Mijenede, Menmenbwij an Baam̧le, im Jerbal in Tampeļ
Jen Elder David A. Bednar
Jen Doulul eo an Jon̄oulruo Rijilōk ro
Jān juon kōnono kar leļo̧k ilo kweilo̧k eo n̄an mijen būreejtōn ro rekāāl ilo Juun 25, 2013.
Ilo juon kweilo̧k ekwojarjar ilo Kirtland Temple ilo Eprōļ 6, 1837, Rikanaan Joseph Smith eaar ba, “Ālkin kar kwaļo̧k men otemjej, eddo eo eļap im aorōk tata ej n̄an kwaļo̧k Gospel eo.”1
Enan̄in jiljimjuon iiō ko tokālik, ilo Eprōļ 7, 1844, eaar kwaļo̧k: “Eddo eo eļap tata ilo laļ in me Anij eaar likūt iood ej n̄an lale wōn ro nukid remej. Rijilōk ro rej ba, ‘Bwe ren jab weeppān makeļo̧k iaer jān kōj’ [lale Hibru 11:40]; bwe ej menin aikuj bwe kajoor n̄an liāp ej aikuj in pād ilo peid n̄an liāpe ajri ro nejid im ro nukid remej n̄an tarlep in tōre ko—juon tōre n̄an bōk kalim̧m̧ur ko kar kōm̧m̧an jān Jisōs Kraist m̧okta jān pedped ko an laļ in n̄an lo̧mo̧o̧r an armej.”2
Elōn̄ jet armej remaron̄ ļōmņak ewi wāween an men kein jim̧or kwaļo̧k gospel im pukot lo̧mo̧o̧r n̄an ro nukid emōj aer jako maron̄ in eddo ko im jerbal ko reļļap Anij eaar likūt ioon ajri ro Nejin. Kōttōbar eo aō ej n̄an kwaļo̧k bwe katakin kein rej kalikkar ippān doon im juon wōt an jerbal in lo̧mo̧o̧r ilo raan kein āliktata. Jerbal in mijenede im menmenbwij an baam̧le im jerbal in tampeļ ejjeļo̧k wōnāer im rej ekkejel ippān wāween ko ilo juon jerbal eļap, “N̄an jerbal an iien ko re jejjet, bwe En kobaik men ko otemjej ilo Kraist, men ko i lan̄, im men ko i laļ, bwe em̧ool ilo E” (Epesōs 1:10).
Ij jar bwe kajoor an Jetōb Kwojarjar enaaj jipan̄ eok im n̄a ilo ad ļōmņak ippān doon kōn kabwilōn̄lōn̄ eo an jerbal in lo̧mo̧o̧r in ilo raan-kein.
Bōro ko im Kain̄i ko an Priesthood
Kwaļo̧k gospel eo im pukot armej n̄an ro nukid emōj aer jako rej ruo ijjitōn̄ in jerbal ko rekwojarjar me rejelet jim̧or būruwōd im kain̄i ko an priesthood. Aorōk in jerbal eo an Irooj ej ukōt, kōro̧o̧l, im karreoki bōro ko jen kōm̧m̧ani bujen ko im kain̄i ko jān priesthood eo emālim im ekkar.
Naan eo bōro kōjerbale elōn̄ļo̧k jān 1,000 kōttan ilo bok ko jilu rekwojarjar im ej kōkkaļļeik en̄jake ko ippān juon armej. Mekarta, būruwōd—ej waļo̧k in kōņaan ko ad, ikdeleel ko, karōk ko, un ko, im m̧wil ko—rej kōmeļeļeik wōn kōj im kwaļo̧k ta eo jenaaj erom.
Jibadbad eo an Irooj n̄an jerbal in mijenede ej n̄an kūrtok aolep n̄an itok n̄an Kraist, bōk kōjeram̧m̧an ko an gospel eo emōj an jepļaaktok, im niknik n̄an jem̧ļo̧kin jen tōmak ilo Kraist.3 Kōm̧ij jab kwaļo̧k gospel eo n̄an kōļapļo̧k jon̄an im dettan im kajoor an Kabun̄ eo raan-kein. Ijjello̧k, jej pukōt n̄an kakūrm̧ool ijjitōn̄ eo ekwojarjar im eddo eo n̄an kwaļo̧k m̧ool in karōk in m̧ōņōņō eo an Jemād, ekwojarjar an Nejin Emake Wōt, Jisōs Kraist, im tōprak in pinmuur eo an Rilo̧mo̧o̧r eo. Karuwaineneneik aolep n̄an “itok n̄an Kraist” (lale Moronai 10:30–33), en̄jake “oktak ekajoor” ilo buruōn (lale Alma 5:12–14), im leļo̧k kain̄i in lo̧mo̧o̧r ko n̄an kajjojo ilo mour in n̄an ro rej jan̄in bujen rej jibadbad ko raorōk n̄an kwaļo̧k gospel in ippāer.
