Peran N̄AN KĀLET Karbōb Ilo Nuknuk
Jān Carol F. McConkie
Rikakpilōklōk eo Kein Kajuon ilo Būreejtōnji eo Eutiej an Doulul eo an Jiron̄ ro
Jān juon kōnono letok ilo Māe 2, 2013, ilo Kweilo̧k eo an Kōrā ilo Brigham Young University.
Ta eo jemaron̄ katakin ļaddik im leddik ro nejid n̄an jipan̄ er peran n̄an kālet karbōb ilo nuknuk ilo juon laļ eo naaj kajjirere kake er kōn kālet ko aer rewānōk?
Etke karbōb ilo nuknuk elukkuun aorōk? Etke enaaj aorōk juon kout, juon nek tai, ak jōōt n̄an Irooj? Ij jinen ļalem leddik ro im ruo ļaddik ro, im āinwōt ami maron̄ pijaik, unin kōnono eo kōn karbōb ilo nuknuk eaar waļo̧k tok ilo m̧weo imōm̧ kar juon iien. Ak ium̧win elōn̄ iiō ko, iaar katak bwe karbōb ilo nuknuk ej em̧m̧antata katakin jān katak im kōm̧m̧an juon waanjon̄ak em̧m̧an. Katak eo enaaj jipan̄ ajri eo nejū meļeļe etke karbōb ilo nuknuk elukkuun aorōk, im waanjon̄ak eo ad enaaj kōmeļeļeik kōjeram̧m̧an ko kōn karbōb ilo nuknuk ilo wāween ko relem̧ōņōņō.
Ta In Karbōb ilo Nuknuk?
Karbōb ilo nuknuk ej juon pedped in katak letok jān Anij bwe en maron̄ jipan̄ kōj katak kilen kōjerbal ānbwinnid ilo jejjet ijin ilo mour in. Meļeļe eo an karbōb ilo nuknuk ilo True to the Faith ej “Juon m̧wil ettā im m̧wil ilo nuknuk, tōrejab, kōnono, im m̧anit.”1 Karbōb ilo nuknuk ej jab ļōmņak kōn kōj make ak nōbar eok make. Armej eo ekarbōb ilo nuknuk ejjab kōjerbal ānbwinnin ak m̧wil ko aer n̄an pukōt kōmālim jān laļ ak kepaaktok m̧ad n̄an er make ak tōprak ko ak m̧wil in kareel ko.
Jouj keememej bwe pedped in katak ko an karbōb ilo nuknuk raar kwaļo̧k ijin rej jerbal jim̧or n̄an em̧m̧aan ro im kōrā ro, ļaddik ro im leddik ro, im keememej bwe men̄e jej katakin im kōmeļeļeik karbōb ilo nuknuk, jeban kakkure ro rej kālet nuknuk ko rekadu ak “kōļar in bar im elōn̄ dede ilo̧jin̄ii ko ak lo̧n̄ii ko.”2 Aolep iien kōm̧ij kōmeļeļeik en̄jake eļap im iakwe eo an Kraist n̄an kajjojo armej tōre in jej kautiej jon̄ak ko an Irooj eaar kōm̧m̧ani.
Ij kam̧ool bwe kālet ko jej kōm̧m̧ani n̄an kwaļo̧k im kōm̧anit rej kwaļo̧k juon ennaan ekajoor me jej meļeļe kadkad eo ad āinwōt ļaddik im leddik ro nejin Anij im bwe jaar kālet n̄an jutak ilo jikin ko rekwojarjar.
