M̧ae iien Jenaaj Bar Ioon Doon
Moņ ko
Jen Elder M. Russell Ballard
Jen Doulul eo an Jon̄oulruo Rijilōk ro
Jān “O That Cunning Plan of the Evil One,” Liahona, Nov. 2010, 108–110.
Kōmeļeļe ko jān J. Ken Spencer
Autumn ej juon iien ekam̧ōņōņō n̄an rieon̄o̧d ro, kōnke ej iien an ek ko kōņaan aineļap im kuk ippān doon n̄an kōpooj ānbwinier n̄an ko̧kōn̄ m̧ōn̄ā ilo iien winter.
Kōttōpar eo an rieon̄o̧d ro ej n̄an kōjerbal m̧oņ āinwōt kein kōko̧jōk ek. Rieon̄o̧d ro rem̧ōkade raar ekkatak kōn m̧wilin ek ko, mejatoto, m̧akūtkūt in no̧, im kain menin mour rōt ek ko rej m̧ōn̄ā im n̄āāt menin mour ko rej koļļotak. Emakijkij an jin̄aik kōn pein aujid ko ej kōjerbali. Ejeļā kōn menin mour kein lukōji kōn eo ko raidik raikuj erom menin m̧oņ em̧m̧antata kōnke ek ko remaron̄ kūle men̄e bōd jidikdik im jab kan̄ mo̧o̧r eo.
Ta juon kam̧ōņōņō n̄an lale an ek ko kalōn̄tak jen bulōn̄ lo̧jet, kan̄ mo̧o̧r eo, im dipūkpūk m̧ae iien em̧ōk im wōtlo̧k. Kaminene in ej ikōtaan kapāāl im mālōtlōt an rieon̄o̧d im ek ko.
Jerbal eo an aujid ko ej n̄an kabwebweik im ko̧jōk juon ek ej juon waanjon̄ak kōn emakijkij in an Lucifer kijon̄ kapo, m̧oņ im eon̄o̧d e kōj.
Āinwōt rieon̄o̧d eo ejeļā bwe ek ko rej jipadōk ļo̧k n̄e rekwole, Lucifier ejeļā ad “kwole” ak m̧ōjņo, im kapo kōj kōn aujid ko me, eļān̄n̄e būki, maron̄ kakkure aenōm̧m̧an eo ilo mour ko ad kōn kareel in jab tiriam̧o kake eo an. Im jab āinwōt juon rieon̄o̧d eo ej ko̧jōk im kōtļo̧k ek ko jab m̧ani ko̧ro̧o̧l ļo̧k n̄an lojet, Lucificer epan kōņaan etal. An kōttōpar ej n̄an kōm̧m̧an bwe aolep armej ren en̄taan āinwōt e.
Juon iaan kein jerbal ko ej kōjerbali ņae kōj ej maron̄ eo an n̄an riap im m̧oņ n̄an kareel kōj bwe nana em̧m̧an im em̧m̧an enana. Jān kar jinoin ilo Ko̧o̧njeļ eo Ilan̄, Setan ekar pukōt n̄an kakkure anemkwoj an armej, eo me N̄a, Irooj Anij, kar leļo̧k n̄an e (lale Moses 4:3).
Pata ņae anemkwoj eo an armej letok jen Anij ej wōnm̧aan ļo̧k rainin. Setan im rikaloor ro an rej likūt aujid ko aer ipelakūd, kōtmāne bwe jenaaj m̧ōjņo̧ im po ilo aujid bwe en maron̄ kakkure kōj kōn riap ko ejej tokjāer.
Ro jeiū im jatū, jemaron̄ ke aolep ekkōl kōn kapo ko em̧ōj litok n̄an kōj jān rieon̄o̧d armej, Lucifer. Jemaron̄ ke bōk kapeel im errem̧aan ļo̧k an jetōb n̄an joļo̧k im kowaan menin letok ko an rellōn̄ im kauwōtata.
Im n̄an aolep ro raar bōk kuņaer ilo jabdewōt kain an̄ūrlep, ewōr kōjatdikdik kōnke Anij ej iakwe aolep ro Nejin im kōnke Pinmuur eo an Irooj Jisōs Kraist ekōm̧m̧an bwe aolep men ren pidodo.