Kōppeļļo̧k mour ippān Anij n̄an ro remour im ro remej ej jibadbad eo an Irooj n̄an kalōk tampeļ ko im kōm̧m̧ani kain̄i ko rellōn̄. Jej jab kabun̄ ilo tampeļ ko rekwojarjar bwe en wōr ad ememļo̧kjeņ ak en̄jake an baam̧le. Ijjello̧kin, jej pukōt n̄an kakūrm̧ool ijjitōn̄ eo ekwojarjar im jerbal eo n̄an leļo̧k kain̄i in lo̧mo̧o̧r im mour ippān Anij n̄an aolep baam̧le. Katōk ilo būruwōn ajri ro kalim̧m̧ur ko kar kōm̧m̧ani n̄an ro jemāer, aaet Ebream, Aisek, im Jekab; ukōt būruwōn ajri ro n̄an ro jemāer make; im kōm̧m̧ani menmenbwij an baam̧le im kain̄i ko rellōn̄ ilo tampeļ eo rej jerbal ko me rej kōjeram̧m̧an kajjojo ilo laļ eo an jetōb ro rej jan̄in kōm̧m̧an bujen.
Kain̄i ko an priesthood rej iaļ eo n̄an kajoor in drikanij:
Priesthood eo an Melkisedek ej kwaļo̧k gospel eo im kabwijer kii eo an menin ittiņo̧ an aelōn̄ in kiin̄ eo, aaet kii eo an jeļāļo̧kjeņ an Anij.
Kajoor in drikanij ej waļo̧k ilo kain̄i ko an Priesthood eo an Melkisedek.
Eļan̄n̄e ejjab kain̄i ko an priesthood eo im mālim eo an priesthood eo, kajoor in drikanij ej jab waļo̧k ippān armej ilo kanniōk (lale D&C 84:19–21).
Jouj ļōmņak kōn em̧m̧an in eļap an eoon kein. Juon armej ej aikuj m̧okta eļļā jen kōjam̧ in peptaij im bōk menin letok eo an Jetōb Kwojarjar—im wōnm̧aanļo̧k ilo iaļ in bujen ko im kain̄i ko rej tōlļo̧k n̄an Rilo̧mo̧o̧r eo im kōjeram̧m̧an ko an Pinmuur eo An (2 Nipai 31). Kain̄i ko an priesthood rej lukkuun in aorōk n̄an lukkuun “itok n̄an Kraist, im weppān ilo E” (lale Moronai 10:30–33). Eļan̄n̄e ejjab kain̄i ko, juon armej ejjab maron̄ bōk aolep kōjeram̧m̧an ko kar kōmaron̄i jen pinmuur eo eļap im en̄taan an Irooj (lale Alma 34:10–14)—aaet kajoor in drikanij.
Jerbal eo an Irooj ej juon jerbal eaiboojoj pedped wōt ioon bōro ko, bujen ko, im kain̄i ko an priesthood eo.
Ļōmņak ko
Katak in ekwojarjar ej ļōmake ruo ļōmņak ko raorōk n̄an jerbal eo ad ilo Kabun̄ in.
M̧oktata, ekkā ad maron̄ kōm̧ad kōj kōn men ko rej jab aorōk n̄an kōjno̧lo̧k kōkkar ko an jerbal in lo̧mo̧o̧r eo im kakien ko im wāween jerbal ko rej ekkejel ippāer. Ij mijak bwe elōn̄ iaad remaron̄ leļo̧k eļap im eļap maron̄ n̄an jejjo wōt m̧ōttan ko an jerbal eo an Irooj eo jej likjab ie n̄an bōk tarlep in kajoor eo an jerbal in lo̧mo̧o̧r in ejej uwaan.
