Ang LDS Charities Nahisgutan sa Kalihokan sa United Nations

Ang buhat sa LDS Charities mao ang hilisgutan sa bag-ong panel discussion sa punoang buhatan sa United Nations sa New York, USA. Ang kalihokan, “Pagdiskubre sa Mormonismo ug ang Tahas Niini sa Humanitarian nga Tabang,” kabahin sa Focus on Faith nga serye nga gipasiugdahan sa seksyon sa dili panggobyerno nga organisasyon sa U.N. Department of Public Information.

“Kini nga serye nagtinguha sa paghatag og usa ka mas lapad nga panabut kon sa unsa nga paagi nga ang lahi nga mga sistema sa pagtuo adunay komon nga sukaranang mga baruganan sama sa pagkamatugtanon, pagtinahuray alang niadtong lahi kay sa atong kaugalingon, ug usa ka pasalig sa pakig-uli ug malinawon nga resolusyon sa panagbangi,” pasabut sa tigdumala sa panel nga si Felipe Queipo, ang assistant sa public information sa U.N. kinsa usa ka miyembro sa Simbahan gikan sa Spain.

“Ang pag-atiman sa kabus mao ang sukaranang katungdanan ni bisan kinsa nga nagtahud sa Dios ug ang panag-igsoonay sa tanan—sa pagserbisyo, pagdasig, pagpanalangin, ug paghupay sa pag-antus nga gawasnon sa mga pagdani sa relihiyon, katilingbanon nga mga pilosopiya, nasyonalidad, tribo, sekso, o kagikan,” miingon si Sharon Eubank, direktor sa LDS Charities, kinsa miapil sa mga panaghisgutan.

Sa iyang pakigpulong giribyu usab niya ang gipahayag nga katuyoan sa LDS Charities: aron sa paghupay sa pag-antus, pagpasiugda og pagpaningkamot sa kaugalingon, ug paghatag og mga oportunidad sa pagserbisyo sa mga pamilya sa tanang nasyonalidad. Ang mahinungdanon nga mga proyekto niini, siya miingon, mao ang limpyo nga tubig, neonatal resuscitation, pag-atiman sa panan-aw, pagpang-apud-apod og wheelchair, mga bakuna, pagkaon, ug tubag sa emerhensya.

Ubang mga partisipante nga mga Santos sa Ulahing mga Adlaw naglakip ni Ahmad S. Corbitt, direktor sa Church’s New York Office of Public and International Affairs, ug ni John P. (Phil) Colton, kinsa nagserbisyo uban sa iyang asawa, si Barbara, isip usa ka representante sa U.N. alang sa LDS Charities.

Si Brother Corbitt miingon nga adunay “mga tawo nga mabination sa tanang mga relihiyon sa kalibutan,” naghatag og gibug-aton sa kaimportante sa pagtinabangay. Si Brother Colton mipasabut nga ang LDS Charities naghatag og tabang sa dul-an sa duha ka milyon ka mga tawo sa 132 ka mga nasud pagka-2013.