Im̧ōko Im̧ōd, Baam̧le ko Ad
MENONO EO AN LIZOCHKA
Rijeje in ej kiiō jokwe ilo Belgium.
Kōmeļeļe jān Annie Henrie
Ļeo pāleō im n̄a kar kobatok ilo Kabun̄ in ilo Russia ilo 1995 im kar liāp ippān doon ilo iiō eo tok juon ilo Stockholm Sweden Temple. Leddik ro ruo nejūm̧ raar barāinwōt liāp n̄an kōm̧. Ruo iiō tokālik kōm̧ ar maron̄ bar jeram̧m̧an kōn bar juon leddik, Lizochka, lo̧tak n̄an kōm̧. Mour ko am raar lukkuun in jeram̧m̧an. Kōm̧ ar lukkuun lem̧ōņōņō. Ak ruo raan alkin lo̧tak eo an, leddik eo nejūm̧ edik eaar dike m̧ōn̄ā. Ilo juon allōn̄ eaar bōk wōt ruo-m̧ōttan in jilu boun (300 g).
Rijerbal ro ilo jikin taktō ajri ro raar jiron̄ kōm̧ bwe en lapļo̧k am najdiki. Iaar lo bwe ekōņaan m̧ōn̄ā ak ejjab itok lim̧oin. Āliktata, ļeo pāleō eaar bōk e n̄an hopital ko jet. Taktō eo eaar m̧ōkaj an letok n̄an kōm̧ juon meļeļe ke—ejorrāān menono jān ke eaar ļo̧tak. Juon iaan baib ko ilo menono eo an eaar jab jerbal, im eaar toor ļo̧k bōtōktōkin n̄an āden im ekōm̧m̧an bwe en pen an emenono ak m̧ōn̄ā.
Eaar aikuj in o̧brejin, ak ilo Russia n̄an an ajri ro reddik bōk o̧brejin in rej aikuj in ruo iiō rūttoier. Leddik eo nejūm̧ eaar juon allōn̄ rūtton. Taktō eo eaar leļo̧k juon kakōlkōl n̄an e im ba bwe tokālik, n̄e erūttoļo̧k, renaaj kōm̧m̧ane o̧brejin eo.
Juon allōn̄ tok ālik, ājmour eo an Lizochka eaar jino nana ļo̧k, im kōm̧ ar m̧ōkaj ļo̧k n̄an aujpitōl. Iaar atbo̧kwōje ke kōm̧ij ettōr ļo̧k. Eaar kalimjōk eō āinwōt n̄e eaikuj jipan̄. Eļan̄n̄e in kar jab membōr in Kabun̄ in, in kar jaje ta eo in kar kōm̧m̧ane. Ak ļeo pāleō im n̄a kar leke wōt Irooj im dim ilo tōmak bwe aolep men enaaj em̧m̧an. Iaar kajieon̄ in kaenōm̧m̧an e, “Jab mijak jabdewōt, neju. Anij ej iakwe kōj. Enaaj jipan̄ kōj, im aolep men enaaj Em̧m̧an.”
Kōm̧ ar tōkeak ļo̧k. Atbo̧kwōj e tok n̄an ippa, iaar ettōr ļo̧k n̄an jikin kōm̧m̧an peba eo. Māj ko mejen Lizochka raar jino kilōk. Eaar emenono jidik. Eaar nan̄in jab kōnono, iaar jiron̄ taktō eo kōn ajri ro neju, im rijerbal eo eaar bōk e n̄an jikin kōm̧adm̧ad eo. Taktō eo eaar ba bwe ārin eaar jino ebbōj, im raar do̧o̧r e ilo juon artificial-respiration machine.
Raan eo tok juon kōm̧ ar kōnono ippān tōreektōr eo an jikin m̧wim̧wij eo. Eaar ba, “Iaar kōm̧m̧an kain o̧brejin rōt in ak ippān ajri ro rōrūtto ļo̧k. Jete an iiō kiiō?”
Kōm̧ kar ba, “ruo an allōn̄.”
“Ekōm̧etak wōt n̄an e. Elukkuun dik, im ebbōj eo ilo ārin ej men eo elukkuun in pen, ak jejjab maron̄ in pād kake menin. Ijjan̄in kar kōm̧m̧an o̧brejin n̄an juon ajri jidikdik. Inaaj kajieon̄ jon̄an wōt aō maron̄. Kwoj aikuj in wiaik juon raibin iialan kōte kane me ruo pōran, ak elukkuun in lap wōņāān—enan̄in $2,100. O̧brejin in enaaj kōm̧m̧an emen raan jen kiiō.”
Ta eo kōm̧ kar kōm̧m̧ane? Ejjeļo̧k ippām ak ro jet kōm̧ jeļā kajier ewōr aer jon̄an jāān in. Ijoke, ro jet raar roñ kōn jekjek eo am, im kōn jouj im tiriam̧o kake eo an Irooj kōm̧ ar maron̄ elolo jāān. Ļeo pāleō eaar maron̄ wiaiki valve eo kōm̧ aikuji n̄an lo̧mo̧o̧ren mour eo an leddik eo nejūm̧.
Ejjab ro jeim̧ im jatim̧ wōt ilo branch eo raar jar im jitlo̧k kōn leddik eo nejūm̧ ak barāinwōt mijenede ro im elōn̄ Armej ro Rekwojarjar ilo Raan-ko Āliktata ipeļaakin jikin eo. Kōm̧ ar en̄jake jipan̄ eo aer. Jijet ilo ettōņak eo ilo raan in o̧brejin eo, kōm̧ ar en̄jake an Jetōb Kwojarjar pād im ainikien jar ko an ro jeim̧ im jatim̧. Kōm̧ jeļā raar pād epaake kōm̧! Im Anij eaar pād ippam̧, tōl rim̧wijm̧wij ro. Eaar jab ilo̧k jen kōm̧, im aolep men raar tōprak.
Ke rim̧wijm̧wij eo ej diwōj tok ālkin o̧brejin eo, e, āinwōt epok, eaar jiron̄ kōm̧, “Aolep men im em̧m̧an. Kōm̧ ar kōdeļo̧n̄ valve eo. Ijaje ekōjkan, ak etōprak.” Ak kōm̧ jeļā ekōjkan an kar tōprak. Jememwōj Ilan̄ eaar kōjeram̧m̧an e.
Lizochka eaar bar pād ilo aujpitōl ium̧win jilu raan ilo an ebbōj eo ilo ārin dikļo̧k. Kar m̧wijiti im kōpeļo̧ke im kar bar kilōke kōn jidik m̧ōttan kil, im jejjo raan tok ālik raar bar o̧brejini im kiil ubbōn im m̧ōttan ko ilo ānbwiinin. Aolepen taktō ro raar jab jeļā en kar ke mour. Bōtaab kōm̧ij tōmak ilo Jemedwōj Ilan̄ im ilo kajoor eo An, im kōm̧ij tōmak bwe eļan̄n̄e ej ilo An kilaan, enaaj mour.
Anij wōt emaron̄ kar bar kōro̧o̧l tok Lizochka. Kajjojo raan, eaar em̧m̧an ļo̧k an pād. Eaar pād ilo aujpitōl eo bar juon allōn̄, im kiiō ej pād ippam̧ ilo kapijuknen.
Anij ej juon Anij in kabwilōn̄lōn̄ ko. Ej ron̄jake jar ko am, im ilo iien ko am reppen, Ej jipan̄ kōm̧. Apan̄ ko rej kōkajoor ļo̧k tōmak eo ad im katakin kōj n̄an tōmak, kōjatdikdik, im iakwe.