Kon ako makig-istorya sa akong mga higala kabahin sa Simbahan, sila moingon nga sila dili interesado tungod kay kini adunay daghan kaayong mga lagda. Unsay akong isulti kanila?

Ang atong kinaiya ngadto sa bisan unsang “lagda” dako og kalabutan sa kon unsay atong naandan. Kon ang inyong mga higala naanad nga dili magsepilyo ug ikaw misulti kanila nga magsepilyo ka kada adlaw tungod kay gitudloan ka, tingali sila maghunahuna niini nga usa ka mapig-uton nga lagda. Apan kamo wala gani maghunahuna niini isip lagda tungod kay nabatasan na kini, usa ka paagi sa kinabuhi. Samtang sila tingali naghunahuna nga ang dili pagsepilyo usa ka matang sa kagawasan, kamo masayud sa mga problema nga padulngan niini ug unsa ka mas maayo ang bation nga adunay limpyo, himsog nga mga ngipon.

Mao usab kini sa mga “lagda” sa Simbahan. Ang inyong mga higala tingali maghunahuna nga ang mga sumbanan nga atong gisunod mapig-uton, apan kamo nasayud nga ang Ginoo ug ang Iyang mga sulugoon mihatag niini ngari kanato sa pagtabang kanato nga mopuyo og mas maayong kinabuhi ug makabalik sa Langitnong Amahan. Usab, ang pagkamasulundon sa mga sugo sa Dios kanunay nga nagdala og mga panalangin, dili maoy kinaminosan ang pagpakig-uban sa Espiritu Santo. Mahimo ninyong sulayan sa paghulagway niini nga mga kaayohan ug mga panalangin ngadto sa inyong mga higala, ug kamo makasulti kanila nga ang bugtong paagi aron mailhan gayud kon ang mga “lagda” gikan ba sa Dios mao ang pagsulay niini (tan-awa sa Juan 7:17).