Ang mga Apostoles Nangalagad sa Daghang mga Nasud

Ang mga sakop sa Korum sa Napulog Duha ka mga Apostoles nagpadayon sa pagpangalagad sa Simbahan sa tibuok kalibutan. Atol sa bag-ong mga assignment:

Si Elder Russell M. Nelson ug si Elder Neil L. Andersen mihatag og tambag ug direksyon sa mga Santos sa Australia, New Zealand, French Polynesia, Fiji, New Caledonia, Tonga, ug Papua New Guinea. Si Elder Nelson naghisgot sa panginahanglan sa paglig-on sa mga pamilya, ug si Elder Andersen mipahinumdom sa mga miyembro sa pagmaya. Sa lain-laing assignment, si Elder Andersen nakighimamat sa mga miyembro ug mga lider sa komunidad sa mga dapit sa Pilipinas nga naigo sa linog ug mga bagyo.
Si Elder Dallin H. Oaks mipahinungod sa Mexico City Missionary Training Center. Iyang giawhag ang mga misyonaryo sa pagtuon og maayo ug paghalad sa ilang mga kaugalingon ngadto sa Ginoo.
Si Elder M. Russell Ballard misulti sa mga Santos sa South America South Area nga “ang adlaw sa mga anak nga lalaki ug anak nga babaye ni Lehi nagtubo,” uban sa 4.5 ka milyon ka mga miyembro ug 14 ka templo sa South America. Kini nagtuman sa panagna nga gihimo sa iyang apohan nga lalaki nga si Elder Melvin J. Ballard (1873–1939) nga ang South America mahimo nga usa ka pwersa sa Simbahan.
Si Elder Jeffrey R. Holland miawhag sa mga miyembro sa Taiwan ug Hong Kong sa paghimo sa templo nga bahin sa ilang kinabuhi pinaagi sa pagtambong kanunay kutob sa ilang mahimo.
Si Elder David A. Bednar mipahinumdom sa mga Santos sa Ulahing mga Adlaw sa Uganda nga sila mga pioneer sa pagtukod sa Simbahan sa ilang nasud. Siya mipahinumdom sa mga miyembro sa Kenya sa kaimportante sa kanunay nga pagpakita og gugma sa panimalay.
Si Elder Quentin L. Cook mitudlo sa mga miyembro sa Central America sa kaimportante sa pagserbisyo sa Dios, sa usag usa, ug sa ilang mga silingan.

Sa pagkat-on og dugang mahitungod sa pagpangalagad sa mga Apostoles, adto sa lds.org/prophets-and-apostles.