Unsay Inyong Nakita?
Kon kita magtuon ug mamalandong sa mga simbolo diha sa mga ordinansa sa ebanghelyo, ang atong mga hunahuna masentro diha kang Jesukristo.
Tungod kay ang mga simbolo naglibut kanato, dili kaayo kita maghunahuna niini. Apan ang makugihong pagbantay sa mga simbolo sa ebanghelyo mahimong usa ka yawe ngadto sa labaw nga panabut.
Ang mga kasulatan naggamit sa mga pulong sama sa matang, anino, simbolo, timaan, timailhan, sambingay, handumanan, saksi, o pagpamatuod sa paghulagway sa usa ka butang nga gituyo aron mapunting ang atong mga hunahuna ngadto sa lain pang butang (tan-awa sa Moises 6:63). Sama pananglit, sa dihang si Jesus mipasiugda sa sakrament diha sa Katapusang Panihapon, Siya mihatag sa Iyang mga disipulo sa gipikas-pikas nga tinapay nga ilang kaunon ug miingon, “Kini mao ang akong lawas nga gihatag alang kaninyo: buhata ninyo kini sa paghandum kanako” (Lucas 22:19). Karon, klaro kaayo nga ang tinapay dili literal nga Iyang lawas; sama sa Iyang giingon, gituyo kini sa pagpahinumdum kanato sa Iyang lawas—ug daghan pa. Kana ang nakahimo sa mga simbolo nga gamhanan kaayo—kini mopasabut bisan dili mogamit og mga pulong ug makaugmad og pipila ka mga susamang hunahuna diha-diha, nga nagdugang og gilawumon ug kahulugan.
Siyempre, ang mga ordinansa dili lamang pangsimbolo nga mga lihok; kini nagdala og tinuod nga gahum sa pagpanalangin kanato pinaagi sa awtoridad sa priesthood. Apan kini usab naglakip og mga simbolo nga nagtudlo kanato mahitungod sa Manluluwas ug mahitungod sa atong mga pakigsaad. Bisan ang buhat sa pagtugyan ngadto ug pagdawat og usa ka ordinansa sa priesthood mao ang usa ka makitang timailhan sa hugot nga pagtuo ug pagkamapainubsanon sa usa ka tawo. Ania ang kadaghanan sa mga simbolo nga may kalabutan sa mga ordinansa sa bunyag, kumpirmasyon, ug ang sakrament, ingon man ang pipila sa mga ideya nga may kalabutan niini.
Bunyag
Tubig: paghugas, paglimpyo, pagkalunsay gikan sa sala
Puti nga sinina: kaputli (“walay usa ka tawo nga maluwas gawas kon ang iyang mga saput mahugasan nga puti … [ug] mahugasan … pinaagi sa dugo [ni Kristo] [Alma 5:21]); pagkapareho (adunahan o kabus, tanan magsul-ob sa sama nga sinina sa bunyag, kay “ang tanan managsama ngadto sa Dios” [2 Nephi 26:33])
Giisa nga tuong kamot: pagkab-ut ngadto sa langit, pagsaksi ngadto sa langit; usab timaan sa usa ka panumpa (tan-awa sa Genesis 14:22; Daniel 12:7)
Pagpaunlod: ang kamatayon, paglubong ug Pagkabanhaw ni Kristo (tan-awa sa Mga Taga-Roma 6:3–4); atong espirituhanong pagpakatawo og usab diha kang Kristo (“igaanak sa tubig” [Juan 3:5])
Kumpirmasyon
Pagpandong sa mga kamot: pisikal nga paghikap niadtong nagrepresentar sa Dios, pagbalhin sa mga panalangin gikan sa Dios ngadto sa uban
Pagdawat sa gasa sa Espiritu Santo: gitawag og “bunyag sa kalayo” (tan-awa sa 2 Nephi 31:13); pagkalimpyo ug espirituhanong pagpakatawo og usab diha kang Kristo
Sakrament
Pagbutang og pan ug tubig sa atubangan sa kongregasyon: mga simbolo sa sakripisyo ni Kristo, nga maoy nagtapos sa sakripisyo pinaagi sa pagpaagas sa dugo (tan-awa sa Alma 34:13–14); kita karon mohalad og usa ka “sakripisyo ngadto sa Ginoo … nga usa ka masulub-on nga kasingkasing ug usa ka mahinulsulon nga espiritu” (D&P 59:8)
Ang pagpikas-pikas sa pan: lawasnong pag-antus ni Kristo alang kanato, Iyang pisikal nga kamatayon, Iyang Pagkabanhaw aron kita mabuhi pag-usab
Pagluhod aron mag-ampo: pagpaubos, pagtugyan ngadto sa kabubut-on sa Dios; timaan sa walay katapusan nga pakigsaad (tan-awa sa D&P 88:131)
Pagkaon sa pan: paghinumdom sa lawas ni Jesukristo (tan-awa sa Mateo 26:26–29), ang pan sa kinabuhi (“siya nga moari kanako dili gutumon” [Juan 6:35], “siya nga mokaon niining maong tinapay mabuhi sa dayon” [Juan 6:58])
Pag-inom sa tubig (bino sa orihinal): ang dugo ni Kristo (gipaagas sa Getsemani, atol sa Iyang pag-antus diha sa mga kamot sa mga sundalo, ug diha sa krus), diin “nagahinlo kanato gikan sa tanang sala” (1 Juan 1:7) ug “anaa sa pakigsaad sa Amahan ngadto sa kapasayloan sa [atong] mga sala” (Moroni 10:33); dugo isip “sa lingkuranan sa kinabuhi o kusog nga mahinungdanon sa tanan nga unod (Giya ngadto sa mga Kasulatan, “Dugo”; scriptures.lds.org) ug kana nga nag-ula alang sa mga sala pinaagi sa sakripisyo (tan-awa sa Levitico 17:11); buhi nga tubig (tan-awa sa Juan 4:14)