Alang sa Kalig-on sa mga Kabatan-onan
Trabaho Kinsay Nagkinahanglan Niini?
Ang trabaho dili kanunay makalingaw, apan tingali mahibulong kamo sa kanindot sa inyong bation niini.
Paghulagway pinaagi ni Brian Call
Isip usa ka batan-ong lalaki, ganahan ko nga magdula ug maglingaw-lingaw sama ni bisan kinsa. Ug sa dihang nag-16 na ko, ganahan ko makig-date ug makig-uban sa akong mga higala. Mas nalingaw ko niadto nga mga kalihokan kay sa mga trabaho.
Apan, sama sa kadaghanan kaninyo, ako adunay trabaho. Ang akong amahan nagtrabaho sa negosyo sa konstruksyon, nagtukod og mga panimalay, ug kanunay iyang paapilon ang akong tulo ka mga igsoon ug ako sa pagtabang kaniya. Ang trabaho init ug mapugsanon; adunay mga higayon nga dili gyud ko ganahan motrabaho. Apan kami adunay mga iskedyul nga tumanon ug mga proyekto nga kompletuhon, mao nga kami nagkugi matag adlaw hangtud nga mahuman ang trabaho. Bisan tuod ako wala makamatngon niini nianang panahona, ang pagtrabaho uban sa akong pamilya mitudlo kanako og daghang mga leksyon.
Ang Katagbawan Moabut gikan sa usa ka Maayong Pagkabuhat nga Trabaho
Ang pagtukod og mga panimalay nagkinahanglan og daghang mga panahon, paningkamot, ug pagkaeksakto. Usa ka dapit diin ako nagtuo nga dili kami kinahanglang eksakto gayud mao ang pagkalot sa mga footing alang sa balay. Ang akong amahan lahi og hunahuna.
Sa pagpahimutang sa pundasyon sa usa ka balay, unahon nimo ang pagkalot ug pagbu-bu sa mga footing. Ang mga footing mao ang mga hanig nga semento nga mas lapad sa pundasyon. Kon ang mga footing nabuhosan ug migahi na, imong ibu-bu ang pundasyon ibabaw sa footing. Dayon imoha kining tabunan og balik sa kinalot nga yuta.
Kanunay akong naghunahuna kon importante ba gyud nga hingpit ang pagka-kwadrado sa mga footing. Total, kay gitabunan man kini sa yuta, dili ni makita ni bisan kinsa, ug dili kini makapahuyang sa estraktura nga nagsuporta sa balay. Apan ang akong amahan gusto gyud nga ang mga footing kwadrado ug patag, gisukod sa sakto ug mainampingong paagi, ug iya kining gibuhat sa matag balay nga iyang gitukod.
Sa paghinumdom, akong naamgohan nga ang akong amahan mihimo sa tanan niyang trabaho uban sa sama nga pag-amping, gani bisan sa mga butang nga dili mabantayan sa tag-iya. Ang iyang pagkadetalyado sa trabaho nagpasabut nga ang mga tawo makasalig kaniya sa pagbuhat og maayo nga trabaho, ug siya adunay katagbawan nga mahibalo nga maayo kaayo ang kalidad sa iyang trabaho ug nga modayeg niini ang mga tag-iya.
Mahimong may mga panahon nga walay laing masayud gawas ninyo ug ang Ginoo kon unsa ka maayo ninyong gihimo ang buhat nga gikinahanglan ninyo nga buhaton. Pagmasaligon nga ang Ginoo maoy nasayud sa inyong paningkamot. Samtang inyong buhaton ang inyong labing maayo, kamo mobati og kamaayo sa inyong kaugalingon, nasayud nga kamo nakapalambo og kaligdong, kasaligan ug mapuslanon nga mga kahanas.
Makakat-on kamo pinaagi sa inyong kasinatian sa kabililhon sa balaod sa ting-ani sa Ginoo: “Kay bisan unsay igapugas sa tawo, mao usab kana ang iyang pagaanihon” (Mga Taga-Galacia 6:7; tan-awa usab sa D&P 130:20–21).
Ang Kinaiya Moapekto sa Tanan
Ang pagkalot sa mga footing nagpasabut og dugayng kahago, sa mga oras nga naa ang kainit, ug moangkon ko, dili kanunayng maayo akong kinaiya kabahin niini. Matag higayon nga masakpan ko sa akong inahan nga nagreklamo sa trabaho, siya moingon, “Pagbantay. Mawala unya na ang imong panalangin, ug kinahanglan gihapon ka nga motrabaho!” (Tan-awa sa D&P 58:28–29.) Husto siya. Ang pagreklamo dili gyud makapawagtang sa trabaho; makapawagtang lang kini sa katagbawan ug sa daghang mga panalangin sa pagbuhat niini.
Akong nabantayan nga kon akong pilion ang pagpaminaw sa akong inahan ug motrabaho uban sa malipayon nga kasingkasing, mas dali nga molabay ang panahon, mas maayong pagkatrabaho ang buluhaton, ug mas nagmalipayon ko kay sa kon ako nagreklamo. Ang kinaiya moapekto sa tanan.
Ang Labing Importante nga Trabaho Mao ang Buhat sa Dios
Ang pagserbisyo og misyon maoy usa ka kasinatian nga nakatabang sa akong pagsabut sa akong kaugalingon. Akong naamguhan nga walay laing buhat nga mas importante kay sa buhat sa atong Langitnong Amahan, nga mao ang pagpanalangin kanato, Iyang mga anak: “Kay tan-awa, mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo” (Moises 1:39).
Samtang kamo nagbuhat sa buhat sa Langitnong Amahan sa pag-alagad sa Iyang mga anak, inyong makaplagan, sama ni Alma, ang dakong kalipay nga mahimong “himan diha sa mga kamot sa Dios aron sa pagdala sa pipila ka mga kalag ngadto sa paghinulsol; ug kini mao ang [inyong] hingpit nga kalipay” (Alma 29:9).
Usa ka Pagdapit
Busa kinsay nanginahanglan sa trabaho? Kitang tanan! Kini mao ang tinubdan sa pagpaningkamot sa kaugalingon, kalampusan, ug hingpit nga kalipay niining kinabuhia. Samtang kamo magmalipayong motrabaho, tanang naglibut ninyo moani og buhong nga ani tungod sa mga liso nga inyong gipugas.
Samtang magpadayon kamo sa inyong semana, ako modapit kaninyo sa paghunahuna mahitungod sa mga leksyon nga akong nakat-unan ug dayon sulayi kini nga eksperimento: sa sunod higayon nga hatagan kamo og trabaho nga buhaton, hatagi kini sa inyong pinakamaayo nga paningkamot, pagbaton og malipayon nga kinaiya, ug tan-awa unsa ang mahitabo. Masurprisa kamo sa kalipay ug kamaayo nga inyong bation.