Ij iakwe eoon in: “Kom̧ jab jeļā ke bwe kom̧ tempel an Anij, im Jetōb an Anij ej jokwe ilo kom̧? … “Bwe tempel an Anij e kwojarjar, im kom̧ tempel eo” (1 Korint 3:16–17). Ānbwinnid rej tampeļ ko an jetōb ko ad. Ej n̄an ānbwin tampeļ ko me jej karuwaineneik jem̧jerā eo an Jetōb Kwojarjar. Ij tōmak bwe n̄e jej kālet n̄an kōņak nuknuk ko rekarbōb im kōm̧anit kōn juon m̧wil em̧m̧an, jej kōņak im jen mour kōn naan in kam̧ool eo ad kōn Anij Jemed Indeeo im Nejin, Jisōs Kraist. Jej kam̧ool jān paotokid bwe jej rikaļoor an Kraist im bwe jej mour kōn gospel eo An.
Etke Karbōb Ilo Nuknuk Elukkuun Aorōk?
Jej mour ilo juon laļ em̧m̧an im enana, im ānbwinnid maron̄ kōjerbale n̄an wāppen ak kōttōbar ko renana. Ak jejeļā bwe ānbwinnid em̧m̧an ej juon menin letok jān Anij n̄an kōj kajjojo. Er rej kwojarjar. Elder David A. Bednar jen Doulul eo an Jon̄oulruo Rijilōk ro eaar katakin, “n̄an kom̧ ro raar jeļā im meļeļe karōk in lo̧mo̧o̧r eo, kattoonon ānbwin ej juon m̧akūtkūt in jum̧ae [lale Mosaia 2:36–37] im juon kaarmejete kadkad eo ad em̧ool āinwōt ļaddik im leddik ro nejin Anij.”3 Jej kālet n̄an kea kake im kōjparok ānbwinnid bwe jen maron̄ kein jerbal ko ilo pein Anij n̄an bōktok aiboojoj im kōttōbar eo An (lale Alma 26:3). Eļan̄n̄e jej kōņaan n̄an jutak kōn Rilo̧mo̧o̧r eo im kōm̧m̧ane jerbal eo An, jej aikuj kajjitōk ippād make, Eļan̄n̄e Rilo̧mo̧o̧r eo ej jutak iturājetid, enaaj em̧m̧an ke ad en̄jake ilo ad ekkōņan nuknuk ko jej kōņaki?
Karbōb ilo nuknuk, paotok, ļōmņak, im m̧wil ej kam̧ool eo bwe jej meļeļe bujen ko jaar kōm̧m̧ani ko rej kōjeram̧m̧an kōj, kōjparok kōj, im kōkajoor kōj ilo ad m̧aanjebpopo n̄an ro̧o̧lļo̧k n̄an im̧aan mejān. Ke jaar peptaij, jaar diwōjļo̧k jān laļ in im deļo̧n̄eļo̧k aelōn̄ in kiin̄ eo an Anij. Men otemjej rej aikuj in oktak n̄an kōj. Elder Robert D. Hales jen Doulul eo an Jon̄oulruo Rijilōk ro eaar katakin: “Jān kālet n̄an pād ilo aelōn̄ in kiin̄ eo An, jej kōjeno̧lo̧k—jab kajeplōklōk—kōj make jān laļ in. Nuknuk ko ad ren karbōb, ļōmņak ko ad ren erreo, naan ko ad ren em̧m̧an.”4
Karbōb ilo nuknuk ej juon pedped in katak eo enaaj jipan̄ kōj kōjparok ilo iaļ in bujen eo ilo ad etal m̧aanļo̧k n̄an im̧aan mejān Anij. Karbōb ilo nuknuk im paotok im ilo ļōmņak im m̧wil naaj jipan̄ kōj kōpooj kōj n̄an kōm̧m̧an im kōjparok bujen ko rekwojarjar an tampeļ. N̄an kōjeram̧m̧an im kōjparok Adam im Eve, Anij eaar leļo̧k kilin menin mour n̄an kanuknuk er m̧okta jān an kadiwōjļo̧k er jān jikin kallib eo. Ilo wāween in wōt, Anij eaar letok n̄an kōj juon bujen nuknuk ilo mour in, eaar kōkkaļļen tampeļ kaarmen ko ad rekwojarjar.
