Iaar Ron̄ Ainikien Ajri ro

Joy Cromar, California, USA

Nan̄inmej in aer in kōmālij ekar juon men ikar jab bar kōņaan loe. Ak ālkin aō kar anemkwoj jān e ium̧win 12 iiō, ekar jepļaaktok.

Iaar lukkuun mijak im kūtōtō. Iaar kajjitikin Jemedwōj Ilan̄ kake im jar kōn kajoor n̄an dāpdep wōt ilo mālijjon̄ in aō. Iaar barāinwōt akweļap n̄an E bwe aer in ļōmņak eo aō en jab ļapļo̧k jān 5 iiō ko, āinwōt kar iien eo ļo̧k.

Ļeo pāleeō kab n̄an ewōr jilu nejim ajri ro, ruo ļaddik im juon leddik, ro rekar kōjeram̧m̧an kōm̧ kōn 13 jibūm̧ ajri ro. Jeļā kōn inepata in ij jelm̧ae leddik eo nejū ekar kobaik baam̧le eo n̄an juon iien jitlo̧k im jar. Aolep ajri ro 1 ļo̧k n̄an 10 iiō, rekar kōņaan jar n̄an Bubu, im ro jilu rekar peptaij rekar kōņaan jitlo̧k. Ekar juon menin kaenōm̧m̧an n̄an jeļā ke ļeo pāleeō, ajri ro nejiro, im ajri ro jibūm̧ ro naaj jitlo̧k im jar kōn n̄a.

Raan eo juon ke ikar rūj jen aō kar babu, en̄jake in aer in kōmālij eo ekar jab lukkuun eddo. Raan eo juon ekar ļapļo̧k an mera. Ilo raan eo kein kōļalem aer in kōmālij eo aō ekar lukkuun in jako. Joten eo, ke ikar kejōkļo̧kjeņ kōn wāween an kabwilōn̄lōn̄ in waļo̧k, juon ainikien ekar un̄ūr būruwō im ba n̄an n̄a, “Ikar ron̄ ainikien ajri ro.” Jemedwōj Ilan̄ ekar ron̄ ainkien ro reddik im kar uwaake jar ko aer ilo aer ettā, tōmak, im iakwe.

Rilo̧mo̧o̧r eo eaar katakin:

“Eļan̄n̄e kom̧ jab oktak im erom āinwōt ajri re dik, kom̧ jāmin delon̄ ilo aelōn̄ in lan̄.

“Innām jabdewōt eo ej make kōttāik e āinwōt ajri in e dik, e in eļaptata ilo aelōn̄ in lan̄” (Matu 18:3–4).

Em̧ōj aō kar kōnono ippān ajri ro jibū im kam̧m̧oolol er kōn aer kar jar im jitlo̧k kōn n̄a. Iaar jiron̄ er jon̄an aō iakwe er. Iaar ba n̄an er ke Jemedwōj Ilan̄ ekar ron̄ ainikier im uwaake jar ko aer.

Ilo an ajri ro jibū rūttoļo̧k ilo gospel in, ij kōjatdikdik ke renaaj keememej iien eo Jemedwōj Ilan̄ ekar ba n̄an jibwier, “Ikar ron̄ ainikien ajri ro.” Im ij kōjatdikdik ke menin ekar waļo̧k enaaj kōkajoorļo̧k kam̧ool eo aer im jipan̄ er kajoor wōt ilo gospel in.

Aolep ajri ro 1 ļo̧k n̄an 10 iiō, rekar kōņaan jar n̄an Bubu, im ro jilu rekar peptaij rekar kōņaan jitlo̧k.