Magpakahisama ni Ammon

Kini nga bayani gikan sa Basahon ni Mormon makatudlo nato og daghan kabahin sa misyonaryo nga buhat ug sa pagpaaktibo karon.

Mga paghulagway pinaagi ni Dan Burr

Si Ammon usa ka bayani diha sa Basahon ni Mormon, nailhan sa iyang maisugong pagserbisyo nga naglakip sa pagpanalipod sa mga panon ni Lamoni, usa ka hari sa Lamanite (tan-awa sa Alma 17:25–39; 18:1–10). Ang istorya ni Ammon, sama sa ubang mga panghitabo diha sa Basahon ni Mormon, makatudlo kanato og daghan kon unsaon sa pagpahimulos sa mga oportunidad ug pagbuntog sa mga hagit nga atong giatubang karon.

Usa ka Makahuluganong Misyon

Si Suzanne E. Tarasevich sa Millville, New Jersey, USA, nakakat-on og pipila ka mga leksyon gikan ni Ammon samtang nagserbisyo og full-time nga misyon uban sa iyang bana, si Adolf.

“Sa dihang ang dako, puti nga sobre nga anaa sa among mission call nga miabut sa among mailbox,” siya miingon, “ang akong bana ug ako nalipay kaayo. Nagpuasa ug nag-ampo mi kabahin sa among call. Dili tungod kay nabalaka mi kon asa ang assignment, apan nagtinguha mi og maayo sa kumpirmasyon nga ang among abilidad magamit sa pagtuman sa among calling.

“Sa wala madugay nianang gabhiona, uban sa among mga anak ug apo nga nagkapundok, among giablihan ang sobre ug gibasa ang among call ngadto sa Poland Warsaw Mission. Samtang amo kining gibuhat, mibati mi og kalinaw sa kasingkasing nga kini, mao gyud, ang buluhaton nga para namo. Nalipay gyud mi kaayo.”

Hinoon, sa pag-abut na didto sa misyon, si Sister Tarasevich nanlimbasog sa pagsabut kon unsay iyang mahimo. “Gihatagan dayon ang akong bana og mga buluhaton nga nakahatag niya og mga hagit, mga oportunidad sa paglambo sa pagpangulo,” siya miingon. “Bisan kon kaming duha dili makasulti og Polish, ang iyang pagserbisyo ingon og epektibo bisan pa sa mga babag sa pinulongan.” Sa laing bahin, siya miingon, “ako mibati kanunay nga walay gamit ug nag-inusara. Nagduha-duha ko sa kamahuluganon sa akong mga paningkamot sa misyon.”

Gamhanang mga Misyonaryo

Nakahunahuna si Sister Tarasevich kabahin sa talagsaong mga misyonaryo sa Basahon ni Mormon. “Sa mga katuigan isip magtutudlo sa Primary, ganahan kaayo ko sa makapadasig ug makapa-awhag nga mga istorya ni Alma ug sa mga anak nga lalaki ni Mosiah nga nagtudlo sa mga bata mahitungod sa misyonaryo nga buhat. Kon maghunahuna ko og mga misyonaryo, ang imahen sa usa ka lig-on ug gamhanang si Ammon mosantup sa akong hunahuna, ug dali nakong nahunahunaan ang aktibong mga misyonaryo sa among misyon nga daw mga anak ni Mosiah karon. Apan naghunahuna ko kon mahimo ba sa usa ka ubanon nga apohang babaye sama nako kini nga tahas.”

Samtang naghunahuna siya, miingon siya, usa ka tingog sa kinahiladman hinay nga nangutana kaniya.

“Unsa ang unang buluhaton ni Ammon?”

“Mahimong usa ka sulugoon, moatiman sa mga panon, ug mopundok sa nagkatibulaag nga mga karnero,” siya mitubag.

“Nan, magpakahisama ka ni Ammon.”

Andam sa Pagserbisyo

Kini nga mga hunahuna naghatag ni Sister Tarasevich og ideya. “Diha-diha dayon akong nasabtan gayud kon unsa ang akong buluhaton,” siya miingon. “Nakaamgo ko nga samtang dili pa ko kaayo kahibalo sa pinulongan aron maka-proselyte, ang daghang kasinatian sa Relief Society naka-andam nako sa pagserbisyo sa uban—sa pagpangita, ug paghigugma niadtong mibati nga nakalimtan ug wala maapil.”

Nausab ang iyang panglantaw sa misyonaryo nga mga paningkamot. “Akong nasayran ang daghang paagi diin ang mga baruganan nga nakasentro ni Kristo makabuntog sa mga kakulangan sa pinulongan,” siya miingon. “Akong nakita kon unsay akong mahimo sa pag-atiman sa mga panon ug pagpundok sa nagkatibulaag nga mga karnero.”

Human niana, siya miingon, “ang kinabuhi isip usa ka senior nga misyonaryo talagsaon nga panahon sa pagkat-on ug pagserbisyo samtang kami adunay pribilehiyo nga makakita sa ebanghelyo nga nakausab ug nakapalambo sa kinabuhi niadtong midawat niini.” Kanunay siyang mibati nga daw nagkanta sa iyang gitawag nga himno ni Ammon: “Tan-awa, ang akong hingpit nga kalipay napuno, oo, ang akong kasingkasing tugob sa hingpit nga kalipay, ug ako maglipay diha sa akong Dios” (Alma 26:11).

Pagluwas sa Karnero

Si Peggy Wallace Poll sa South Weber, Utah, nakabaton og ideya gikan kang Ammon sa dihang siya gi-assign sa pagtudlo kabahin sa pagluwas ug pagpaaktibo sa usa ka miting sa pagbansay sa pagpangulo sa priesthood ug auxiliary sa stake.

