PAGKAHIMONG Hingpit diha kang Kristo
Ang pagsabut sa libreng matubsanong gugma nga gihatag sa Manluluwas makapalingkawas nato gikan sa gituohan sa kaugalingon, sayop, ug dili reyalidad nga mga gipaabut kon unsa ang pagkahingpit.
Kahayag sa Kalibutan, ni Howard Lyon, dili mahimong pakopyahan
Kita manganta uban sa atong mga anak, “Gibati nako ang gugma sa akong Manluluwas, ang gugma nga libreng gihatag niya nako.”1
Ang Iyang maulaon nga gugma, walay pagpugong nga gihatag, mao nga “gatas ug dugos, walay bayad ug walay presyo” (2 Nephi 26:25). Walay kinutuban ug walay katapusan (tan-awa sa Alma 34:10), ang Pag-ula nagdapit nato sa “pagduol ngadto kang Kristo, ug paghingpit diha kaniya” (Moroni 10:32).
Ang pagsabut sa libreng matubsanong gugma nga gihatag sa Manluluwas makapalingkawas nato gikan sa gituohan sa kaugalingon, sayop ug dili reyalidad nga mga gipaabut kon unsa ang pagkahingpit. Ang ingon nga pagsabut makapawala sa kahadlok nga kita dili hingpit—ang kahadlok nga kita masayop, ang kahadlok nga kita dili maayo, ang kahadlok nga kita pakyas itandi sa uban, ang kahadlok nga kita wala magbuhat sa igo aron makaangkon sa Iyang gugma.
Libre nga gihatag ang matubsanon nga gugma sa Manluluwas makatabang kanato nga mahimong mas mapasayloon ug dili mahukmanon sa uban ug sa atong kaugalingon. Kini nga gugma nag-ayo sa atong mga relasyon ug naghatag kanato og mga oportunidad sa paghigugma, pagsabut, ug sa pagserbisyo sama sa pagserbisyo sa atong Manluluwas.
Ang Iyang matubsanon nga gugma makapausab sa atong konsepto sa pagkahingpit. Makabutang kita sa atong pagsalig diha Kaniya, magmakugihon sa paghupot sa Iyang mga sugo, ug magpadayon diha sa hugot nga pagtuo (tan-awa sa Mosiah 4:6)—bisan gani mobati usab kita nga mas mapainubsanon, mapasalamaton, ug magsalig sa Iyang maayo nga buhat, kalooy, ug grasya (tan-awa sa 2 Nephi 2:8).
Sa mas dako nga pagsabut, ang pagduol kang Kristo ug ang pagpakahingpit diha Kaniya nagbutang sa kahingpitan diha sa mahangturon nga panaw sa atong espiritu ug lawas—sa tinuod, ang mahangturon nga panaw sa atong mga kalag (tan-awa sa D&P 88:15). Ang pagkahimong hingpit nga resulta sa atong panaw sa pisikal nga kinabuhi, kamatayon ug pagkabanhaw, nga tanan nga mga butang mapahiuli “ngadto sa ilang tukma ug hingpit nga bayanan” (Alma 40:23). Naglakip kini sa proseso sa espiritwal nga pagkatawo, diin makadala og “usa ka dako nga kausaban” sa atong mga kasingkasing ug kinaiya (Mosiah 5:2). Kini nagpakita sa atong pagkalunsay sa tibuok kinabuhi pinaagi sa Kristohanong pagserbisyo ug pagkamasulundon sa mga sugo sa Manluluwas ug sa atong mga pakigsaad. Ug kini miila sa makahingpit nga relasyon tali sa mga buhi ug sa mga patay (tan-awa sa D&P 128:18).
Ang pulong kahingpitan, hinoon, usahay masaypan sa pagsabut nga dili gayud makahimo og sayop. Tingali kamo o inyong kaila naningkamot pag-ayo nga mahingpit niini nga paagi. Tungod kay ang maong pagkahingpit ingon og dili makab-ot, bisan ang atong pinakamaayo nga paningkamot makapabalaka, makawala sa paglaum, o makaluya. Walay kalampusang naningkamot kita sa pagkontrolar sa atong mga kahimtang ug sa mga tawo nga naglibut nato. Nabalaka kita sa mga kahuyang ug mga sayop. Sa pagkatinuod, magkadako ang atong pagpaningkamot, magkalayo ang atong bation gikan sa pagkahingpit nga atong gitinguha.
