Ioon Dān ko
Rijeje eo ej jokwe ilo Utah, USA.
Iaar akweļap ippān Jemedwōj Ilan̄ n̄an joļo̧k aō inepata im ebbeer, ak n̄e ejjab kapo kein, ij jamin naaj kar tōpar jabdewōt “ānen kalim̧m̧ur” Eaar tōl ļo̧k eō n̄an i.
Enan̄in jiljino allōn̄ ālkin kadiwōjļo̧k eo aō jān kaļej, iaar jino en̄jake inepata, jet iien inepata, im en̄jake ebbeer. Iaar jab jeļā ia eo en̄jake kein raar itok jāni, ak raar kajoor im kamōjņo̧ņo̧.
Iaar en̄taan n̄an dāpij wōt eō. Ilo jerbal, jabdewōt jerbal kāāl raar bōktok inepata bwe iaar jab maron̄ jijet wōt. Ej wōr aō ļōmņak eo epen dāpiji, im būruwō ej lukkuun bam̧ bwe iaar ļōmņak enaaj kenamōjļo̧k jen ubō. Menin ej waļo̧k jen raan n̄an raan, im ālkin aō ro̧o̧ltok n̄an m̧weo jān jerbal kajjojo raan, inaaj okjakļo̧k ioon kawij eo. M̧okta jān aō kar jeļā kake, joten eo eaar mootļo̧k im bar juon raan eaar bar waļo̧k.
En̄jake kein raar dāpdep wōt ium̧win allōn̄ im allōn̄, mekarta iaar loe juon aō jerbal ekāāl im pukōt jipan̄ ko rem̧m̧an ļo̧k.
Iaar jar aolep jibbon̄ ilo iaļ eo aō n̄an jerbal kōn kajoor n̄an aō maron̄ tōprak raan eo im maron̄ ro̧o̧l n̄an m̧weo n̄an ippān kōrā eo pāleeō im leddik eo nejū. Iaar jab maron̄ loe juon jem̧ļo̧k n̄an en̄taan eo aō, im ekkā aō kōņaan in bōjrak. Elōn̄ raan ko iaar akweļap n̄an lan̄ kōn jipan̄ ke meja eaar obrak kōn dān in kōmjaļaaļ. Iaar jar kōn eļapļo̧k m̧ool ibba jān kar m̧okta, akweļap ippān Jemedwōj Ilan̄ n̄an jipan̄ eō meļeļe mālijjon̄ in im kōm̧akūt i jān eō.
Iaar en̄jake jōbwābwe ilo maroklep im ebbeer ke iaar jab en̄jake Jetōb eo. Ak ke Jetōb eo eaar kotak eō jān aō ebbeer, iaar lo lōke n̄an wōnm̧aanļo̧k wōt—eļan̄n̄e enaaj pād wōt n̄an jar eo aō juon. Iaar pedped ioon Jemedwōj Ilan̄ eļapļo̧k jān juon jar ilo iien m̧ōn̄ā ak juon jar ilo bon̄ jab lukkuun kwaļo̧k ļōmņak ko. Āinwōt juon uwaak, iaar eddōkļo̧k epaake E.
Lukti ioon No̧ ko
Ilo ioļapļap in aō inepata im ebbeer, iaar bar riiti bwebwenato eo an Rijared ro rej kijoone “m̧wilaļ ko in lo̧jet” (Ether 2:25). Imaron̄ wōt pijaik aer inepata kōn aer kōtmāne ke raar deļo̧n̄e baaj ko waer. Ito itak eo aer emaron̄ kauwōtata, ak raar jeļā bwe raar jibadōkļo̧k “juon āneo emake ioon aolep bar āne ko jet” (Ether 2:15).
Jān ito itak eo aer, jej riit:
“Irooj Anij eaar kōm̧m̧an bwe en wōr juon kōto ekijon̄ ej makroro ioon mejān dān ko, lo̧k n̄an āneen kallim̧ur; im āindein kar kejepelik er ioon ņo̧ ko in lo̧jeen im̧aan kōto eo.
“Im ālkin men kein rekar elōn̄ kallib ilo m̧wilaļ ko in lo̧meto, kōnke ņo̧ toļ ko rekar rub ioer, im barāinwōt eļap im nana lan̄ ko rekar waļo̧k jān lej in kōto eo.
“… Ke rekar pooļ ijeņ im ijeņ kōn elōn̄ dān ko rekar kūr n̄an Irooj, im Eaar bar bōk lōn̄ļo̧k er ioon aejet in dān ko.
“Im ālkin men kein kōto eo eaar jab bwōjrak n̄an ukļo̧k n̄an āneen kallim̧ur ke rekar pād ioon dān ko; im āindein kar kinōōrļo̧k er im̧aan kōto eo” (Ether 6:5–8).
Eoon kein raar erom aō. Iaar en̄jake bwe iaar pād ioon baaj eo waaō make, ippān ņo̧ in inepata lukut ioō im ņo̧ in ebbeer ej jūp ioō im kalibwin eō ilo m̧wilaļ ko an ebbeer. Ke iaar “pooļ ijin im ijeņ” im kar jan̄ n̄an Irooj, imaron̄ kar dōblo̧k ioon aejet ak maron̄ kallib bar juon alen.
Iaar riiti eoon 8 bar juon alen: “Im ālkin men kein kōto eo eaar jab bwōjrak n̄an ukļo̧k n̄an āneen kallim̧ur ke rekar pād ioon dān ko; im āindein kar kinōōrļo̧k er im̧aan kōto eo” Innām ej ukļo̧k eō. Kōto eo eaar kōm̧m̧an toļ ņo̧ ko n̄an kalbwin baaj ko barāinwōt kar kōjeram̧m̧an Rijared ro ilo ito itak eo aer. Iaar akweļap ippān Jemedwōj Ilan̄ n̄an joļo̧k aō inepata im ebbeer, ak n̄e ejjab kapo kein, ij jamin naaj kar tōpar jabdewōt “ānen kalim̧m̧ur” Eaar tōl ļo̧k eō n̄an i.
Eoon kein raar ukōt paotok in mour eo aō. Aō inepata im ebbeer eaar ļapļo̧k ilo pedped ioon Jemedwōj Ilan̄. Eļan̄n̄e en kar jab kōto im ņo̧ ko, imaron̄ kar jab maron̄ in jeļā Anij āinwōt aō jeļā—im Rijared ro remaron̄ kar jab maron̄ tōpar ānen kalim̧m̧ur eo.
N̄an kiiō, jet iiō ālkin en̄jake in, kōto in inepata ko aō rej jab bar jedmetmet im ņo̧ in ebbeer ko aō rej jab bar kalbwin eō. Ak eļan̄n̄e im n̄e lan̄ eo enana ej jepļaaktok, inaaj kūr ioon Irooj im kam̧oolol, jeļā bwe lur in lo̧jet ej jab bōkļo̧k baaj ko n̄an ānen kalim̧m̧ur—ļan̄ in lo̧jet rej.
Kōmeļeļe jān Jerry Harston