“Nagbasa sa pamilyar nga istorya ni Ammon, nakabantay ko og usa ka bag-o nga butang, siya miingon. “Hinumdumi, si Ammon nagserbisyo og misyon didto sa mga Lamanite. Siya gihatagan og buluhaton nga moatiman sa harianon nga karnero. Dihay ubang mga sulugoon uban kaniya, ug samtang ilang gidala ang karnero ngadto sa Sebus aron paimnon, ang mga tulisan mikatag sa panon. Nahadlok pag-ayo ang ubang mga sulugoon. Klaro kaayo, nga ang uban nga mitugot nga makatag ang mga karnero gipahamtangan sa kamatayon, ug nakasiguro nga karon mag-antus sila sa samang kapalaran. (Tan-awa sa Alma 17:25–30.)

“Apan si Ammon nakakita og oportunidad,” miingon si Sister Poll. “Iyang gisultihan ang ubang mga sulugoon nga magmaya tungod kay siya dunay plano. Basaha ang Alma 17:31–33, ug makita ninyo nga klaro kining gipasabut:

1. Unaha sa pagkahibalo nga ang mga karnero nangawala.

2. ‘[Nagdali] uban ang tumang kalagsik.’

3. Mipundok sa tanang mga karnero.

4. Midala nila nga luwas balik sa panon.

5. Milibut kanila, miluwas nila, ug miamuma nila uban sa gugma.”

Miingon si Sister Poll nakadayeg siya sa unsang paagi kini nga istorya magamit sa pagpaaktibo: “Posible nga tan-awon ang istorya ni Ammon isip simbolo sa mga lider sa Simbahan karon, pagluwas sa mga miyembro kinsa nagkatibulaag Adunay daghang mga impluwensya sa kalibutan nga, sama sa mga tulisan, makaabug sa mga miyembro gikan sa maayong pulong sa ebanghelyo. Kinahanglan kitang magmabinantayon ug molihok diha-diha dayon kon ang usa sa Iyang bililhong mga kalag wala diha sa panon.”

Siya mikutlo gikan ni Presidente Gordon B. Hinckley (1910–2008), kinsa miingon, “Maglaum ko, mag-ampo ko, nga ang matag usa kanato … mobuhat sa pagpangita niadtong nanginahanglan og tabang, niadtong nawad-an sa paglaum ug anaa sa lisud nga mga sirkumstansya, ug ibayaw sila diha sa diwa sa gugma sa paghangop sa Simbahan, diin ang lig-ong mga kamot ug mahigugmaong mga kasingkasing makapadasig kanila, makapahupay kanila, makatabang kanila, ug makapahimutang kanila sa paagi nga malipayon ug mabungahon nga kinabuhi.”¹

Mubo nga sulat

1. Gordon B. Hinckley, “Reach with a Rescuing Hand,” Ensign, Nob. 1996, 86.

Pagpangita sa Usa Nga Nawala

“Importante sa matag usa kanato sa pagpamalandong kon unsay bation nga mawala ug unsay gipasabut sa mahimong usa ka ‘espirituhanong’ magbalantay sa mga karnero kinsa mobiya sa 99 aron sa pagpangita sa usa nga nawala. Ang ingon nga magbalantay sa karnero mahimong magkinahanglan sa kahanas ug panabang sa search and rescue team, apan sila anaa, andam nga motabang, mokatkat diha gayud tapad nila aron sa pagluwas niadtong kinsa hilabihan ka bililhon sa panan-aw sa Dios, kay sila Iyang mga anak.”

Elder L. Tom Perry sa Korum sa Napulog Duha ka mga Apostoles, “Pagdala og mga Kalag ngari Kanako,” Liahona, Mayo 2009, 112.

Si Amulek Makatudlo Usab Kanato

Si Amulek lain nga bantugang bayani gikan sa Basahon ni Mormon. Siya nagpakita kon unsay dangatan sa mga tawo kon sila mobalik sa dalan sa pagkamatarung.

Adunahan ug inila, si Amulek miila nga siya nakasaksi sa mga misteryo ug gahum sa Dios apan nagpatig-a sa iyang kasingkasing “Ako gitawag sa makadaghan ug ako wala mopatalinghug; busa ako nasayud mahitungod niini nga mga butang, apan ako wala magpakasayud,” siya miingon (Alma 10:6; tan-awa usab ang mga bersikulo 4–5).

Apan ang Ginoo nagpadala og anghel sa pagsulti ni Amulek sa pagdawat ni Alma, ang propeta, sa iyang panimalay. Gipakaon ni Amulek si Alma, ug gipanalanginan ug gitudloan ni Alma si Amulek ug ang iyang panimalay. Dayon mikuyog si Amulek ni Alma sa pagpangalagad, nahimong gamhanan nga ikaduhang saksi sa mga kamatuoran sa ebanghelyo. (Tan-awa sa Alma 10:7–12.)

Si Amulek nahimong kompanyon ni Alma sa pag-awhag sa mga tawo sa paghinulsol, ug siya nagsangyaw sa ebanghelyo nga adunay kalig-on ug awtoridad nga nakapatingala sa mga tawo (tan-awa sa Alma 11:46). Gigapos ug gipriso, si Alma ug Amulek milagro nga nakagawas, nakaestablisar sa Simbahan sa Sidom, ug dayon nagtudlo sa ebanghelyo sa tibuok yuta (tan-awa sa Alma 14; 15; 31).

Sama ni Amulek, adunay daghan sa Simbahan karon, kon sila mobalik sa pagka-aktibo, makakaplag nga ang Ginoo mopanalangin kanila ug sila mahimong mas gamhanan nga saksi sa kamatuoran.