Sa unsay mosunod, ako nagtinguha sa pagpalawom sa atong pagpasalamat alang sa mga doktrina sa Pag-ula ni Jesukristo ug alang sa gugma ug kalooy sa Manluluwas nga libreng gihatag nato. Modapit ko kaninyo sa paggamit sa inyong pagsabut sa doktrina sa Pag-ula sa pagtabang sa inyong kaugalingon ug sa uban, lakip ang mga misyonaryo, mga estudyante, sa mga young single adult, mga amahan, mga inahan, single nga mga lider sa pamilya, ug sa uban nga mobati nga napugos sa pagpangita sa kahingpitan o aron mahimong hingpit.
Ang Pag-ula ni Jesukristo
Giandam gikan sa katukuran sa kalibutan (tan-awa sa Mosiah 4:6–7), ang Pag-ula sa Manluluwas nagtugot nato sa pagkat-on, paghinulsol, ug pagtubo pinaagi sa atong kaugalingong mga kasinatian ug mga pagpili.
Niining mortal nga pagsulay, sa hinay-hinay “pagtulun-an ngadto sa laing pagtulun-an” (D&P 98:12) espirituhanong paglambo ug makapausab og “dako nga kausaban” sa kasingkasing (Alma 5:12, 13; Mosiah 5:2) ang espirituhanong mga kasinatian makatabang nato sa pagduol ngadto kang Kristo ug paghingpit diha Kaniya. Ang pamilyar nga mga pulong “lahutay hangtud sa katapusan” nagpahinumdom nato nga ang mahangturong kalamboan sa kasagaran naglakip og panahon ug proseso.
Sa panapos nga kapitulo sa Basahon ni Mormon, ang talagsaong propeta nga si Moroni nagtudlo nato unsaon sa pagduol ug paghingpit diha kang Kristo. Kita “molimud sa [atong] mga kaugalingon sa tanan nga dili diosnon.” Kita “mohigugma sa Dios sa [atong] tibuok nga gahum, hunahuna ug kusog.” Dayon ang Iyang grasya igo alang kanato, “niana ang iyang grasya [kita] mahimo nga hingpit diha kang Kristo.” Kon kita “dili molimud” sa gahum sa Dios, kita mahimong “pagasantoson diha ni Kristo tungod sa grasya sa Dios, nga “anaa sa pakigsaad sa Amahan ngadto sa kapasayloan sa [atong] mga sala, nga kita “mahimo nga balaan, nga walay lama” (Moroni 10:32, 33).
Sa katapusan, ang “mahinungdanon ug katapusang sakripisyo” sa Manluluwas nga nakapahimo sa mga “kalooy, diin mobuntog sa kaangayan, ug modala og mga kahigayunan ngadto sa mga tawo nga sila mahimo nga makabaton og hugot nga pagtuo ngadto sa paghinulsol” (Alma 34:14, 15). Sa pagkatinuod, ang atong “hugot nga pagtuo ngadto sa paghinulsol” importante alang kanato sa pagduol ngadto kang Kristo, paghingpit diha Kaniya, ug makatagamtam sa mga panalangin sa “mahinungdanon ug walay katapusan nga laraw sa katubsanan” (Alma 34:16).
Hingpit nga pagdawat sa Pag-ula sa atong Manluluwas makadugang sa atong hugot nga pagtuo ug mohatag kanato og kaisug sa pagbiya sa atong mapugsanon nga mga paghandom nga kita kinahanglan nga o mohimo sa mga butang nga hingpit. Ang pig-ot nga panghunahuna nag-ingon nga hingpit gayud kaayo o wala nay paglaum. Apan kita mahimong mapasalamatong modawat, isip anak nga mga lalaki ug anak nga mga babaye sa Dios, nga kita Iyang labing mahinungdanon nga binuhat (tan-awa sa Salmo 8:3–6; Mga Hebreohanon 2:7), bisan tuod kita sa gihapon nag-uswag.
Kon masabtan nato ang libreng gihatag nga maulaong paghigugma sa atong Manluluwas, dili na kita mahadlok nga Siya tingali maghuhukom nga walay kalooy ug mangita og sayop. “Kay gipadala sa Dios ang iyang Anak nganhi sa kalibutan, dili aron ang kalibutan iyang pagahukman sa silot, kondili aron ang kalibutan maluwas pinaagi kaniya” (Juan 3:16–17). Ug kita makasabut nga gikinahanglan ang panahon ug proseso alang sa pagtubo (tan-awa sa Moises 7:21).
