Trabaho ug Pagpaningkamot sa Kaugalingon

Samtang ang kabatan-onan ug mga bata makakat-on sa pagtrabaho ug mahimong mapaningkamuton sa kaugalingon, sila nag-andam sa “pagtampo sa kalibutan nga [ilang] gipuy-an” (Alang sa Kalig-on sa Kabatan-onan [2011], 40).

Sa mga pahina 56–57 niini nga isyu, si Randall L. Ridd, ikaduhang magtatambag sa kinatibuk-ang kapangulohan sa Young Men, mipakigbahin sa unsay iyang nakat-unan sa pagtrabaho sa kontruksyon uban sa iyang papa. Naghisgot siya sa kaimportante sa pagtrabaho og maayo, pagbaton og maayong kinaiya, ug pagtukod sa gingharian sa Ginoo. Si Brother Ridd nagpahinumdom nato: “Kinsay nanginahanglan og trabaho? Kitang tanan! Mao kini ang sinugdanan sa pagpaningkamot sa kaugalingon, kalampusan ug kalipay niining kinabuhia. Samtang kamo magmalipayong moapil sa pagtrabaho, tanang naglibut ninyo moani tungod sa mga binhi nga inyong gitanom.”

Mga Sugyot sa Pagtudlo sa mga Kabatan-onan

Alang sa Kalig-on sa Kabatan-onan nag-ingon, “Paghimo og taas nga mga tumong alang sa inyong kaugalingon, ug magmahimong andam nga motrabaho og maayo aron makab-ot kini” (40). Mahimo kamong motan-aw uban sa inyong mga anak sa Mormon Messages for Youth video “A Work in Progress” (tan-awa sa Marriage and Family videos sa mormonchannel.org/come-follow-me). Dayon magtinabangay sa paghimo og pipila ka mga tumong ug maghimo og plano aron makab-ot kini.
Ang trabaho mas sayon kon kita dunay usa ka positibo nga kinaiya. Basaha ang “Pagbalhin og Tubo gamit ang Lapukon nga Sapatos” sa mga pahina 58–59 niini nga isyu ug hisguti kon sa unsang paagi ang inyong kinaiya nakaapekto sa inyong buhat.
“Usa ka matang sa pagkatapulan mao ang paggahin og sobrang kaayo nga panahon sa mga kalihokan nga mopahilayo kaninyo sa mabungahong buhat, sama sa paggamit sa Internet, pagdula og mga video game, ug pagtan-aw sa telebisyon” (Alang sa Kalig-on sa Kabatan-onan, 40). Pangutan-a ang inyong mga anak mahitungod sa kaayohan ug mga kakuyaw sa Internet, mga video game, ug telebisyon. Kanus-a kining mga himan makabalda? Unsa nga mga panalangin ang moabut gikan sa mabungahon nga mga buhat? Hunahunaa sa pagtabang sa inyong mga anak nga makasinati niini nga mga panalangin pinaagi sa paghiklin una sa tanan nga mga teknolohiya ug magtinabangay sa usa ka proyekto.

Mga Sugyot sa Pagtudlo sa mga Anak

Ang misyonaryo nga buhat lisud, ug ang pagkat-on nga mahimong mapaningkamuton sa kaugalingon makatabang sa mga anak sa pagpangandam alang niana nga buhat. Uban sa inyong mga anak, paghimo og lista sa mga buluhaton sa balay nga kinahanglang mahibaloan sa mga misyonaryo unsaon sa pagbuhat (pananglitan sa pagpanglaba, pagluto, ug pagpanglimpyo). Dayon tabangi ninyo pagbuhat ang maong mga buluhaton.
Sa iyang artikulo, si Brother Ridd nagpahinumdom nato nga “ang labing importante nga buhat mao ang buhat sa Dios.” Sa unsang paagi nga ang inyong pamilya makapadayon sa buhat sa Ginoo? Paghunahuna og usa ka kalihokan nga inyong mabuhat og dungan nga makatabang sa pagdala sa uban nga mas maduol ngadto ni Kristo.
Kabahin sa pagpaningkamot sa kaugalingon mao ang pagkat-on unsaon pagdumala sa kwarta. Tudloi ang inyong mga anak sa mga baruganan sa pagbadyet ug sa kaimportante sa paghimo sa ikapulo nga bahin sa ilang badyet.