo Nagpakita didto sa Templo sa Kirtland, ni Del Parson
Ang Nauvoo Temple mao ang unang templo sa ulahing adlaw diin ang mga endowment ug mga sealing gipanghimo, diin naghatag og dakong kalig-on ngadto sa mga pioneer samtang sila naglahutay sa mga kalisud sa pagtabok sa kapatagan ngadto sa Zion sa Salt Lake Valley.
Sa dihang gipriso si Joseph Smith sa Carthage, klaro nga ang pagkahuman sa templo importante kaayo kaniya. Siya nasayud kon unsay gikinahanglan sa mga Santos ug aron makabaton sa kalig-on sa paglahutay kon unsay nagpaabut kanila sila kinahanglang matugahan sa gahum—ang gahum sa priesthood.
Ang atong mga katigulangan nga pioneer na-sealed isip mga pamilya didto sa Nauvoo. Ang ilang mga pakigsaad sa Ginoo didto sa Nauvoo Temple mao ang ilang proteksyon panahon sa ilang panaw sa kasadpan, ingon man alang sa matag usa nato karon ug sa tibuok natong kinabuhi Ang mga ordinansa ug mga pakigsaad sa templo mao ang panalipod nato alang sa atong mga pagsulay ug mga kalisdanan sa atong panahon ug sa unsay atong atubangon sa umaabut. Kini mao ang atong panulundon. Kini mao kinsa kita.
Pagbiya sa Nauvoo, ni Glen S. Hopkinson, dili mahimong pakopyahan
Alang niining unang mga Santos, ang ilang pag-apil sa mga ordinansa sa templo importante sa ilang mga pagpamatuod samtang sila nag-atubang sa kalisdanan, sa masuk-anong mga tawo, nga gipapahawa sa komportable nga mga panimalay sa Nauvoo, ug sa taas ug lisud nga biyahe sa unahan. Sila natugahan og gahum diha sa balaan nga templo. Ang bana ug asawa na-sealed sa usag usa. Ang mga anak na-sealed ngadto sa ilang mga ginikanan. Daghan kanila ang namatyan og mga miyembro sa pamilya sa ilang pagpadulong, apan sila nasayud nga dili kadto ang katapusan para kanila. Sila na-sealed na sa templo hangtud sa kahangturan.
Ang mga Ordinansa sa Templo—mga Endowment ug Sealing
Ang templo mao ang labing dako nga unibersidad sa pagkat-on nga nahibaloan sa tawo, naghatag nato og kahibalo ug kaalam kabahin sa Paglalang sa kalibutan. Ang mga paghugas ug pagdihog nagsulti nato kinsa kita. Ang mga instruksyon sa endowment naghatag og giya kon unsaon nato sa pagpakabuhi dinhi sa pagka-mortal (tan-awa sa D&P 97:13–14).
Ang nag-unang katuyoan sa templo mao ang pagsangkap sa mga ordinansa nga gikinahanglan sa atong kahimayaan sa celestial nga gingharian. Ang mga ordinansa sa templo mogiya nato ngadto sa atong Manluluwas ug mohatag nato sa mga panalangin nga moabut nato pinaagi sa Pag-ula ni Jesukristo. Ang kahulugan sa pulong nga endowment mao ang “gasa.” Ang ordinansa naglangkob og sunod-sunod nga mga instruksyon kon unsaon nato sa pagpakabuhi ug sa mga pakigsaad nga atong pagahimoon aron magpuyo nga matarung pinaagi sa pagsunod sa atong Manluluwas.
Litrato sa sulod sa Kansas City Missouri Temple ni Matthew Reier
Laing importanting ordinansa mao nga ma-sealed hangtud sa kahangturan sa celestial nga kaminyoon. Kini nga pagkigsaad sa kaminyoon nagtugot sa mga anak nga ma-sealed ngadto sa ilang mga ginikanan ug ang mga anak nga natawo sa pakigsaad mahimong kabahin sa usa ka mahangturon nga pamilya.
Ang Doktrina ug mga Pakigsaad nagtudlo nato: “Bisan unsa ang imong bugkuson diha sa yuta pagabugkuson didto sa langit; ug bisan unsa ang imong bugkuson diha sa yuta, diha sa akong ngalan ug pinaagi sa akong pulong, miingon ang Ginoo, kini nabugkos sa gihapon didto sa mga langit; ug kang bisan kinsa nga mga sala nga ikaw mopasaylo diha sa yuta pasayloon sa gihapon didto sa mga langit; ug kang bisan kinsa nga mga sala nga ikaw dili mopasaylo diha sa yuta dili pasayloon didto sa langit” (D&P 132:46).
Kon ang magtiayon nagluhod sa altar, isip usa ka sealer ako nasayud sa akong tahas isip representante sa Ginoo. Ako nasayud nga kon unsa ang gi-sealed dinhi sa yuta sa literal nga paagi na-sealed didto sa langit—dili na gayud pagabulagon kon kadtong na-sealed magpabilin nga matinud-anon ug molahutay hangtud sa kahangturan.
Ang mga salamin sa nag-atbang nga bongbong sa sealing room sa templo gipahimutang aron makahimo og biswal nga impresyon sa walay katapusan nga mga imahe. Magtan-aw sa mga salamin sa usa ka bahin sa kwarto nagrepresentar sa kahangturan sa panahon sa atong pagbiyahe paingon dinhi sa yuta. Sa atong pag-atubang sa laing bahin sa kwarto, nagtan-aw kita sa walay katapusan nga mga imahen nga nagsimbolo sa kahangturan human kita mobiya niining kinabuhia dinhi sa yuta. Ang sealing room mismo nagrepresentar sa atong mortal nga pagsulay dinhi sa yuta. Ang leksyon nga makat-unan niini nga kasinatian sa templo mao nga kita nakahimo sa eksaktong mga pagpili nga moanhi sa yuta ug sa pagsinati sa pagka-mortal ug nga kon sa unsang paagi kita nagpuyo sa atong kinabuhi niining mubo nga panahon motino kon sa unsang paagi kita magpuyo sa kahangturan nga moabut.
Kamo nag-andam sa pag-atubang sa mga pagsulay sa mortal nga kinabuhi. Boluntaryo kitang mianhi niining mortal nga pagsulay gikan sa presensya sa Dios nga Amahan uban sa kabubut-on, nasayud nga kita makasinati og “katugbang sa tanan nga mga butang” (2 Nephi 2:11). Ang atong tumong (tan-awa sa 1 Nephi 15:14) mao ang pagdala sa tibuok taming sa Dios ug pagbuntog sa “nagdilaab nga mga pana sa kaaway” (D&P 3:8) uban sa atong mga espada sa Espiritu ug mga panagang sa hugot nga pagtuo (tan-awa sa D&P 27:15–18), sa paglahutay hangtud sa katapusan, ug aron mahimong takus nga mobarug ug mopuyo diha sa atubangan sa Dios nga Amahan ug sa Iyang Anak, si Jesukristo, hangtud sa kahangturan—aron makab-ot sa unsay gitawag nga kinabuhing dayon.
Ako mohatag kaninyo sa akong pagpamatuod nga ang Dios buhi; nga si Jesus mao ang Kristo; ug nga si Joseph Smith, ang Propeta sa atong dispensasyon, mipahiuli sa mga panalangin sa priesthood nga motugot nato sa pag-ambit sa mga panalangin sa templo.