Ang Atong Hingpit nga Ehemplo
Ang atong Manluluwas lamang ang nagpuyo og hingpit nga kinabuhi, ug gani Siya nakakat-on ug nagtubo sa mortal nga kasinatian. Sa pagkatinuod “siya wala makadawat sa kahingpitan sa sinugdanan, apan nakaangkon og grasya ug dugang pa nga grasya, hangtud nga siya nakadawat sa kahingpitan” D&P 93:13.
Siya nakakat-on pinaagi sa mortal nga kasinatian nga “modala diha kaniya [atong] mga kahuyang … nga siya mahimo nga masayud sumala sa unod unsaon pagtabang ang iyang mga katawhan” (Alma 7:12). Siya dili mosimpig sa mga tintasyon, sala, o sa inadlaw-adlaw nga mga pagpamugos, apan Siya usab nakasinati sa tanang mga pagsulay ug mga hagit sa pagka-mortal (tan-awa sa D&P 122:8).
Sa Wali sa Bukid, ang Manluluwas mimando nato: “Busa kamo kinahanglan magmahingpit” (Mateo 5:48). Ang Greyigo nga pulong alang sa hingpit mahimong hubaron nga “kompleto, nahuman na, hingpit nga milambo” (sa Mateo 5:48, footnote b). Ang atong Manluluwas nagsugo nato nga mahimong kompleto, nahuman na, hingpit nga molambo—sa paghingpit sa mga hiyas ug kinaiya nga gipakita Niya ug ang atong Amahan sa Langit.2
Atong tan-awon kon sa unsang paagi nga ang paggamit sa doktrina sa Pag-ula makatabang niadtong kinsa mobati nga sila nagkinahanglan sa pagpangita sa kahingpitan o mahimong hingpit.
Ang pagkaperpeksyonista
Ang sayop nga pagsabut kon unsa ang gipasabut nga mahimong hingpit moresulta sa pagkaperpeksyonista— usa ka kinaiya o pamatasan nga nagkinahanglan og usa ka dalayegon nga mga tinguha nga mahimong maayo ug nahimong usa ka dili angay nga pagdahom nga mahimong hingpit karon. Ang pagkaperpeksyonista usahay moabut gikan sa pagbati nga kadto lamang hingpit ang angay nga higugmaon o nga kita dili angayan nga magmalipayon gawas kon kita hingpit.
Ang pagkaperpeksyonista makaingon nga walay kinatulgan, kabalaka, paglangay-langay, pagkawala sa kadasig, pagpangatarungan sa kaugalingon, ug kasubo. Kini nga mga pagbati makatabon sa kalinaw, kalipay, ug kasiguroan nga gusto sa atong Manluluwas nga atong maangkon.
Ang mga misyonaryo kinsa gusto nga mahimong hingpit karon mahimong mabalak-on o mawad-an sa kadasig kon ang ilang pagkat-on sa pinulongan sa misyon, pagtan-aw sa mga tawo nga bunyagan, o pagdawat og mga assignment sa pagpangulo sa misyon wala dayon mahitabo. Alang sa dunay abilidad nga mga batan-on nga anad na sa kalampusan, ang misyon mahimong unang dako nga hagit sa kinabuhi. Apan ang mga misyonaryo mahimong magmasulundon gayud bisan dili hingpit. Ilang masukod ang ilang kalampusan una sa ilang pasalig sa pagtabang sa mga indibidwal ug mga pamilya “mamahimong matinud-anon nga mga miyembro sa Simbahan kinsa nagtagamtam sa presensya sa Espiritu Santo.”3
Ang mga estudyante nga nagsugod sa pag-eskwela, ilabi na niadtong mibiya sa panimalay alang sa kolehiyo, nag-atubang sa kadasig ug mga kabalaka. Ang mga eskolar nga estudyante, atleta, mga artist, ug uban pa nga kaniadto “malampuson ug inila” nga karon mibati nga ubos ug uyamot. Sayon alang sa mga estudyante nga dunay kalagmitan nga mahimong perpeksyonista nga mobati niana, bisan unsaon pa nila pagpaningkamot, pakyas sila kon dili sila ang nag-una sa tanang mga butang.
Tungod sa panginahanglan sa kinabuhi, ang mga estudyante makakat-on usahay nga maayo ra gayud ang pagbuhat sa tanan nilang mahimo ug nga dili kana kanunay posible nga mahimong labing maayo.