Ta Kōjeram̧m̧an ko an Karbōb ilo Nuknuk?
Ta eo jemaron̄ katakin ļaddik im leddik ro nejid n̄an jipan̄ er peran n̄an kālet karbōb ilo nuknuk ilo juon laļ eo naaj kajjirere kake er kōn kālet ko aer rewānōk? Rej ke loe ad kōjerbal ānbwinnid n̄an kepaaktok ak n̄an kaiboojoj Anij?
Karbōb ilo ļōmņak, naan, paotok, im m̧wil ej jipan̄ kōj bōk jilu kajoor im kōjeram̧m̧an ko.
1. Karbōb ilo nuknuk ej karuwaineneik jem̧jerā eo an Jetōb Kwojarjar. Elder Hales eaar katakin, “Karbōb ilo Nuknuk ej pedped eo n̄an erom erreo eo an Jetōb.”5
Jen jipan̄ ajri ro nejid meļeļe bwe reban kōņaan in kōm̧m̧an jabdewōt men n̄an kaarmejete er make jān menin letok eo ejejuwaan an Jetōb Kwojarjar eo (lale D&C 121:26). Jipan̄ er jeļā bwe aiboojoj im kajoor an menin letok ko rej ekkejel ippān jem̧jerā eo ekwojarjar An. Anij eaar kalim̧m̧ur bwe Enaaj letok n̄an kōj Jetōb eo An, eo enaaj kōmeramļo̧k ļōmņak ko ad, eo enaaj kobrak jetōb ko ad kōn lan̄lōn̄. Kōnke menin jenaaj jeļā men otemjej jej kōņaan kōn E, ko rej kōn men ko rewāppen, ilo lōke im tōmak ilo E menin jenaaj bōke (lale D&C 11:13–14). Jeļāļo̧kjeņ, māletlet, im naan in kam̧ool; lan̄lōn̄, aenōm̧m̧an, im lem̧ōņōņō—men kein rej jet iaan kōjeram̧m̧an ko reļļap jemaron̄ in kalim̧m̧uri ajri ro nejid ilo ad karuwaineneik er n̄an mour karbōb ilo nuknuk im erreo kōn Jetōb Kwojarjar eo.
Juon iaan apan̄ ko kōn karbōb ilo nuknuk ej ed ko im iaio in m̧wil ko rekkar rej oktak aolep iien. Jon̄ak ko an Irooj rej jamin oktak. Katakin likao ro im jiron̄ ro n̄an kea kōn Jetōb eo ilo aer kōm̧m̧an kālet ko kōn ta eo rej kōņake, ba, im kōm̧m̧ane. Ilo aer mour epaakeļo̧k Jetōb eo, rej jab aikuj in āinwōt laļ in.
Ajri ro nejid raar bōk menin letok eo an Jetōb Kwojarjar eo, im rej ito itak ilo iaļ in bujen eo ej tōlļo̧k n̄an tampeļ eo im naaj ro̧o̧lļo̧k n̄an im̧aan mejān Anij. Rej aikuji kōj n̄an kam̧ool n̄an er im kōmeļeļeik n̄an er bwe renaaj tōl, kōjparok, kaenōm̧m̧an, im karreeo n̄e rej mour erreo kōn Jetōb Kwojarjar eo.
2. Jemaron̄ katakin ļaddik ro im leddik ro nejid bwe paotok in karbōb ilo nuknuk im m̧wil ej jipan̄ kōjparok kōj jān kareel in kakkure ko an laļ in. Juon iaan kein jerbal in moņ eo kōjerbale ņae kōj aolep ej m̧wil in iaio eo karōke me jon̄ak eo ej kwaļo̧k kadkad in m̧wil eo etto. Karbōb ilo nuknuk ej juon kein bōbrae ņae kareel ko renana im juon kein kōjparok an erreo im wānōk. Ron̄jake naan kein ilo For the Strength of Youth: “M̧okta jān m̧are, … jab kōm̧m̧an jabdewōt men … ko rej kan̄ōl en̄jake ko an mōm̧ in kanniōk.”6 Paotok eo ejjab karbōb ilo nuknuk im ilo m̧wil enaaj ekkā an kan̄ōltok en̄jake ko an mōm̧ in kanniōk im naaj rube menin bōbrae ko im kadeļo̧n̄ kapo eļap n̄an rube kien erreo.