Tōre in Irooj ej pukōt n̄an kobaik men ko otemjej ilo Kraist, jet iien jemaron̄ m̧ōttan eo im tijem̧ļo̧k ilo wāween ko rej kalikjab ad meļeļe im ad loļo̧kjeņ. N̄e jej eddoik juon kālet, eļap letok n̄an kōtōbalbal būrookraam̧ ko im kōkkōm̧anm̧anļo̧k bōnbōn ko ilo karuwaineneik kajjojo armej n̄an deļo̧n̄i bujen ko im bōk kain̄i ko ilo erreo. Āinwōt juon kepaak ej kipel n̄an erreo, lan̄lōn̄, wōnm̧aanļo̧k in oktak, im kajoor in jetōb im kōjparok eo ej itok jān “kōtļo̧k [buruōd] n̄an Anij” (Hilamōn 3:35). Kōm̧m̧ani im kōttōpraki men otemjej jen laajrak in men ko “n̄an kōm̧m̧ani” ilo gospel eo, eo ejjab kōmaron̄ ad bōk nememein ilo paotokid ak bōktok ukotak eo ekajoor an bōro (lale Alma 5:14).
Ruo, jetōb in Elijah ej ioļapļap in im aorōk n̄an jerbal in kwaļo̧k gospel eo. Bōlen Irooj eaar kōmmejajaik m̧ool in ilo aolep jekjek an m̧akūtkūt raar waļo̧k ke tarlep in gospel eaar jepļaaktok ilo raan kein āliktata.
Ilo Bukwin Wōjke eo, Joseph Smith eaar loe im kōnono ippān Jemād Indeeo im Jisōs Kraist. Visōn in kar kwaļo̧k kadkad in ilo “jerbal an iien ko re jejjet” (Epesōs 1:10) im kōmaron̄ Joseph n̄an katak kōn lukkuun Doulul in Bōran Anij im wōnm̧aanļo̧k in revelesōn.
Turinļo̧k jilu iiō tokālik, ilo uwaak n̄an tiljek in jar joten eo ilo Jeptōm̧ba 21, 1823, ruum̧ in kiki eo an Joseph eaar obrak kōn meram m̧ae eaar meram ļo̧k jān rālep (Joseph Smith—History 1:30). Juon armej eaar waļo̧ktok iturin peet eo an, kūr ļaddik in kōn etan, im kwaļo̧k bwe ekar juon rikwojmeļan jilkintok jān im̧aan mejān Anij im bwe etan ej Moronai (lale Joseph Smith—History 1:33). Eaar kōmeļeļeik Joseph kōn itok eo an Bok in Mormon eo. Innām Moronai eaar kout jān Bok in Malakai ilo Kalim̧m̧ur M̧okta, jidik oktak ewōr tokjān ilo kajin eo kōjerbal ilo King James Version eo:
Irooj eaar ba bwe Enaaj kwaļo̧k tok priesthood eo, jen pein Elijah rikanaan eo, m̧okta jen raan eo eļap im kaam̧jak an Irooj. … Enaaj katōk ilo būruwōn ro nejier kallim̧ur ko kar kōm̧m̧ane n̄an ro jemeer, im būruwōn ro nejier renaaj oktak n̄an ro jemeer. Eļan̄n̄e en kar jab āindein, aolep laļ in enaaj lukkuun ejjeļo̧k tokjān ilo itok eo An kein karuo (lale Joseph Smith—History 1:38–39).
Moronai eaar katakin rikanaan in edik eļaptata ruo unin kōnono ko raorōk rekitbuuj: (1) Bok in Mormon eo im (2) naan ko an Malakai kar kanaan kōn jerbal eo an Elijah ilo jepļaaktok eo “men otemjej Anij ear kōnono kaki, kōn lo̧n̄iin ri kanaan kwōjarjar ro An otemjej jān iien m̧oktata” (Jerbal 3:21). Kōn menin, m̧akūtkūt ko jinointata an Jepļaaktok eo kar kwaļo̧k juon meļeļe ejim̧we kōn Jeban Anij ro Jilu, kar ejaake m̧ool ko kōn an revelesōn wōnm̧aanļo̧k wōt, kwaļo̧k aorōk eo kōn Bok in Mormon eo, im kar karōk jerbal in lo̧mo̧o̧r im mour ilo aiboojoj eo ilōn̄ tata n̄an jim̧or ro remour im ro remej.
Kiiō jouj im ļōmņak kōn jerbal eo an Bok in Mormon eo ilo ukōt bōro ko—im jetōb in Elijah ilo ukōttok bōro ko.
