Mensahe sa Visiting Teaching
Ang Balaan nga Misyon ni Jesukristo: Manlalaban
Tun-i sa mainampuong paagi kini nga materyal ug tinguhaa nga masayud unsaon kini sa pagpakigbahin. Sa unsang paagi nga ang pagsabut sa kinabuhi ug misyon sa Manluluwas makadugang sa inyong hugot nga pagtuo diha Kaniya ug makapanalangin niadtong inyong giamuma pinaagi sa visiting teaching? Alang sa dugang nga impormasyon, adto sa reliefsociety.lds.org.
Hugot nga Pagtuo, Pamilya, Kahupayan
Dili ang Akong Pagbuot maoy Matuman kondili ang Imo, ni Harry Anderson
Si Jesukristo mao ang atong Manlalaban ngadto sa Amahan. Ang pulong manlalaban dunay Latin nga mga gamot nga nagpasabut og “usa kinsa nangamuyo alang sa lain.”1 Naghangyo ang Manluluwas alang nato, naggamit sa pagsabut, kaangayan, ug kalooy. Nasayud nga kini mopuno nato sa gugma ug pasalamat alang sa Iyang Pag-ula.
“Paminaw ni [Jesukristo] kinsa mao ang manlalaban ngadto sa Amahan, kinsa nangamuyo sa inyong kahimoan diha sa iyang atubangan—
“Nag-ingon: Amahan, tan-awa ang mga pag-antus ug ang kamatayon kaniya kinsa wala makabuhat og sala, kinsa ikaw nahimuot; tan-awa ang dugo sa imong Anak nga gipaagas, ang dugo kaniya kinsa ikaw mihatag nga ang imong kaugalingon unta pagahimayaon;
“Busa, Amahan, luwasa kining akong mga kaigsoonan nga mituo sa akong ngalan, nga sila moduol ngari kanako ug makabaton sa walay katapusan nga kinabuhi.” (D&P 45:3–5).
Diha ni Jesukristo isip atong Manlalaban, si Elder D. Todd Christofferson sa Korum sa Napulog Duha Ka mga Apostoles miingon: “Kini mao ang dakong kahulugan ngari nako, nga ako bisan unsa nga higayon ug sa bisan unsang kahimtang makaduol pinaagi sa pag-ampo sa trono sa grasya, nga ang akong Langitnong Amahan maminaw sa akong pangamuyo, nga ang akong mga Manlalaban, kinsa wala makabuhat og sala, kansang dugo gipaagas mohangyo alang kanako.”2
Dugang mga Kasulatan
Mosiah 15:8–9; Moroni 7:28; Doktrina ug mga Pakigsaad 29:5; 110:4
Gikan sa mga Kasulatan
Sa tibuok kasaysayan sa Simbahan sa Ginoo, babaye nga mga disipulo ni Jesukristo misunod sa Iyang ehemplo. Si Ester matinud-anon ug maisugon. Ang iyang ig-agaw nga si Mardocheo mipadala kaniya og kopya sa mando sa hari nga ang mga Judeo pagalaglagon, ug siya gisangunan kaniya “sa pagpangaliyupo sa atubangan niya [ang hari] alang sa iyang katawhan.” Siya midugang: “Ug kinsay nahibalo kon ikaw wala pa mahiabut sa gingharian sa maingon niini nga panahon?” (Ester 4:8, 14.)
Bisan pa sa kakuyaw, si Ester miuyon: “Busa ako moadto sa hari, nga dili subay sa balaod: ug kong ako mamatay, mamatay ako” (Ester 4:16).
Dayon si Ester mapainubsanong nakigsulti sa hari ug “miluhod sa iyang tiilan, ug nangaliyupo kaniya inubanan sa luha … sa pagbawi sa mga sulat … aron sa paglaglag sa mga Judeo.” Siya midugang, “Kay unsaon ko sa pag-antus nga magatan-aw sa dautan nga mahatabo sa akong katawohan?” (tan-awa sa Ester 8:3, 5–6). Nahumok ang kasingkasing sa hari, ug siya mitugot sa iyang hangyo.3