Jerbal ilo Kabun̄ eo
Kom̧m̧ool, Būratōr Jay
Rijeje eo ej jokwe ilo Nevada, USA.
Eļap aō m̧ōņōņō kōn jetōb eo, wūjlepļo̧k eo, kōppopo eo, im iakwe eo ejej uwaan an ro rellōn̄ rikarejaran ilo jabdewōt jikin ilo Kabun̄ in.
“Ilju ej Jabōt,” Iaar ba n̄an leddik eo nejū ļalem an iiō ke ej babu tok iioon neeō. Etōn̄dikdik eajerer aolepen turin mejān.
“O, em̧m̧an,” eaar ba. “Innām ij aikuj in loļo̧k Būratōr Jay.”
Kam̧oolol eaar kobrak būruwō. Eļap aō kam̧oolol kōn juon rūkaki in Būraimere eo eakwe, eo eaar kea ke kōm̧ij em̧m̧akūtļo̧k n̄an ward eo am̧ ekāāl. Etal jān kapijuknen eo am ilo U.S. Ilo Midwest im em̧m̧akūt 1,350 m̧aiļ ko (2,173 km) ettoļo̧k eaar lukkuun in pen n̄an aolepān baam̧le eo eļaptata ajri eo nejūm̧ rej pād ilo preschool, Season. Elukkuun ejjokook, emijak men ko rekāāl im mijak in pād ilo jar ilo wiik eo jinoin ilo ward eo am.
Brother Jay, juon em̧m̧aan eo ejouj, eaar kam̧ōņōņō im kar im̧we im lōke jān Season. Ilo Jabōt eo jinoin eaar badik laļtak, jibwe pein, im kalimjek māj ko mejān, im ba, “em̧m̧an ke, jitōn bōro. Kwonaaj limo ilo kūlaaj in ad.”
Ke wiik ko raar eļļāļo̧k, Season eaar ļap wōt an kijorore Jabōt jān raan ko jet ilo juon wiik. Iien eo kōm̧ij tōkeekļo̧k ilo m̧ōn jar eo, eaar reito reitak im pukōt rūkaki eo an ilubwilijin jarlepju eo. Enaaj kar mejān ettōn̄dikdik im iakweiakwe.
Ilo aolepān iiō ko Būratōr Jay eaar keememej kajjojo rijikuuļ kōn menin leļo̧k ko reddik ilo iien holiday ko im raan in keemem ko. Ke raan in keemem eo an Season eaar epaaktok, armej eo eaorōk tata eaar kōņaan in karuwaineneiki eaar Būratōr Jay.
Emaron̄ ke kile jon̄an an aorōk ilo mour eo an leddik eo nejūm̧? Emaron̄ ke kile ewi jon̄an an aorōk naan ko an im an kōm̧m̧an ejelet kumi in rijikuuļ ro an me ļalem aer iiō? Emaron̄ ke lukkuun jeļā ewi jon̄an aorōk in n̄an eō, āinwōt juon m̧am̧a, bwe en m̧ōttan mour eo an leddik eo nejūm̧?
Tokālik, Season eaar maron̄ em̧m̧akūtļo̧k n̄an kūlaaj eo an Būratōr Edward, im en̄jake ko an rem̧m̧an ilo Būraimere raar wōnm̧aanļo̧k wōt. Ewi jon̄an aō kam̧oolol kōn jekjek kein, em̧m̧aan im kōrā ro repojak, rettā im ewōr em̧m̧akūt eo em̧m̧an an Jetōb ilo er n̄an mour eo an Season.
Aolepān baam̧le eo am im lukkuun jeram̧m̧an jān rein rewūjlepļo̧k kajjojo me rej jerbal ippam̧ ilo iaļ in am ilo mour in jetōb. Ij keememej juon Scoutmaster eo etijem̧ļo̧k, juon rikakpilōklōk an doulul eo an pris ro eo ekijenmej, juon rūkaki in Jemenere eo ejeļā kōmaanwa, juon būreejtōnji an Doulul eo an Jiron̄ ro ejej uwaan, im juon bisop eo ekea.
Āinwōt kar kōjeram̧m̧an āinwōt kar baam̧le eo am, ijeļā bwe kōm̧ij jab āinjuon. “Būratōr Jay” bwe elōn̄ ro jeid im jatid me rewūjlepļo̧k n̄an jerbal in me emaron̄ un̄ur mour ko an baam̧le ko āinwōt eo am. Eļap ad kam̧oolol kōn jetōb eo aer, aer kalim̧m̧ur, m̧aanjebpopo, im iakwe.
Kom̧ool kōn aolep rikarejar ro ejej uwaer ilo Kabun̄ in me raar jipan̄ baam̧le eo am.
M̧ōņōņō ilo Raan in Ļotak!
Pija jān Nikolai Sorokin/Hemera/Thinkstock