Kita usab mopatuman og mga ekspektasyon sa pagkahingpit sa atong kaugalingong mga panimalay. Ang usa ka amahan o inahan mahimong mobati nga napugos nga mahimong hingpit nga kapikas, ginikanan, tig-atiman sa panimalay, tigsangkap, o kabahin sa usa ka hingpit nga pamilya nga Santos sa Ulahing mga Adlaw—karon.
Unsa ang makatabang niadtong kinsa nakigbatok sa mga kalagmitan nga mahimong perpeksyonista? Pagpangutana nila og makatabang nga mga pangutana ug makadapit og matinuoron ug detalyado nga mga tubag makatabang nila nga masayud nga kita modawat ug nahigugma nila. Modapit sila sa uban sa pag-focus sa positibo. Motugot sila nato sa pagsulti nga unsay atong gibati maayo ra. Ang pamilya ug mga higala makalikay sa mga pagtandi ug hinoon mohalad og sinsero nga pag-awhag.
Laing seryoso nga dimensyon sa perpeksyonista mao ang pagpasunod sa uban sa atong dili praktikal, mahukmanon, o dili mapasayloon nga mga sumbanan. Ang mao nga kinaiya sa tinuod, naglimud o naglimit sa mga panalangin sa Pag-ula sa Manluluwas sa atong kinabuhi ug sa kinabuhi sa uban. Sama pananglit, ang mga young single adult mahimong maglista sa gitinguha nga mga kalidad sa usa ka potensyal nga kapikas ug sanglit wala makaminyo tungod sa dili praktikal nga mga ekspektasyon alang sa hingpit nga kompanyon.
Sa ingon, ang usa ka sister dili gustong makig-date sa usa ka talagsaon, takus nga lalaki nga wala makapasar sa sukdanan sa pagkaperpeksyonista—siya dili kamaong mosayaw, wala magplano nga magdato, wala magmisyon, o moangkon sa miaging problema sa pornograpiya sukad masulbad pinaagi sa paghinulsol ug pagtambag.
Sa samang paagi, usa ka igsoon nga lalaki mahimong makig-date sa usa ka talagsaon, takus nga sister kinsa dili mohaum sa iyang dili praktikal nga profile—dili siya ganahan og mga sports, dili presidente sa Relief Society, dili beauty queen, dili kamaong mobadyet, o wala moangkon sa kahuyang kaniadto sa Pulong sa Kaalam, nga karon nasulbad na.
Siyempre, kinahanglan natong hunahunaon ang mga kalidad nga atong gitinguha sa atong mga kaugalingon ug sa potensyal nga kapikas. Kinahanglan natong ipadayon ang atong labing taas nga mga paglaum ug mga sumbanan. Apan kon kita mapaubsanon, masurprisa kita sa kamaayo sa wala damha nga mga dapit, ug kita makahimo og mga oportunidad nga mas masuod ngadto sa usa ka tawo kinsa, sama nato, dili hingpit.
Ang hugot nga pagtuo miila niana, pinaagi sa paghinulsol ug sa gahum sa Pag-ula, ang kahuyang mahimong malig-on ug gihinulsulan nga sala sa tinud-anay mapasaylo.
Ang malipayon nga kaminyoon dili mao ang resulta sa duha ka hingpit nga mga tawo nga nagsinaaray. Hinoon, ang debosyon ug gugma molambo samtang ang duha ka mga tawo nga dili hingpit molig-on, mopanalangin, motabang, moawhag, ug mopasaylo. Ang asawa sa usa ka moderno nga propeta sa makausa gipangutana kon unsay kahimtang nga maminyo sa usa ka propeta. Maalamon siyang mitubag nga siya wala maminyo og usa ka propeta; siya naminyo og usa ka tawo kinsa hingpit nga mahalaron ngadto sa Simbahan bisan unsa nga calling nga iyang madawat.4 Sa laing pagkasulti, paglabay sa panahon, mga bana ug asawa molambo og dungan—tagsa-tagsa ug isip usa ka magtiayon.
Ang pagpaabut sa hingpit nga kapikas, hingpit nga edukasyon, hingpit nga trabaho, o hingpit nga balay dugay ug masulub-on. Maalamon kita kon mosunod sa Espiritu sa importanting mga desisyon sa kinabuhi ug dili motugot nga ang pagduda nga sangputanan sa mga demanda sa perpeksyonista makapugong sa atong pag-uswag.
