Elijah

“Si Elijah mao ang usa sa labing bantugan sa mga propeta, ug ang Ginoo mitugyan kaniya sa gahum sa pagbugkos.”¹ —Presidente Joseph Fielding Smith (1876–1972)

Ako nangalagad isip propeta didto sa Amihanan nga Gingharian sa Israel.² Tungod sa kadautan sa mga Israelite, wala nako pauwana ang langit, nga maoy hinungdan sa kagutom diha sa yuta. Panahon sa kagutom, ako nagpuyo sa usa ka sapa ug gidad-an akog pagkaon sa mga uwak, apan naughan ang sapa.³

Ang Ginoo misugo nako nga moadto sa usa ka balo kinsa nagpuyo sa Sarepta, ug nga siya mopakaon kanako. Akong nakita siya nga nangahoy aron mag-andam sa katapusang pagkaon alang sa iyang kaugalingon ug sa iyang anak nga lalaki. Misulti ako kaniya nga kon siya mopakaon nako pag-una, ang iyang “tadyaw sa harina dili [gayud] mahutdan, ni mahutdan [gayud] ang tibud-tibud sa lana, hangtud sa adlaw nga ang Ginoo magapaulan ibabaw sa yuta.”⁴ Siya migamit sa hugot nga pagtuo, ug ang Ginoo mituman sa Iyang saad.

Samtang ako nagpuyo uban sa iyang pamilya, ang anak nga lalaki sa balo namatay. Nangamuyo ko, “O Ginoo akong Dios, ako nagahangyo kanimo nga pabalikon mo unta pag-usab kaniya ang kalag niining bataa.”⁵ Ang Ginoo namati sa akong pangamuyo, ug ang iyang anak nabuhi pag-usab.⁶

Sa wala madugay, akong gipakita ang gahum sa Ginoo ngadto sa katawhan sa Israel pinaagi sa paghagit sa mga pari ni Baal sa usa ka sangka. Ang mga pari nag-andam og mga sakripisyo ug mitawag ni Baal tibuok adlaw sa pagpakanaog og kalayo, apan walay kalayo nga nakita. Nagbuhat ako og altar sa 12 ka mga bato, simbolo sa 12 ka mga tribo sa Israel, ug nagkalot sa usa ka kanal libut sa altar. Dayon gibubuan nako ang altar ug ang sakripisyo niini og 12 ka baril nga tubig, mibasa sa kahoy ug mipuno sa kanal. Mitawag ko sa Ginoo, ug Siya mipadala og kalayo nga miugdaw sa sakripisyo, sa altar, ug sa tubig. Human niana, nag-ampo ko sa Ginoo, ug Siya mipaulan sa kalangitan.⁷

Sa katapusan sa akong kinabuhi, wala ko mamatay apan mikayab ngadto sa langit sa usa ka carro sa kalayo.⁸ Atol sa mortal nga pangalagad ni Kristo, mipakita ko didto sa Bukid sa Transpigurasyon ug mihatag sa yawe sa priesthood ngadto kang Pedro, Santiago ug Juan.⁹

Nagpakita ko pag-usab sa ulahing mga adlaw “aron sa pagpabalik sa mga kasingkasing sa mga amahan ngadto sa mga anak, ug ang mga anak ngadto sa mga amahan,” miadto sa Kirtland Temple niadtong Abril 3, 1836, ug mipahiuli sa mga yawe sa gahum sa pagbugkos ngadto ni Joseph Smith ug Oliver Cowdery.¹⁰