Bok in Mormon eo ilo ekkejel ippān Jetōb eo an Irooj ej “kein jerbal eo eļaptata eo Anij eaar letok n̄an kōj n̄an ukōt laļ in.”4 Bok in ekwojarjar an Jepļaaktok eo ej dōkā in jabōn em̧ an kabun̄ in ad im ej aorōk ilo bōktok jetōb ko n̄an Rilo̧mo̧o̧r eo. Bok in Mormon eo ej bar juon kalim̧m̧ur in Jisōs Kraist—juon kam̧ool eaorōk im pen kōn kwojarjar eo an Ripinmuur eo ilo juon laļ eo ej eddōkļo̧k wōt im eļapļo̧k an jab ekkejel ilo kabun̄ im ej jab lōke em̧m̧an an armej ro. Bōro ko rej oktak ilo an kajjojo armej riit im katak kōn Bok in Mormon im jar ilo bōro em̧ool n̄an katak kōn m̧ool eo an bok in.
Jetōb in Elijah ej “juon kōkkaļe in waļo̧k an Jetōb Kwojarjar ej kwaļo̧k kam̧ool kōn kwojarjar eo an baam̧le.”5 Kareel in ekajoor an Jetōb Kwojarjar eo ej kwaļo̧k kam̧ool eo ekajoor an karōk in m̧ōņōņō eo an Jemād im kinōōrtok armej n̄an pukōt im kōjparok rūtto ro nukier im uwaan baam̧le ko—jim̧or m̧okta im rainin. Jetōb in Elijah ejelet armej jim̧or ilowaan im tulik in Kabun̄ in im kōm̧m̧an bwe bōro ko ren oktakļo̧k n̄an ro jemāer.Jiljino pija ko rej m̧ōttan wōt bwebwenato. Jikāāne code in n̄an an mōkaj an waļo̧k ak etal n̄an lds.org/go/bednar1014 n̄an lale pija juon an juon bwebwenato ej kōmeļeļeik pedped in katak in.
Iien emoottok n̄an ad kōjerbal eļapļo̧k ilo wājepdik ekkejel in ekajoor an oktak ekajoor an bōro, kar kōmaron̄ e jen kajoor in jetōb eo jān Bok in Mormon eo, im ukōt buruwōn ro jemāer, kar tōprak jen jetōb in Elijah. Juon ikdeleel n̄an ekkejelļo̧k ippān tōre ko ad m̧okta maron̄ kōpooj juon armej n̄an bōk wānōk in naan an Anij im kōkajoorļo̧k tōmak an ļeo ak lio. Juon bōro ej oktakļo̧k n̄an ro jemāer ejipan̄ juon armej jelm̧ae kareel an rikapo eo im ej kōkajoorļo̧k oktak.Lale pija ruo n̄an alooje juon bwebwenato ej kōmeļeļeik pedped in katak in.
Pedped in katak ko
Kiiō ij aikuj kalikkar emān pedped in katak ko kōn kajoor an jetōb eo ej waļo̧k ko jān oktak im ukōt bōro ko.
-
Bōro ko im oktak. Ukōt n̄an ro jemāer ej karuj im kōpooj juon bōro n̄an oktak ekajoor. Ilo wāween in, jetōb in Elijah ej jipan̄ oktak.
Lale pija jilu n̄an alooje juon bwebwenato ej kōmeļeļeik pedped in katak in.
4:33 -
Bōro ko im kōjparok. Oktakļo̧k n̄an ro jemād ej rie im kōkajoorļo̧k bōro ko raar en̄jake oktak ekajoor. Ilo wāween in, jetōb in Elijah ej jipan̄ ilo dāpij rioktak ro rekāāl.
Lale pija emān n̄an alooje juon bwebwenato ej kōmeļeļeik pedped in katak in.
1:58 -
Bōro ko im jerbal in kōro̧o̧ltok. Oktakļo̧k n̄an ro jemāer ej kōmeraikļo̧k juon bōro eo eaar jino pen ālkin en̄jake oktak eo ekajoor. Ilo wāween in, jetōb in Elijah ej kii eo ilo bar kōro̧o̧ltok.
Lale pija ļalem n̄an alooje juon bwebwenato ej kōmeļeļeik pedped in katak in.