Alang niadtong kinsa mobati kanunay og kahasol o kabalaka, sa sinserong paagi pangutan-a ang inyong kaugalingon, “Ako bang hatagan og kahulugan ang pagkahingpit ug kalampusan pinaagi sa mga doktrina sa matubsanon nga gugma sa Manluluwas o pinaagi sa mga sumbanan sa kalibutan? Sukdon ba nako ang kalampusan o kapakyasan pinaagi sa Espiritu Santo nga nagpamatuod sa akong matarung nga mga tinguha o sa pipila ka kalibutanon nga mga sumbanan?”
Alang niadtong kinsa mobati og kaluya sa pisikal o emosyonal nga paagi, sugdi ang regular nga pagkatulog ug pagpahulay, ug sa paggahin og panahon sa pagkaon ug magpahayahay. Hibaloi nga ang pagka-busy dili sama sa pagkahimong takus, ug ang pagkahimong takus wala magkinahanglan og kahingpitan.5
Kadtong kanunay nga makakita sa ilang kaugalingong mga kahuyang, sauloga uban sa pasalamat ang mga butang nga maayo ninyo pagkabuhat, ma-dako man o ma-gamay.
Alang niadtong kinsa nahadlok og kapakyasan ug kinsa langayan, usahay tungod sa sobra nga pagpangandam, timan-i ug laumi nga wala na kinahanglana nga mopalayo sa mahagiton nga mga kalihokan nga makahatag og dakong kalamboan!
Kon gikinahanglan ug angay, pangayo og espirituhanong tambag o kasaligan nga medikal nga pagtagad sa pagtabang ninyo nga makarelaks, makapalambo og positibo nga mga paagi sa paghunahuna ug mohan-ay sa inyong kinabuhi, makapakunhod sa mga kinaiya nga dili makaayo sa kaugalingon, ug sinatia ug ipahayag ang dakong pagpasalamat.6
Ang walay pailub makapugong sa hugot nga pagtuo. Ang hugot nga pagtuo ug pagpailub makatabang sa mga misyonaryo nga makasabut sa bag-ong pinulongan o kultura, ang mga estudyante nga makamaster sa bag-ong mga hilisgutan, ug mga young single adult sa pagsugod sa paglig-on og mga relasyon kay sa maghulat sa tanan nga mahingpit. Ang hugot nga pagtuo ug pagpailub makatabang usab niadtong naghulat sa clearance nga mabugkos sa templo o pagpahiuli sa mga panalangin sa priesthood.
Samtang kita molihok ug dili aghaton sa paglihok (tan-awa sa 2 Nephi 2:14), kita makakita og paagi tali sa susama nga mga hiyas ug makakab-ot og daghan sa kalamboan sa kinabuhi. Makita kini diha sa “katugbang,” nga mao ang “natingob sa usa” (2 Nephi 2:11).
Sama pananglit, mahimo kitang mohunong sa pagkatapulan (tan-awa sa D&P 88: 124) nga dili modagan labaw pa kay sa atong kusog (tan-awa sa Mosiah 4:27).
Kita mahimo nga “matinguhaon nga moapil diha sa usa ka maayo nga katuyoan” (D&P 58:27) samtang usab matag karon ug unya mohunong nga “pagmalinawon, ug hibaloi nga Ako mao ang Dios” (Salmo 46:10; tan-awa usab D&P 101:16).
Makaplagan nato ang atong mga kinabuhi pinaagi sa pagwagtang sa atong kinabuhi tungod sa Manluluwas (tan-awa sa Mateo 10:39; 16:25).
“Ayaw pagluya diha sa maayo nga buhat” (D&P 64:33; tan-awa usab sa Mga Taga-Galacia 6:9) samtang maggahin og tukma nga panahon sa pagbag-o sa espirituhanon ug pisikal nga paagi.
Mahimo kitang mangomedya apan dili magbinuang.
Kita mahimong mokatawa sa kinasingkasing apan dili inarogante.
Ang atong Manluluwas ug ang Iyang Pag-ula nagdapit kanato sa “pagduol ngadto kang Kristo, ug maghingpit diha kaniya.” Samtang ato kining buhaton, Siya nagsaad nga ang Iyang grasya “igo alang kaninyo, nga pinaagi sa iyang grasya kamo mahimo nga hingpit diha kang Kristo” (Moroni 10:32).
Alang niadtong nabug-atan sa kabalaka sa pagpangita sa pagkahingpit o nga mahimong hingpit karon, ang libreng gihatag nga maulaong gugma sa atong Manluluwas mihatag nato og kasiguroan:
“Umari kanako, kamong tanan nga nabudlay ug nabug-atan, ug papahulayon ko kamo.
“… Kay masayon ang akong yugo, ug magaan ang akong luwan” (Mateo 11:28, 30).7