Elder Hales eaar katakin: “Karbōb ilo nuknuk ej ioļapļap in erreo im wānōk, jim̧or ilo ļōmņak im kōm̧m̧an. Ilo wāween in, kōnke ej tōl im kareel ļōmņak ko ad, m̧wil ko, im jokālet ko, karbōb ilo nuknuk ej pād ilo m̧ōttan eo eļap an kadkad eo ad.”7 Katakin im kōmeļeļeik karbōb ilo nuknuk n̄an jipan̄ likao ro im jiron̄ ro m̧aanjebpopo n̄an ire ņae im kōjparok kajoor in neji eo ippāer make. Jipan̄ er kabwijer kwojarjar im dāpij im̧we eo an iakwe ikōtaan ļeo pālele im kōrā eo pālele n̄an m̧are.
3. Karbōb ilo nuknuk ej kōmaron̄ ad “jutak āinwōt ri kam̧ool ro an Anij ilo aolep iien ko” (Mosaia 18:9). Rilo̧mo̧o̧r eo eaar katakin: “Kotak ami meram bwe en maron̄ kōmeramļo̧k laļ. Lo N̄a ij meram eo kom̧ naaj kotak lōn̄ļo̧k” (3 Nipai 18:24). Ewōr ippād juon mālim ekwojarjar n̄an erom juon meram n̄an laļ in, n̄an kwaļo̧k lan̄lōn̄ eo ilo mour kōn gospel eo, n̄an katakin wāppen, im n̄an kalōk aelōn̄ in kiin̄ eo an Anij ioon laļ in. Kōj kajjojo ej kabōl Meram eo an Kraist n̄e jej karbōb ilo nuknuk im erreo im kōjparok kien ko an. Karbōb ilo nuknuk ej juon kam̧ool in naan in kam̧ool eo ad kōn Rilo̧mo̧o̧r eo im kōn gospel eo an Jisōs Kraist.
Eaiboojoj wōt im ejeram̧m̧an wōt ro rej tōl jān Jetōb Kwojarjar, ro rej kōjparok er make jān laļ in, im ro rej jutak āinwōt rikam̧ool ro an Anij n̄an laļ in. Im ejeram̧m̧an ro rej kōmeļeļeik im katakin katak eo kōn karbōb ilo nuknuk n̄an aolep ļaddik ro im leddik ro nejin Zaion.
Ilo ad kar kōm̧m̧an bujen n̄an ļoor Rilo̧mo̧o̧r eo im kōņaan n̄an bōk tarlep in kōjeram̧m̧an ko an Pinmuur eo An ilo mour ko ad, ewōr wōt em̧ool juon nuknuk eo ewōr tokjān. Moronai ej ļo̧o̧ke, “Ruj, im jerkak jān bwidej … aaet, kōņak nuknuk ko rekarbōb, O lim̧aro nejin Zaion; … bwe bujen ko an Jemān Indeeo … rej kūrm̧ool” (Moronai 10:31; aorōk eo kobaiktok).
Nuknuk ko rekarbōb rej to ko an wāppen, kōņaki jān ro raar kōjparok bujen ko aer. Jej ke kōpooje ajri ro nejid n̄an kōņan nuknuk kein rekarbōb?
Ij kam̧ool bwe lo̧mo̧o̧r ej ilo Kraist im bwe ro raar kōjparok bujen ko aer renaaj “weppān kōn m̧ōm̧ ko aer, im aer em̧m̧an, kalibobo kōn erreo, aaet, em̧ool kōn liboror in weppān” (2 Nipai 9:14).