3:59 -
Bōro ko im mijenede ro reperan. Juon mijenede eo eaar en̄jake jim̧or oktak ekajoor im oktak in bōro naaj ļapļo̧k an oktak, kwojarjarļo̧k, im rikarejar eperanļo̧k.
Lale pija jiljino n̄an alooje juon bwebwenato ej kōmeļeļeik pedped in katakin in.
3:14
Kōn juon eddōkļo̧k eo emōkaj im kajoor in mijenede ro rem̧m̧an im raar pojak, jej jab maron̄ pedped wōt ioon tōprak in kwaļo̧k ko m̧okta n̄an ņamejļan iaļ in ad im kōl ko n̄an ilju im jekļaj. Irooj eaar im̧we kein jerbal ko raan kein im kein jerbal ko rej kōmaron̄ ad jeram̧m̧an jān juon wōt wāween jerbal in mijenede im tampeļ im jerbal in menmenbwij an baam̧le eļapļo̧k jān jabdewōt iien m̧oktaļo̧k ilo tōre in jerbal in. Im ej jab jide bwe kōm̧anm̧an kein ren itok ilo iien in ejejjet me eļap aikuji n̄an lem̧aanļo̧k jerbal in mijenede aolepān laļ in. Jerbal eo an Irooj ej juon jerbal eaiboojoj pedped wōt ioon bōro ko, bujen ko, im kain̄i ko an priesthood eo.
Tukadu in im Naan in Kam̧ool
Irooj eaar kwaļo̧k, “Imaron̄ make kōm̧m̧ane jerbal eo Aō” (2 Nipai 27:21), im Enaaj kōmōkajļo̧k jerbal eo An ilo iien eo An (lale D&C 88:73). Jej rikam̧ool ro An ilo kōmōjkajļo̧k jerbal in An.
Jej mour im jerbal ilo tōre in jerbal in an tarlepin iien ko. Kile aorōk eo ejjeļo̧k jem̧ļo̧kin an tōre in jerbal in eoktak eo jen ad mour aikuj kareel aolep bwe jej kōm̧m̧ane im kajjieon̄ erom. Jerbal in lo̧mo̧o̧r in aikuj tōprak ilo raan kein āliktata eaorōk, eļap, eaikuj, elukkuun in menin aikuj. Ewi jon̄an ad naaj aikuj kam̧oolol kōn kōjeram̧m̧an ko im eddo ko ilo ad mour ilo kajjojo season ilo tōre in jerbal in āliktata. Ekōjkan ad aikuj ettā n̄an jeļā bwe eo ej leļo̧k eļap ej aikuj eļap (lale D&C 82:3).
Kwaļo̧k gospel im pukōt ro nukid remej rej m̧ōttan wōt juon jerbal eļap—juon jerbal in iakwe kar jibadbad eo an n̄an ukōt, kōro̧o̧l, im kareeoik bōro ko an ripukōt m̧ool ro rem̧ool. Ļain eo ej kōjepel ekkā ad likūt ikōtaan jerbal in mijenede im tampeļ im jerbal in menmenbwij an baam̧le emōj an ejjeo̧r; en̄in ej juon wōt jerbal in lo̧mo̧o̧r eļap.6
Jemaron̄ ke jino meļeļe jerbal eo an tampeļ im menmenbwij an baam̧le ilo jipan̄ juon rikkatak ak juon membōr ejaniknik bōk juon meļeļe em̧wilaļ kōn karōk in lo̧mo̧o̧r eo? Jej ke kile bwe juon iaan kareel ko reļļap ilo jerbal in dāpij rioktak ej jetōb in Elijah? Jemaron̄ ke lukkuun in kam̧oolol tōre ko raorōk an bōro oktak jān kwaļo̧k bwebwenato ko an baam̧le āinwōt juon jeram̧m̧an ilo pukōt armej n̄an katakin jen jim̧or membōr ro im mijenede ro? Jemaron̄ ke jipan̄ ro jej jerbal ippāer bōk eļapļo̧k kajoor in drianij jān bōk koņaer ilo erreo ilo kain̄i ko āinwōt kwojkwoj eo im kōkpeptaij ko im kapene ko n̄an ro remej?
En maron̄ alikkar ami loe, jab bōd ami ron̄, im aolep iien keememej aorōk in jerbal in jipan̄ eo ami ilo jerbal an Irooj ilo ukōt, kōro̧o̧l, im kareeoik bōro ko.