Imong Giluwas ang Akong Kaminyoon

Neil S. Roy, Yorkshire, England

Sa dihang nagtrabaho ko sa konstruksyon sa Oman gikan sa 1979 hangtud sa 1986, nagtrabaho ko sa ministry of defense. Ang ministry mohatag nako og mga proyekto nga nahimutang sa labing hilit nga dapit sa nasud, ug sa kasagaran ako lang ang supervisor nga magbantay sa mga proyekto. Ako lang usab ang miyembro sa Simbahan nga nagtrabaho sa ministry.

Usa ka adlaw didto sa among punoang buhatan sa kompaniya, nakasugat ko sa usa ka electrical engineer kinsa, sama kaniadto, mihimo og negatibo nga mga komentaryo mahitungod sa Simbahan. Gipasagdan ra nako ang iyang mga komentaryo tungod kay sa kasagaran kadiyot ra ko sa punoang buhatan sa dili pa ako mobiya para sa laing proyekto.

Sa wala madugay, hinoon, kining tawhana gi-assign sa pagsusi sa electrical work sa mga proyekto nga gitukod sa utlanan sa Oman uban sa Yemen. Naka-iskedyul kami nga magkita og usa ka oras sa dili pa siya mobalik ngadto sa punoang buhatan.

Sa dihang siya miabut, iyang gi-inspeksyon ang trabaho ug nakita nga ang tanan maayo ra. Atol sa among panag-uban, akong gisentro ang among panag-istoryahanay sa trabaho ug dayon midrayb niya ngadto sa landinganan aron pagpagikan kaniya.

Kusog ang ulan niadtong higayona, ug ang landinganan, nahimutang sa ibabaw sa bukid nga 6,000 ka pye (1,830 m) ibabaw sa Indian Ocean, natabunan sa mga panganod. Ang biyahe sa akong kaubanan malangan.

Nagkulba-kulba ang akong kasingkasing tungod kay akong nahunahunaan nga kinahanglan kong maghulat diha sa sakyanan uban niini nga tawo. Human makaampo sa hilom, nakahunahuna ko sa pagpangutana niini nga tawo mahitungod sa iyang pamilya, ilabi na sa iyang asawa.

Ako kining gibuhat, ug ang enhinyero kalit nakahilak, miingon nga bag-o lang siyang nakadawat og sulat nga ang iyang asawa nagtinguha og diborsyo. Ang pulong nga gugma diha-diha misantop sa akong hunahuna, ug sa misunod nga duha ka oras naghisgot kami mahitungod sa gugma alang sa uban ug sa gugma sa Ginoo nga si Jesukristo alang natong tanan. Wala ko kabantay nga kami nahimong managhigala. Sa pagtapos namo sa among panag-istoryahanay, mihayag na ang panganod ug ang enhinyero misakay sa iyang eroplano. Sa wala madugay ako nakadungog nga siya mi-resign sa iyang posisyon ug mipauli.

Pipila ka tuig sa wala madugay samtang nag-outing uban sa Aaronic Priesthood sa Plymouth, usa ka siyudad sa habagatang kabaybayonan sa England, nakabantay ko og usa ka tawo nga nagpadulong nako. Samtang siya nagkaduol, siya miingon, “Nagtuo gyud kong ikaw lagi, Neil.”

Ang electrical engineer gikan sa Oman. Ang sunod nga mga pulong nga iyang gisulti nagpabilin sa akong kasingkasing: “Salamat nimo sa pagpakigsulti nako kabahin sa gugma didto sa bukid anang adlawa. Imong giluwas ang akong kaminyoon, ug ako hangtud sa hangtud mapasalamaton.”

Nag-istoryahay mi og kadiyot, ug siya milakaw. Wala na ko makakita kaniya sukad.

Mapasalamaton kaayo ko sa inspirasyon nga akong nadawat didto sa Oman. Kini nakapanalangin sa engineer ug nakahatag nako og kalig-on sa pagpadayon sa akong mga gituohan sa Simbahan kon ako nag-inusara ug layo sa panimalay.